Ol Samting Yu Ken Mekim Bilong Redi Gut Long Autim Tok
1 Olsem wanem? Sampela taim yu pret long go autim tok o mekim ol gobek samting, long wanem, yu no save gut bai yu tok wanem? Sapos olsem, ating bai yu laikim ol tok em Wok Kingdom bai kamapim.
2 Nau bai Wok Kingdom i stori long planti rot moa na ol kain kain tok yumi ken kamapim taim yumi go long ol haus na autim tok bilong Kingdom o mekim gobek o Baibel-stadi. Ol dispela tok bai kirapim yu long tingim wanem ol tok yu laik kamapim taim yu autim tok. Taim yu redi long autim tok, tingim wanem tok bai helpim gut ol man long teritori bilong yu. Na tingim tu, bai yu kolim stret ol tok Wok Kingdom i kamapim o bai yu senisim liklik na bai ol tok yu autim i stret long ol man long teritori bilong yu, o i stret long pasin bilong yu yet long autim tok. Taim yu autim tok long man bilong haus, gutpela sapos yu mekim toktok long tok bilong yu yet na bai yu inap toktok gut wantaim ol man. Olsem wanem? Yu laik mekim bikpela wok moa long autim tok o mekim sampela hap wok yu no bin mekim bipo? Ating ol tok Wok Kingdom bai kamapim inap helpim yu long mekim olsem.
3 Sapos yu lukautim wanpela bung bilong i go autim tok, gutpela sapos yu save gut long ol tok Wok Kingdom i kamapim. Lainim gut ol tok bilong en na long dispela bung, yu ken kamapim sampela tok yu ting em bai helpim tru ol man long teritori yupela i laik autim tok long en.
4 Sapos yumi inap mekim gut wanpela wok, yumi save amamas long mekim, a? Mipela i ting ol samting Wok Kingdom i kolim bilong helpim yumi long redi gut long autim tok, dispela bai helpim ol nupela pablisa wantaim ol pablisa i save pinis long pasin bilong autim tok, na bai ol inap amamas na mekim gut wok bilong autim tok bilong Kingdom.