Givim Bel Long Wok Autim Tok
Namba 1 Hap: Pilim Tru Gutpela Pasin Bilong Jehova
1 Yumi givim bel long wok autim tok, long wanem, yumi pilim tru ol gutpela samting Jehova i bin mekim bilong helpim yumi. (2 Sml 22:2, 3) Yumi sori long ol man i stap longwe long God na yumi pilim tru ol hevi bilong ol, na dispela i mas kirapim yumi long wok strong long mekim wok bilong em. (Mt 9:36; 2 Ko 5:14, 15) Sapos yumi givim bel tru long Jehova na yumi tingim gut ol manmeri, orait bai yumi givim bel tru long wok bilong autim tok. (Mt 22:37-39) Wok bilong yumi long autim tok bai kamap olsem wanpela gutpela samting tru long yumi. (2 Ko 4:7) Tasol yumi ken mekim wanem na bai yumi laikim tru wok bilong autim tok?
OL SAMTING BILONG HELPIM YUMI LONG LAIKIM TRU WOK BILONG AUTIM TOK
2 Sapos yumi stadi long Baibel long haus bilong yumi na long ol miting, na yumi beten na yumi tingim gut ol dispela tok, dispela bai helpim yumi long pas gut wantaim Jehova. Bai yumi save long ol gutpela gutpela pasin bilong em. Olsem wanem? Yu wokim sedyul bilong kaunim Baibel long olgeta wik na yu bihainim gut dispela sedyul? Yu save makim sampela hap taim bilong yu ken stadi long ol buk samting bilong Sosaiti long olgeta wik? Yu save redim ol tok bilong miting, na go long olgeta miting, na bekim sampela tok? (Hi 10:24, 25) Taim yu stadi, na bihain long stadi tu, sapos yu tingim gut ol tok yu bin stadi long en, orait dispela bai helpim yu long pilim tru gutpela pasin sori bilong God na ol samting em i mekim bambai yumi ken lotu tru long em.—Sng 27:4.
3 Narapela samting yumi ken mekim na bai yumi laikim moa dispela wok, em yumi mas tingim gut ol narapela wokboi bilong God ol i bin givim bel tru long mekim wok bilong God na ol i stap olsem gutpela piksa bilong yumi ken bihainim. Profet Jeremaia i strong long mekim wok God i bin givim long em. (Jer 20:9) Jisas i makim gutpela rot yumi ken bihainim—em i laikim tru ol wok God i bin givim long em na em i strong long mekim. (Jo 4:34) Aposel Pol i mekim bikpela wok tru long autim tok na dispela i kamapim klia olsem em i tenkyu tru long God i bin marimari long em. (1 Ti 1:12, 13, 17) Taim yumi tingim ol dispela wokboi bilong God long bipo na sampela bilong nau em ol i stap olsem gutpela piksa, bai yumi kisim pasin bilong laikim wok bilong autim tok na bai yumi givim bel tru long mekim dispela wok.
4 Taim yumi kisim save long ol gutpela pasin bilong Jehova na biknem na namba bilong em, na yumi save long ol bikpela wok em i bin mekim, dispela bai kirapim yumi long tokaut long ol dispela samting na long dispela rot bai yumi litimapim nem bilong em. (Sng 145:5-7) Taim yumi wok long painim kain kain rot bilong autim tok bilong Kingdom, dispela i kamapim klia olsem yumi amamas tru long yumi gat rot bilong kamapim nem bilong Jehova long ol man na autim tok bilong em.—Lu 6:45.
5 Tasol olsem wanem? I gat sampela samting moa bilong kirapim yumi long givim bel tru long mekim wok autim tok? Sapos olsem, orait em wanem ol samting? Ol elda, na ol wokman bilong kongrigesen, na ol painia, na ol narapela i save gut long pasin bilong autim tok long Kingdom, ol inap helpim yumi olsem wanem? Ol samting yumi putim olsem mak bilong yumi ken winim, olsem wanem dispela inap helpim yumi long kisim pasin bilong givim bel long mekim wok? Bai yumi kisim wanem ol gutpela samting long dispela? Bekim bilong ol dispela askim na sampela askim moa i stap insait long ol narapela hap bilong dispela tok i gat 5-pela hap bilong en, em ol bai kamap long ol narapela Wok Kingdom Bilong Yumi bihain.