Askim

◼ Taim ol yangpela pikinini i go wantaim papamama Kristen bilong ol long autim tok, ol i ken kamapim wanem ol liklik tok na bihain ol inap kamap pablisa i no baptais?

Ol papamama Kristen i laik bai ol pikinini bilong ol i kamap strongpela wokboi bilong Jehova na givim bel long em. (1 Sml 2⁠:​18, 26; Lu 2⁠:40) Ol pikinini bilong papamama Kristen, taim ol i liklik yet, gutpela sapos ol inap kamapim klia as bilong bilip bilong ol i stap long Baibel. Kirap long taim ol i liklik yet, sapos ol i go wantaim papamama bilong ol long autim tok, bai ol i kamap strong hariap long ol samting bilong spirit. Tasol bilong ol i ken amamas long autim tok, na kisim laik bilong kamap pablisa i no baptais, na mekim yet wok autim tok, bel i mas kirapim ol long autim tok. Olsem na papamama i mas skulim ol gut. (1 Ti 4⁠:6; 2 Ti 2⁠:15) Na sampela taim ol strongpela pablisa i ken helpim ol pikinini sapos papamama i orait long ol i mekim olsem.​—⁠Lukim buk Lo, pes 99, 100.

Taim ol gutpela pikinini i go wantaim papamama Kristen long ol haus na autim tok, ol i lain long pasin bilong autim tok. Tasol bilong kamap pablisa i no baptais, ol i mas inap long autim gut tok. Papamama Kristen i ken tingim wanem ol liklik tok pikinini inap kamapim taim ol i autim tok wantaim. Sapos pikinini i no kamap pablisa yet, em wanpela tasol i no ken i go long ol haus na autim tok o go wantaim narapela pikinini long autim tok. Papamama i ken helpim pikinini long redi long autim tok na larim em i mekim sampela samting, olsem kaunim wanpela skripsa, o tilim wanpela liklik nius or magasin, o soim piksa bilong wanpela buk samting long man bilong haus. Taim pikinini i wok long kamap bikpela, orait em i ken mekim sampela tok moa.

Sapos papamama i skulim gut pikinini long autim tok na pikinini i bihainim dispela tok bilong ol na bihainim gutpela pasin, orait, long dispela rot pikinini inap pilim olsem wok autim tok em i bikpela samting. Ol pikinini i no pablisa yet, papamama bilong ol i no ken lusim ol long ples bung bilong go autim tok na ting ol narapela bai lukautim ol, nogat. Papamama i save tingim gut pikinini bilong ol, ol i save em wok bilong ol yet long bosim pikinini​—⁠em i no wok bilong narapela. Tasol sampela strongpela pablisa ating bai ol i laik helpim ol papamama long skulim ol liklik pikinini bilong ol i stap insait long kongrigesen, em ol i gat laik tru long mekim wok bilong Jehova long autim tok.

This article is repeated in km 12/06.