Stap Wanbel Long Kingdom
1 Kingdom bilong God em wanpela gavman tru, na i gat strong na namba. Tok bilong Kingdom em i nambawan bikpela tok Jisas i autim. (Mt 4:17) Wok bilong autim tok na lainim ol man long Kingdom, em nambawan bikpela wok Jisas i mekim. Em i lainim yumi long beten long Kingdom i mas i kam na yumi mas tingim Kingdom pastaim. (Mt 6:9, 10, 33) Sapos yumi stap klostu long Jehova na long oganaisesen bilong em, na inapim tru wok autim tok yumi mas mekim, na yumi no insait long ol wok bilong dispela graun, dispela bai helpim yumi long stap wanbel long Kingdom. Long maus na long wokabaut bilong yumi, yumi kamapim klia yumi helpim ol samting bilong Kingdom.—Jo 18:37.
2 Kirap long 1914, Kingdom i kamap wanpela samting tru long planti milion manmeri i stap aninit long en. Ol i pas gut wantaim na stap wanbel—ol manmeri bilong dispela graun i no stap olsem; ol i bruk bruk nabaut. Bilong Kingdom i ken helpim yumi long stap wanbel tru, yumi mas bilip tru long en. Wanem samting i mekim na Kingdom i samting tru long yumi?
3 Wankain long ol narapela gavman, Kingdom i gat ol lo bilong en. Tasol Kingdom i narapela kain, long wanem, ol lo bilong en i kam long Baibel. Oltaim yumi mas kaunim Baibel bambai yumi ken save long ol samting yumi mas mekim. Sapos yumi stadi long ol samting yumi kisim long ‘gutpela wokboi,’ dispela bai helpim yumi long bihainim ol lo bilong God long olgeta de. (Mt 24:45) Taim yumi wok long bihainim, dispela bai helpim yumi long bilip moa long Kingdom, na pas gut moa wantaim bikpela lain brata bilong yumi long olgeta hap, na stap olsem wanpela famili i wanbel long lotuim Jehova aninit long wok king bilong Jisas.
4 Autim Tok Bilong Kingdom na Stap Wanbel: Yumi mas autim gutnius bilong Kingdom “i go inap long olgeta hap bilong graun.” (Ap 1:8) Yumi “stap wanbel” long autim tok na dispela i helpim yumi long stap wanbel long “litimapim” nem bilong Jehova. (Ro 15:5, 6) Yumi mekim bikpela wok wantaim ol wanwok bilong yumi long olgeta hap bilong graun, na dispela i strongim bilip bilong yumi na i larim spirit bilong Jehova i mekim wok long yumi long kamapim laik bilong em. Sapos yumi “wok strong long mekim wok bilong Bikpela,” dispela bai helpim yumi long “i stap strong, na i no ken surik liklik.”—1 Ko 15:58.
5 Long planti kantri Satan i wok long pasim wok bilong autim tok—em i laik brukim lain bilong yumi. Em i wok long bagarapim pasin wanbel bilong yumi; em i laik bai narapela i kisim tingting kranki long narapela na bel nogut na tok pait long narapela. (Snd 6:19; Ga 5:19-21, 26) Em i laik bai yumi insait long ol hevi na kros bilong dispela graun, na insait tu long ol samting bilong politik na bilong helpim sindaun bilong ol man. (Je 3:14-16) Baibel i tok yumi mas sakim ol samting Satan i mekim bilong pulim yumi. (1 Pi 5:8, 9) Oltaim Kingdom i mas i stap olsem samting tru long bel na long tingting bilong yumi.
6 Bilong stap wanbel, yumi mas tingting gut na bihainim gutpela save i kam long God. Taim hevi i kamap namel long yumi, yumi mas bihainim ol gutpela pasin spirit holi i as bilong en, na bai yumi ken i stap wanbel wantaim ol brata. Ol pasin bilong dispela graun, olsem pasin antap, na bel nogut long narapela, na litimapim nem bilong yumi yet, ol dispela pasin inap brukim lain na yumi mas lusim. (Ef 4:1-3; Kl 3:5-10, 12-14) Yumi mas tingting long ol gutpela samting tasol. Kingdom em samting tru long yumi! Tasol yumi mas wok strong bambai Kingdom i ken i stap olsem!—Ef 6:11, 13.
7 Yumi wetim Kingdom na bilip tru long en—dispela i mekim na yumi stap wanbel tru, na yumi inap i stap olsem i go inap oltaim oltaim.—Sng 133:1.