Mekim Gut Wok Long Nupela Buklet
1 Long kibung distrik yumi amamas tru long kisim nupela buklet, Taim Wanpela Long Famili i Dai. Ol man bilong kain kain wok na sindaun bai laikim dispela buklet, long wanem, planti man i bin krai sori long wanpela wanblut i bin i dai. Buklet i gat ol gutpela piksa, olsem na ating bai i no hatwok long tilim. Piksa long pes 29 bilong Jisas i kirapim bek Lasarus, i kamapim klia olsem Jisas “i gat bikpela laik tru long pinisim ol hevi bilong i dai.” Pes 30 i gat piksa bilong ol man i dai pinis i kirap bek long nupela taim. Ating dispela bai givim bikpela amamas long man i krai sori!
2 Dispela buklet inap helpim tru yumi long strongim bel bilong man i krai sori. Ol i wokim bilong helpim yumi long toktok wantaim ol narapela. Ol askim bilong kamapim ol bikpela tok ol i stap insait long wanpela blok long pinis bilong ol wan wan hap bilong buklet. Wanem wok yu laik mekim long ol dispela askim bilong helpim gut sumatin bilong yu, em laik bilong yu.
3 Taim yu go lukim man, sapos yu pilim olsem i stret long man bilong haus, yu ken opim buklet long pes 2 i gat lista bilong ol tok i stap insait, na askim man long makim wanem tok em i gat bikpela laik long save long en. Larim em i kamapim tingting bilong em, na nau soim em olsem wanem buklet inap strongim bel bilong em. Olgeta wan wan hap i kamapim planti tok bilong Baibel bilong strongim bilip bilong yumi.
4 Het-tok long pes 5, “Yumi Inap Bilip Tru,” i kamapim klia olsem i gat gutpela samting i wetim man i dai pinis, em tok bilong Baibel i as bilong en. Ating dispela bai kirapim man long toktok wantaim yumi long “Gutpela Samting Tru i Wetim Man i Dai Pinis,” i stap long pes 26-31. Blok long pes 27 i kamapim “Ol Tok Bilong Strongim Man.” Man bilong haus i krai sori em bai save olsem Jehova em i “God bilong mekim isi bel bilong olgeta man i gat hevi.”—2 Ko 1:3-7.
5 Ol narapela hap bilong buklet i stori long ol narapela narapela samting ol man i mekim taim wanpela i dai. Ol dispela hap i helpim man long save long ol samting em i ken mekim bilong karim bel hevi bilong em, na ol samting ol narapela i ken mekim bilong helpim man i krai sori. Blok long pes 25 i stori long “Helpim Ol Pikinini Em Wanpela Long Famili i Dai.” Dispela bai helpim gut papamama long helpim tru pikinini bilong ol.
6 Gutpela sapos yu putim wanpela bilong dispela buklet i stap klostu na bai yu inap mekim wok long en long kain kain taim na ples. Ating long ples matmat, long pasin isi, yu ken bungim ol man i krai sori ol i kam lukim gen matmat bilong wanpela long famili i dai pinis.
7 Yumi amamas Jehova em i God bilong “mekim isi bel bilong ol manmeri i stap bel hevi.” (2 Ko 7:6) Em gutpela samting tru yumi inap insait long dispela wok bilong ‘strongim bel bilong ol manmeri i krai.’—Ais 61:2.