Stadi—Em Bikpela Samting
1 Yumi mas tingim wanem ol bikpela samting? Yumi mas wok strong long pas gut wantaim Jehova. Bilong mekim olsem yumi yet i mas stadi. Tasol long nau, ating wan wan tasol bilong yumi i gat bikpela hap taim long stadi na tingim gut long bel ol tok ol i stadi long en. Tasol sapos yumi no kaunim Tok Bilong God long olgeta taim, ating bai yumi no gat strong moa long sakim ol tingting na laik nogut bilong dispela graun.
2 Laik Tumas Long Kisim Tok Bilong God: Taim yumi bin lain nupela long ol samting God i laik mekim, ating yumi hangre tru long kisim sampela save moa. Tasol bihain liklik ating yumi no hangre moa olsem pastaim. Olsem na ating yumi mas kirap gen long kisim pasin bilong “laikim tumas” ol kaikai bilong spirit. (1 Pi 2:2) Yumi ken mekim olsem wanem?
3 Taim yumi harim smel bilong kaikai yumi laikim tumas, ating dispela i kirapim yumi na yumi gat bikpela laik long kaikai. Olsem tasol, sapos planti taim yumi stadi inap sotpela taim na yumi amamas long kisim sampela gutpela kaikai bilong spirit, ating dispela bai kirapim yumi na yumi gat laik long kisim ol strongpela kaikai. Sapos yumi amamas long kisim save, ating dispela bai kirapim yumi long digim i go daun tru long Tok Bilong Jehova.
4 Makim Taim Bilong Stadi i Stret Long Yu: Sampela i save makim wanpela apinun olgeta long mekim stadi, na sampela i laik stadi inap sotpela taim tasol, na mekim planti taim. Sapos tingting bilong yu i wok gut long moningtaim tru, ating yu ken stadi paslain long taim yu laik kaikai. Tasol sapos tingting bilong yu i wok gut long nait, ating yu ken stadi paslain long taim yu laik slip. Tasol maski wanem taim yu makim bilong yu yet i stadi, bikpela samting em yu mas stadi oltaim na bihainim wanpela sedyul i stret long yu.
5 Taim ol i kirapim yumi long yumi mas stadi moa, ating kwiktaim yumi tokaut olsem yumi gat planti wok long mekim. Tasol nogut yumi giamanim yumi yet. Olsem wanem? Yumi save lusim planti aua long olgeta de long lukim televisen? Yumi redi long lusim sampela samting yumi yet i laik mekim na bai yumi gat taim bilong stadi? Sapos yumi skelim gut ol dispela samting, ating bai yumi save, i gat sampela hap taim long olgeta de yumi ken mekim wok long en bilong mekim stadi.—Ef 5:15, 16.
6 Yumi mas givim bel long stadi long Tok Bilong God. Sapos yumi mekim sampela narapela wok taim yumi stadi, ating dispela stadi bai i no inap helpim gut yumi. Sapos yumi stadi taim yumi kaikai, harim redio, o lukim televisen, ating bai yumi no inap kisim gut ol tok yumi wok long kisim save long en. (1 Ti 4:15) Olsem na yumi mas lusim ol samting i laik pulim nabaut tingting bilong yumi.—Lukim Buk Bilong Skul, pes 9.
7 Pasin bilong stadi long olgeta de na bihainim ol tok bilong Baibel em i bikpela samting, long wanem, long dispela rot Jehova i save stiaim tingting bilong yumi. Putim dispela olsem wanpela mak bilong winim: Wok long putim ol tok yu kaunim i go daun long bel bilong yu. Taim rot i op, kaunim ol buk, na lukim gen ol tok yu kaunim, na tingim gut long bel ol samting bilong spirit.—Lo 6:6-8; Kl 1:9, 10.