Rivyu Bilong Skul Bilong Wok Autim Tok

Rivyu bilong ol tok i bin kamap insait long Skul, kirap long Janueri 1 i go inap long Epril 22, 1996. Long narapela hap pepa, traim raitim planti bekim insait long taim bilong mekim rivyu.

[Harim: Long taim bilong mekim rivyu long Skul, yu ken lukim Baibel tasol bilong helpim yu long bekim ol askim. Long pinis bilong ol askim i gat mak bilong ol buk samting, na taim yu kisim dispela pepa i go long haus paslain long taim bilong mekim rivyu, yu ken lukim ol dispela buk samting bilong helpim yu long raitim stret ol bekim bilong rivyu long Skul. Sampela taim ol i no putim namba bilong pes na paragraf bilong Wastaua.]

Makim ol dispela tok I Stret o I No Stret:

1. Sapos wanpela Kristen i pilim olsem samting em i mekim i stret, ol samting em bai mekim i kamap gutpela. (Snd 14:12) [2, uw p. 8 par. 8(2)] I No Stret. Taim Kristen i mas mekim wanpela samting em i mas bihainim tok bilong Baibel​—⁠em i no ken mekim tasol samting em i pilim i stret; dispela inap giamanim em.

2. Ol lotu i gat nem Kristen i kirapim bilip long God Triwan. [7, uw p. 15, par. 8] I No Stret. Pastaim tru ol Babilon na ol Isip na ol Hindu na Budis i bin skulim ol man long bilip long God Triwan; ol lotu i gat nem Kristen i kirap bihainim dispela bilip giaman long yia 350 samting.

3. Maski Lo Bilong Moses i pinis, Baibel i no mekim wanpela tok olsem ol Tenpela Lo tu i pinis. [15, rs p. 385 par. 2] I No Stret. Long Rom 7:​6, 7, Pol i kamapim tok bilong namba 10 lo na em i kolim dispela lo wantaim Lo i no pasim moa ol Kristen bilong lain Juda.

4. Taim yumi skelim Rom 8:16 wantaim Rom 1:​7, yumi save Pol i tingim olgeta manmeri i olsem “Pikinini bilong God.” [17, uw p. 26 par. 12(3)] I No Stret. Taim yumi lukim ol tok i stap klostu long Rom 8:16 yumi ken save ol “pikinini” hia em ol Kristen God i makim long spirit holi, na i no olgeta manmeri, na Rom 1:7 i kamapim dispela klia tru.

5. Kontrak Jeremaia 31:​31, 33 i stori long en, em kontrak bilong Kingdom Jisas i mekim wantaim ol disaipel bilong em, em God i makim ol long spirit holi. [13, si Mas 25 par. 38] I No Stret. Jeremaia 31:​31, 33 i stori long nupela kontrak, em i no stori long kontrak bilong Kingdom.

6. Buk Krai i gat faipela singsing long en, long fopela singsing namba wan leta bilong olgeta ves i bihainim stret ebisi bilong tok Hibru. [14, si Epril 1 par. 6] I Stret.

7. Bihain long kirap bek bilong em Jisas i bin kamap ples klia long ai bilong ol disaipel tasol. [1, rs p. 196 par. 3] I Stret.

8. Ol Kristen tru i bilip long ofa bilong Krais na ol i no tingting long kamap stretpela man long wok bilong ol yet, na long dispela rot ol i go insait long malolo bilong God. (Hi 4:10) [17, rs p. 387 par. 2] I Stret. Maski ol i wok strong long lainim na bihainim olgeta tok bilong Pikinini bilong God, ol i save ol i no inap kamap stretpela man na mekim ol wok bambai God i mas orait long ol.

9. Tok bilong Kamapim Tok Hait 20:​5, i stori long “ol arapela manmeri i dai pinis” ol i kisim laip, na dispela tok i makim ol narapela sipsip i kirap bek long graun. [6, rs p. 200 par. 2–p. 201 par. 3] I No Stret. Dispela tok i no makim ol manmeri God i makim long spirit holi o kirap bek hia long graun. Nogat. Em i makim ol narapela sipsip i kamap gutpela olgeta long pinis bilong wan tausen yia.

10. Taim Jisas i bekim askim bilong wanpela man long wanem lo em i namba wan, Jisas i no kolim wanpela bilong ol Tenpela Lo. (Mt 22:​35-40) [14, rs p. 385 par. 1] I Stret.

