Tok Bilong Pastaim Inap Kirapim Man Long Putim Gut Yau
1 Olsem wanem? Yupela i traim pinis sampela pasin bilong kirapim tok olsem Wok Kingdom i bin kamapim na i stap long buk Reasoning? Planti pablisa i tok taim ol i autim tok ol i bin kolim stret ol tok Wok Kingdom i kamapim na dispela i bin helpim ol long autim gut tok. Sampela i tok sapos ol i lusim liklik hap taim moa long redi long autim tok, ol inap senisim liklik ol dispela tok na ol inap mekim toktok long tok bilong ol yet.
2 Sapos paslain long yu autim tok bilong Kingdom yu save pinis long wanem ol tok yu laik kamapim, orait bai yu no pret long autim tok, a? Ol tok yu mekim bai kamapim klia olsem yu gat bikpela laik long autim tok bilong Kingdom. Sapos yu redi gut, bai yu inap kisim bikpela amamas, long wanem, planti man bai harim tok bilong yu. Tasol bikpela samting i olsem: Ofa yumi givim long God, olsem yumi autim tok long ol man, dispela ofa i mas nambawan tru.—Hi 13:15; 1 Pi 2:5.
3 Olsem na taim yu redi long autim tok, nogut yu hariap na mekim—yu mas lusim bikpela hap taim liklik bilong redi gut. Tingim ol dispela samting: Wanem ol kain man i stap long teritori bilong yu? Wanem ol samting i bikpela samting long ol? Wanem ol samting i kamap long hap bilong ol i save putim hevi long ol? Tingim bekim bilong ol dispela askim, na nau lukim gen sampela tok yu ken mekim bilong kirapim tok em Wok Kingdom o buk Reasoning (pes 9-15) i kamapim. No ken pret long senisim liklik ol dispela tok bambai ol tok yu autim inap stret long pasin bilong yu yet na bai yu amamas long autim. Orait, nau traim wantaim sampela pablisa ol tok yu laik mekim bilong kirapim tok wantaim man bilong haus. Ating dispela bai kirapim ol tu long redim sampela gutpela tok ol i ken mekim pastaim bilong kirapim man long harim tok. Long dispela rot narapela inap kirapim narapela na strongim narapela long mekim gutpela wok.
4 Sapos yu lusim taim na strong bilong redim ol tok yu laik mekim long man bilong haus, orait dispela bai helpim yu. Bai yu inap mekim gut moa wok bilong kisim ol man i kam insait long lain bilong Jehova long nau.