Ol Blesing Yumi Kisim Taim Yumi Wok Wantaim Ol Narapela
1 Olsem wanem? Taim yu wok wantaim ol narapela long autim tok, yu pilim olsem dispela samting i helpim yu? Jisas i pilim olsem. Maski i olsem planti kaikai tumas i redi pinis long gaden na i no gat planti wokman i stap bilong kisim, em i salim 70 disaipel i go autim tok “tupela tupela.” Ol i autim tok “long olgeta taun na ples em yet i laik i go long en,” na olgeta i kisim blesing!—Lu 10:1, 17; Mt 9:37.
2 Taim tupela i wok wantaim, narapela inap strongim narapela. Sampela bilong yumi i save sem na ol i hatwok long toktok wantaim man ol i no save long en. Olsem na sapos i gat narapela i stap wantaim yumi, dispela inap strongim bel bilong yumi na bai yumi no pret long autim tok bilong God. Taim narapela i stap wantaim yumi, ating bai yumi no hatwok tumas long autim tok long pasin yumi bin skul long en. (Snd 27:17) Saveman i tok: “Sapos tupela man i stap wantaim, em i gutpela.”—Sav 4:9.
3 Gutpela sapos yumi wok wantaim ol narapela narapela pablisa na painia. Aposel Pol i save autim tok wantaim ol narapela, olsem Barnabas, Sailas, Timoti, Jon Mak, na taim ol i autim tok wantaim, ol i kisim planti blesing. Long nau tu i olsem. Olsem wanem? Yu bin wok wantaim narapela em longpela taim pinis em i bin stap insait long tok i tru? Taim yu lukim pinis pasin bilong em long autim gut tok, ating dispela i bin givim sampela gutpela tingting long yu bilong helpim wok bilong yu long kamap gutpela moa. Olsem wanem? Yu bin wok wantaim sampela nupela pablisa? Sapos olsem, ating yu bin helpim ol long sampela samting yu yet yu save pinis long en, na long dispela rot ating yu bin helpim ol long mekim gut moa wok bilong ol long autim tok na ol i kisim bikpela amamas moa.
4 Olsem wanem? Yu save lukautim wanpela Baibel-stadi? Sapos olsem, gutpela sapos yu singautim wanpela elda o wasman sekit i go wantaim yu. Gutpela tu sapos ol Baibel-stadi bilong yumi i save long ol elda. Sapos yu pret liklik long mekim stadi long ai bilong elda, ating em yet bai redi long mekim na yu ken lukluk tasol. Bihain, no ken pret long askim em long givim sampela tingting long yu bambai yu inap helpim Baibel-stadi long kamap strong hariap.
5 Taim yu wok wantaim ol narapela, wok long strongim bel bilong ol. Taim yu stori long teritori yu wok long en, mekim gutpela tok tasol. No ken tok baksait long ol narapela o bel nogut na toktok planti long ol samting bilong kongrigesen. Tingting tasol long wok autim tok na ol blesing yu kisim long Jehova. Sapos yu mekim olsem, yu wantaim ol poroman bilong yu bai stap belgut na amamas taim yupela i go bek long haus bilong yupela.
6 Ating wok na sindaun bilong yu i mekim na yu hatwok long stretim rot bambai oltaim yu inap wok wantaim ol brata sista. Tasol sapos yu inap, gutpela sapos yu stretim rot na bai yu gat hap taim bilong wok wantaim wanpela pablisa. Yutupela wantaim bai kisim gutpela blesing!—Ro 1:11, 12.