Helpim Ol Man Long Lusim Tudak na Kam Long Lait
1 Bikpela tudak long ol samting bilong spirit i karamapim olgeta lain manmeri bilong graun. (Ais 60:2) Kirap long taim namba wan man na meri i mekim rong na i kam inap long nau, Satan, em “giaman god bilong dispela graun,” em i bin kalabusim ol man i stap long tudak long ol samting bilong spirit, na dispela i mekim na kain kain pasin nogut i kamap long graun.—2 Ko 4:4.
2 Yumi kam pinis long lait, long wanem, yumi save long tok i tru, tasol olsem wanem? Yumi save sori tru long ol manmeri olsem Jisas i sori long ol? (Mt 9:36) Sapos olsem, orait bai yumi pilim tru bikpela wok Jisas i givim long aposel Pol ‘bilong opim ai bilong ol man na bai ol i ken givim baksait long tudak na kam long lait, na lusim strong bilong Satan na i kam long God.’—Ap 26:16-18.
GIVIM LAIT LONG BEL NA TINGTING BILONG OL MAN
3 Satan i save pasim bel na tingting bilong ol man, olsem na wanem samting inap helpim ol? Yumi mas mekim wok long Tok bilong God bambai yumi ken putim dispela tok long bel na tingting bilong ol. Pol i beten long God i ken givim lait long tingting bilong ol man bilong Efesus. (Ef 1:17, 18) Tok bilong God tasol i gat strong long i go insait long bel bilong man. (Hi 4:12) Yumi save pinis long dispela samting, olsem na dispela i mas kirapim yumi long lain gut long pasin bilong mekim wok long Baibel taim yumi autim tok long ol man.
4 Tingim gut ol askim i stap long dispela paragraf, long wanem ol bekim bilong yu inap helpim yu long mekim gutpela wok moa long autim tok. Ol dispela askim i olsem: Taim yu go autim tok, yu redi gut pastaim? Taim yu laik go autim tok yu save traim sampela pasin bilong kirapim tok na bai man bilong haus i amamas long harim? Yu save redim gut Stori Bilong Mun na yu mekim wok long en? Taim yu toktok wantaim man long Baibel, tok bilong yu i save kirapim tingting bilong em?—Ap 17:2.
WASTAUA INAP HELPIM GUT YUMI
5 Wastaua i bin helpim planti milion man long lusim tudak na kam long lait. Em i helpim yumi long save long olsem wanem yumi inap bihainim ol stretpela lo bilong Baibel, na save long insait bilong ol tok profet i makim dispela taim nau yumi stap long en, na i helpim yumi long skelim wanem lotu i tru na wanem lotu i giaman na bai yumi ken wokabaut long pasin God i save laikim.
6 Wastaua i kamapim tok i tru bilong Baibel na dispela i bin kamapim wanem gutpela samting? Stretpela save long God na Pikinini bilong em i bin helpim kain kain man long painim rot bilong kisim laip oltaim. (Jo 17:3; 1 Ti 2:4) Wanpela man bilong kaunim Wastaua i salim pas long Sosaiti na em i tok: “Mi laikim tru ol tok bilong Wastaua! Ol stori bilong en i helpim yumi olgeta long save gut long dispela taim nau yumi stap long en. Tenkyu tru long ol bikpela wok yupela i mekim bilong redim ol gutpela tok bilong Wastaua. Tru tumas, em i gutpela kaikai bilong spirit.”
TINGTING GUT
7 Oktoba em mun bilong tilim sabskripsen bilong Wastaua na yumi mas painim sampela rot bilong helpim ol man long lusim tudak na kam long lait. Yumi inap mekim olsem taim yumi go long haus bilong ol na toktok wantaim ol long tok bilong Baibel. Taim yumi painim man i gat laik tru long harim tok bilong Kingdom, orait yumi ken tokim em long olsem wanem Wastaua bai helpim em sapos em i kaunim long olgeta taim. Sapos em i bin kaunim bipo na em i laikim tru ol tok bilong en, orait toksave olsem em inap kisim Wastaua long olgeta taim long rot bilong sabskripsen. Sapos em i no bin kisim sabskripsen bipo na yu pilim olsem em i no laik kisim bilong wanpela yia olgeta, orait yu ken tok, em inap kisim sabskripsen bilong 6-pela mun tasol. Sapos em i kisim, orait yu mas wok long go bek lukim em, na sapos yu pilim olsem em i laikim ol tok bilong Wastaua, orait taim sabskripsen bilong em i laik pinis, yu ken tokim em long kisim sabskripsen bilong wanpela yia.
8 Taim yumi go autim tok long ol haus na long rot o yumi autim tok long ol wanwok o wanskul o wanlain, yumi autim tok i tru bilong helpim ol man long kamap fri. (Jo 8:32) Wastaua i gutpela rot bilong helpim ol man long lusim tudak na kam long lait, na bai ol i ken kamap fri na kisim laip i stap oltaim.
[Ol Askim]
1. Satan i bin mekim wanem long ol manmeri?
2. (a) Jisas i givim wanem wok long Pol? (b) Wanem samting i mekim na yumi pilim tru dispela wok?
3. (a) Satan inap mekim wanem long bel na tingting bilong ol man? (b) Yumi mas mekim wanem? (c) Taim yumi kaunim tok bilong Efesus 1:17, 18 na Hibru 4:12 yumi mas ting olsem wanem long wok bilong yumi long autim tok?
4. Yumi ken givim wanem ol askim long yumi yet? Pol i save mekim wanem gutpela pasin na yumi ken bihainim?
5. Olsem wanem Wastaua i bin helpim planti milion man? Olsem wanem Wastaua i bin helpim yu yet?
6. Wanpela man bilong kaunim Wastaua i tok wanem long en?
7, 8. Olsem wanem Wastaua inap helpim kain kain man? Dispela i mas kirapim yumi long mekim wanem?