Bekim ol dispela askim:

11. Bikpela pasin sori bilong Jehova i kirapim em long salim Pikinini bilong em i kam na lusim laip bilong em bilong helpim yumi, olsem na yumi mas mekim wanem samting bilong makim olsem yumi laikim God? (2 Ko 5:​14, 15) [6, uw p. 14 par. 6] Dispela i mas kirapim yumi long givim laip bilong yumi bilong mekim laik bilong God. (Kain tok olsem em inap)

12. Yumi mas mekim wanem na bai yumi wokabaut long nem bilong Jehova? [9, uw p. 18 par. 14] Yumi mas dediket long em na bihainim tru laik bilong em. (Kain tok olsem em inap)

13. Taim yumi kaunim Buk Krai yumi kisim wanem save long pasin bilong Jehova? (Kra 3:​22, 23, 32) [15, si Epril 8 par. 13, 15] Yumi kisim save olsem Jehova i save mekim pasin sori na pasin marimari long ol man i tanim bel, tasol em i save givim bikpela strafe long ol man i strong long mekim pasin bikhet. (Kain tok olsem em inap)

14. Planti taim Baibel i mekim wanem tok bilong makim Esekiel na Krais Jisas? [16, si Epril 15 par. 2] Inap 90 taim Baibel i kolim Esekiel olsem “pikinini bilong man”; na klostu inap 80 taim Baibel i kolim Jisas olsem “Pikinini Bilong Man.”

15. Bilong wanem i stret yumi bilip olsem ol man i kirap bek long graun, kot bai skelim ol long ol pasin ol bai mekim long bihain. (Ro 6:⁠7) [5, rs p. 200 par. 2] Long wanem dai bilong ol i olsem pe bilong ol sin ol i bin mekim bipo. (Kain tok olsem em inap)

16. Wanem fopela samting i helpim lain bilong Jehova long i stap wanbel long nau? [2, 3, uw p. 8-9 par. 8, 9) (1) Yumi olgeta i lotuim Jehova na yumi save i stret em i mas makim wanem samting i gutpela na wanem samting i nogut. (2) Yumi gat Baibel bilong soim rot long yumi. (3) Yumi olgeta i save kisim wankain kaikai bilong spirit. (4) Krais Jisas em i Hetman bilong yumi. (5) Yumi wetim Kingdom bilong God, em tasol inap helpim ol man. (6) Spirit holi i kamapim ol gutpela pasin long ol man i lotuim Jehova na ol dispela pasin i helpim ol long i stap wanbel. (7) Yumi olgeta i gat wok long autim dispela gutpela tok bilong Kingdom bilong God. (Fopela em inap; kain tok olsem em inap)

17. Bilong wanem i stret yumi tok ol samting i kamap taim Jisas i kam bek em samting i kamap insait long bikpela hap taim? (Mt 24:​37-39) [8, rs p. 183 par. 1] Ol samting i bin kamap long taim bilong Noa i kamap insait long bikpela hap taim na Jisas i tok, taim em i kam bek na i stap, wankain pasin tasol bai i kamap. (Kain tok olsem em inap)

18. Jehova i gat ol bikpela pasin olsem pasin sori, na pasin i stret, na gutpela stretpela tingting, na bikpela strong. Tasol yumi inap kisim wanem save moa long gutpela pasin bilong em taim yumi skelim Kisim Bek 34:​6, Song 86:​5, na Aposel 10:​34, 35? [5, uw p. 13 par. 3] Jehova em i as bilong marimari na sori, em i no save belhat kwik na em i save bihainim tok bilong em; em i gutpela tru na em i save rausim sin bilong yumi; em i laikim olgeta lain man. (Kain tok olsem em inap)

19. Taim yumi skelim pinis Jon 14:​9, 10 wantaim Luk 5:​12, 13, olsem wanem na yumi ken tok Jehova em i gat bikpela pasin sori long ol man bilong dispela graun i karim hevi? [12, uw p. 25 par. 12(1)] Jisas i kamapim gut tru ol pasin bilong Jehova yet; Jisas i mekim ol samting olsem Papa bilong em i bin skulim em na em i mekim wok bilong Papa. (Kain tok olsem em inap)

20. Bilong wanem ol Kristen i no aninit long lo bilong de Sabat bilong olgeta wan wan wik? (Ro 10:⁠4) [12, rs p. 382 par. 2–p. 383 par. 1] Lo Bilong Moses, em lo bilong de Sabat i insait long en, em i wanpela kontrak namel long Jehova na ol Israel, em i no wanpela kontrak namel long Jehova na ol Kristen. Ofa bilong Krais em i gutpela olgeta na em i pinisim dispela Lo. (Kain tok olsem em inap)

Raitim wanem hap tok i stret bilong pinisim ol dispela tok:

21. Ebetmelek i makim bikpela lain bilong ol narapela sipsip, em ol bai winim Armagedon, long wanem, ol i bin poromanim na helpim lain remnan bilong ol brata bilong Krais. [9, Hap bilong Baibel yumi kaunim long olgeta wik; lukim w82-E 10/1 p. 27 par. 11.]

