Wanpela Bikpela Samting Tru i Bin Kamap
1 Papa bilong Jisas i salim em i kam long graun bilong autim tok i tru em inap helpim yumi long kisim laip oltaim. (Jo 18:37) Em i stap gut long God inap long em i dai na dispela i givim biknem long Jehova, mekim nem bilong God i kamap holi, na baim bek olgeta man. (Jo 17:4, 6) Olsem na i dai bilong Jisas em i nambawan bikpela samting i bin kamap long graun.
2 Kirap long taim God i wokim Adam, i gat tupela man tasol i bin i stap long graun ol i nambawan olgeta. Adam inap helpim olgeta pikinini bilong em, ol i no kamap yet, long kisim planti gutpela samting. Tasol em i bikhet, olsem na hevi na dai i painim ol. Taim Jisas i kam long graun, em i stap gut long God na bihainim tru olgeta tok bilong em, na dispela i opim rot bilong ol man i bilip i ken kisim laip oltaim.—Jo 3:16; Ro 5:12.
3 No gat narapela samting i winim i dai bilong Jisas. I dai bilong em i bin senisim i stap bilong olgeta man, na i opim rot bilong planti bilion manmeri i ken kirap bek. Na i dai bilong Jisas i opim rot na bai wanpela Kingdom bilong oltaim i ken pinisim pasin nogut na kamapim Paradais long graun, na pinisim olgeta samting i save kalabusim na mekim nogut long ol man.—Sng 37:11; Ap 24:15; Ro 8:21, 22.
4 Ol dispela samting i helpim yumi long save long as na Jisas i tokim ol disaipel bilong em long mekim Memorial long olgeta yia bilong tingim i dai bilong em. (Lu 22:19) Yumi save dispela em i wanpela bikpela samting tru, olsem na yumi wet long bung wantaim ol Witnes Bilong Jehova, long Fraide, Epril 14, taim san i go daun pinis. Paslain long Memorial, gutpela sapos famili i sindaun wantaim na kaunim ol hap bilong Baibel i stori long Jisas i bin sanap strong long tok i tru na long ol samting i bin kamap klostu long taim em i dai. (1995 Calendar, Epril 9-14, i kamapim sampela skripsa yumi ken kaunim.) Jisas i makim gutpela rot yumi ken bihainim long givim bel tru long Man bilong wokim yumi. (1 Pi 2:21) Yumi mas wok strong long singautim ol pren na famili, na ol Baibel-stadi na ol man i laik harim tok, long kam long dispela bikpela bung. Paslain long Memorial, stori wantaim ol long ol samting bilong Memorial na long bret na wain i makim wanem samting.—1 Ko 11:23-26.
5 Paslain long Memorial, ol elda i mas stretim rot bilong lukautim wok bilong klinim na stretim gut Haus Kingdom. Ol i mas lukautim wok bilong kisim bret na wain na stretim gut wok bilong tilim. Wastaua, Mas 1, 1985, pes 20, i kamapim sampela gutpela tok bilong mekim gut Kaikai Bilong Bikpela. Gutpela sapos kongrigesen i stretim rot bilong ol brata sista i ken autim tok sampela de paslain long Memorial na sampela de bihain long en.
6 Long yia i go pinis, inap 12,288,917 long olgeta hap ol i bung bilong tingim dispela bikpela samting. Em nambawan bikpela de long yia, olsem na yumi olgeta i mas kam long dispela bung.