Bihainim Jisas na Stap Olsem Lait
1 Jisas i tok: “Mi yet mi lait bilong graun.” Ol disaipel bilong Jisas i bihainim em, na ol tu ol i “lait bilong graun.” (Mt 5:14) Na Jisas i tok, olgeta man i bihainim em ol bai “i gat lait bilong laip.” (Jo 8:12) Olsem na yumi stap lain bilong givim lait bilong spirit long ol man, na yumi no ken larim wanpela samting i pasim dispela lait.
2 Oganaisesen bilong Jehova i skulim gut yumi long pasin bilong stap olsem lait. Sapos yumi bihainim gut ol tok yumi kisim, bai yumi inap helpim olgeta kain kain man long kisim stretpela save long tok bilong Kingdom. (1 Ti 4:6) Yumi stap olsem lait, olsem na long olgeta taim yumi gat rot yumi mas autim tok i tru na bihainim stretpela pasin Kristen. Jisas, em Gutpela Piksa bilong yumi, em i bihainim gut stretpela pasin. Yumi lain bilong em, olsem na yumi tu yumi mas bihainim pasin Kristen long olgeta samting yumi mekim. (Ef 5:9; Ta 2:7, 8, 10) Yumi mas mekim ol gutpela wok ol man inap lukim, na bai ol i litimapim nem bilong God.—Mt 5:16.
3 Wanpela Witnes i raun autim tok long ol haus na em i bungim tupela marit ol i gat bikpela sik; ol i mas bringim sampela mani i go long beng. Ol i askim dispela Witnes long mekim, na em i tok em inap, na ol i givim K2,353 long em na em i go putim long beng! Taim em i kam bek, em i askim ol: “Yupela i no save long mi, na olsem wanem yupela save mi no ken stilim dispela mani?” Ol i tok: “Olgeta man, na mipela tu, i save yupela ol Witnes Bilong Jehova i no save stil.” Yumi amamas olsem pasin bilong bihainim gut ol stretpela lo bilong Baibel i givim biknem long God!
4 Wanpela tisa long komyuniti-skul i tokim klas long wanem as na wanpela Witnes i gat 6-pela krismas em i no wokim ol piksa bilong ol samting bilong Halowin. Tisa i tok em i amamas long dispela meri, long wanem, meri i sanap strong long samting em i bilip long en na em i no pret long i stap narapela kain. Tisa i tok, sapos yumi bilip strong long wanpela samting, yumi mas strongim bel na bihainim—no ken pret. Long dispela nait stret, tisa i skelim ol bilip bilong em yet, na em i save, em i no bin sanap strong olsem dispela meri i bin mekim. Long de bihain, em i tokim klas, bai em i no strong na klas i mas insait long ol samting bilong ol bikpela de i kamap bihain—sampela bilong ol dispela de em yet i no bilip long en!
5 Maski lain bilong Jehova i stap we, ol i laik tru long givim lait i go long ol man. Ol wanskul na ol tisa ol i pilim tru stretpela pasin bilong ol yangpela long skul. Ol Witnes i bikpela pinis na i mekim stretpela pasin, ol i kirapim ol narapela long litimapim tok bilong Kingdom. Taim yumi autim tok long kain kain taim na ples, dispela i save kirapim ol man i gat gutpela bel long kisim sampela save moa. Na taim yumi wok strong na bihainim stretpela pasin long ples wok, ol man i save long dispela samting na ol i laik harim tok. Tru tumas, maski yumi stap we o mekim wanem, yumi inap kirapim ol man long kisim save long tok i tru.
6 Sapos yumi tingim na bihainim stretpela pasin bilong Gutpela Piksa bilong yumi, dispela bai helpim yumi long mekim gut wok bilong “givim lait long olgeta man.”—Mt 5:15; 1 Pi 2:21.