22. Baibel i kolim Jisas olsem wanpela god, tasol long Jon 17:3 em i tokim Jehova “yu wanpela tasol yu God tru,” na long Jon 20:17 em i kolim Jehova olsem “God bilong mi na God bilong yupela.” [8, uw p. 18 par. 12]

23. Ol samting Jeremaia 52:​5-11 i stori long en i bin kamap long yia 607 paslain long Krais. [13, Hap bilong Baibel yumi kaunim long olgeta wik; lukim w88 11/1 p. 15 par. 18.]

24. Taim Kamapim Tok Hait 1:7 i tok “olgeta man bai lukim em long ai bilong ol yet” dispela tok i no makim samting ol man bai lukim long ai tru, nogat; dispela tok i makim ol man bai save em i kam bek. [10, rs p. 185 par. 1]

25. Bihain long kirap bek bilong Jisas em i save kamap long ol disaipel long narapela narapela bodi bilong graun, ating em i mekim olsem bilong helpim ol disaipel long save tru nau em i wanpela spirit, olsem na sampela taim ol poroman tru bilong em ol i no bin luksave kwik long em. [2, rs p. 197 par. 1]

Makim wanem tok i stret:

26. Baibel em i tok bilong God, long wanem, (ol man bilong tanim tok i tok olsem; ol man i givim bel long God ol i bin raitim, God yet i bin stiaim ol man long raitim). [10, uw p. 20 par. 2]

27. Sapos yu kaunim (wanpela, tupela, fopela) pes tasol bilong Baibel long olgeta de, bai yu inap kaunim Baibel olgeta insait long (sikspela mun, nainpela mun, wanpela yia). [11, uw p. 24 par. 9]

28. Taim Lo Bilong Moses i pinis, em ol Tenpela Lo i hap bilong en, i no olsem olgeta lo na tambu i pinis, long wanem, ol Kristen (bai kamapim sampela nupela lo i stret long ol yet; bai bihainim maus bilong bel bilong ol yet; i gat Ol Skripsa Grik em ol i kolim gen planti tambu i bin stap long Tenpela Lo). [16, rs p. 386 par. 2]

29. Jehova i “grisim” Jeremaia long (autim tok long bikpela bagarap bai painim ol man; mekim wanpela wok em i no inap mekim long strong bilong em yet; wanem em i no kamapim dispela bagarap em i tokim Jeremaia long autim tok long en). (Jer 20:⁠7) [3, Hap bilong Baibel yumi kaunim long olgeta wik; lukim w89-E 5/1 p. 31.]

30. Wanpela tok Grik i stap long Jon 5:28 na ol i tanim olsem matmat, em i makim (matmat bilong ol wan wan man; matmat olsem ples olgeta man i dai pinis i go long en; God i tingim man i dai pinis). [7, rs p. 201 par. 4]

Putim wanem skripsa i stret long ol dispela tok: Snd 3:​5, 6; Jer 23:33; 32:​9, 10; Kra 3:44; KTH 15:​3, 4

31. As tru na yumi i stap wanbel long lotu em i olsem: Yumi save long Jehova na bihainim stretpela pasin bilong em. [KTH 15:​3, 4] [1, uw p. 5 par. 1]

32. Maski yumi stap we we o yumi mekim wanem samting, wokabaut bilong yumi i mas kamapim bel bilong yumi olsem yumi tingim God pastaim. [Snd 3:​5, 6] [4, uw p. 10 par. 11]

33. Jehova i no save harim beten bilong ol man nogut. [Kra 3:44] [15, Hap bilong Baibel yumi kaunim long olgeta wik; lukim w87-E 7/15 p. 15.]

34. Strongpela tok profet bilong God i kam long Baibel em i gat hevi long en, long wanem, em i tokaut olsem klostu nau God bai bagarapim ol lotu i holim nating nem Kristen. [Jer 23:33] [4, Hap bilong Baibel yumi kaunim long olgeta wik; lukim w94 3/1 p. 12 par. 18, 20.]

35. Taim yu mekim wok bisnis wantaim wanlotu bilong yu, yupela mas raitim kontrak na bai hevi i no ken kamap long bihain. [Jer 32:​9, 10] [7, Hap bilong Baibel yumi kaunim long olgeta wik; lukim w95 5/1 p. 30.]