Sapta 1

Stap Wanbel Long Lotu—Dispela i Mas Mekim Wanem long Yu?

LONG olgeta hap bilong graun bikpela lain ol i stap wanbel long lotu. Ol dispela manmeri i bilong olgeta lain na olgeta tok ples. Olsem wanem na ol inap i stap wanbel long lotu? Ating narapela i no gat tok long narapela maski ol i gat wanem kain bilip o pasin bilong ol i no stret wantaim Baibel? Nogat. I no olsem. Orait, olsem wanem na ol dispela man bilong kain kain lain ol inap i stap wanbel long lotu? Ol i kisim save long Jehova, em wanpela tasol em i God tru, na ol i wok long stretim pasin bilong ol na bihainim stretpela pasin bilong Em.—Lukim Revelesen 15:3, 4.

² Dispela samting i truim wanpela tok profet Maika i raitim 2,700 yia bipo. Maika i stori long “taim bilong bihain tru” na em i tok: “Planti lain man bai go na ol bai tok: ‘Yupela ol man, yupela kam, na yumi go antap long maunten bilong Jehova na long haus bilong God bilong Jekop; na em bai lainim yumi long ol pasin bilong em, na yumi bai wokabaut long rot bilong em.’ ” (Mai. 4:1, 2, NW)a Yu lukim ol samting i kamap olsem dispela tok profet i makim?

³ Tasol i no olsem wanpela “lain” olgeta bilong wanpela kantri o ples ol i go long haus bilong Jehova bilong lotu long Em. Nogat. Tasol sampela man bilong ol dispela lain ol i mekim olsem. Ol i kisim save long ol gutpela samting God Jehova i laik mekim na ol gutpela pasin bilong Em, na bel bilong ol i pilim tru. Long pasin daun ol i wok long kisim save long ol samting God i tok ol i mas mekim. Ol i mekim beten kain olsem bilong bilipman Devit, em i tok: “Yu God bilong mi, mi laik yu skulim mi gut bai mi bihainim laik bilong yu.”—Sam 143:10.

⁴ Yu laik i stap long dispela bikpela lain ol i lotu long Jehova? Sapos olsem, orait yu bilip tru olsem Jehova i as bilong ol tok yu kisim save long en? Ol samting yu mekim i kamapim dispela bilip bilong yu? Yu bihainim tru ‘rot bilong Jehova’?

Rot Bilong Mekim

⁵ Jehova i laik bai olgeta man na ensel i stap wanbel long lotu. Em i no laik bai sampela i bihainim tok giaman, o ol i paul nabaut long wanem ol i no save long as bilong i stap bilong ol. Bihain olgeta man na ensel i stap laip bai ol i lotu long God tru, Jehova. Yumi wetim dispela taim! (Sam 103:19-22) Pastaim Jehova i mas rausim ol man i sakim em na ol i bagarapim sindaun bilong ol narapela man. Tasol em i save marimari long ol man, olsem na em i givim toksave long ol pastaim. Ol man na meri bilong olgeta hap ol inap stretim wokabaut bilong ol na lusim rot nogut. Olsem na nau long taim bilong yumi, wanpela lain i autim tok long olgeta hap, olsem: “Yupela i mas pret long [God] na litimapim nem bilong em. Yupela i mas lotu long God, em i bin wokim heven na graun na solwara.” (Re. 14:6, 7) Yu bihainim dispela tok? Sapos olsem, orait nau yu inap wok wantaim lain bilong Jehova na helpim ol narapela man long bihainim.

⁶ Jehova i laik kisim wanem kain man i kam long lain bilong em? Em i no laikim ol man i save maus nating tasol na ol i tok ol i bilip long Em na ol i laik i stap oltaim long Paradais, tasol ol i bihainim laik bilong ol yet. Em i laik bai ol manmeri i kisim “save long laik bilong em” na ol i bihainim dispela laik bilong em. (Kl. 1:9, 10) Ol man i pilim tru ol dispela samting, taim ol i kisim save pinis long ol as tok bilong Baibel, ol i laik kamap strongpela Kristen. Ol i laik save gut long Jehova na ol tok bilong Em long Baibel na ol i laik bihainim gut ol dispela tok. Ol i laik kamap wankain olsem Papa bilong ol long heven, olsem ol i laik kisim pasin na tingting bilong Em. Olsem na ol i wok strong long painim rot bambai ol i ken insait long wok bilong Em nau long graun. Yu mekim olsem?—Ef. 5:1; Hi. 5:12–6:3; 1 Ti. 4:15.

⁷ Baibel i tok ol manmeri i lotuim Jehova ol i mas pas gut wantaim na i stap wanbel. (Ef. 4:1-3) Maski ol lain man i bruk bruk na yumi hatwok long daunim ol pasin kranki bilong yumi yet, tasol yumi inap i stap wanbel. Jisas i beten bambai ol disaipel bilong em ol i ken i stap wanbel tru. Olsem wanem ol inap i stap wanbel? Ol i mas pas tru long Jehova na long Pikinini bilong em. Na ol yet i mas pas gut wantaim. (Jon 17:20, 21) Na long nau yumi stap olsem, long wanem yumi bihainim ol tok i kam long “haus” bilong Jehova.

Wanem Samting i Helpim Yumi Long i Stap Wanbel?

⁸ Long daunbilo i gat lista bilong sampela bikpela samting i helpim yumi long i stap wanbel. Taim yu bekim ol askim hia, yu mas tingting olsem: Dispela samting i helpim mi olsem wanem na mi inap pas gut wantaim Jehova na ol brata Kristen? Sapos yu tingim gut ol dispela askim na yu kaunim ol skripsa ol i raitim long hia, dispela bai helpim yu long kisim pasin bilong tingim God pastaim na kisim gutpela tingting. Yumi olgeta i mas kisim dispela pasin. (Pro. 5:1, 2; Fl. 1:9-11) Orait, nau yu ken skelim ol dispela tok:

(1) Yumi olgeta i lotuim Jehova na yumi save i stret em i mas makim wanem samting i gutpela na wanem samting i nogut.

Sapos long laik bilong yumi yet yumi sakim tok bilong Jehova long wanpela samting yumi ting em i liklik samting tasol, Jehova bai ting olsem wanem? (Luk 16:10; skelim tu Malakai 1:6-8.)

Sapos sampela taim yumi sakim tok bilong Jehova, yu ting dispela i save nogutim ol narapela man? (Skelim Rom 5:12; Josua 7:20-26; 1 King 14:16.)

(2) Maski yumi stap we we, yumi gat Baibel, em Tok Bilong God, bilong soim rot long yumi.

Taim yumi mas skelim wanpela samting yumi laik mekim, bilong wanem yumi no ken mekim tasol samting yumi ‘pilim’ i stret? (Jer. 17:9; Pro. 14:12)

Sapos yumi no save Baibel i tok wanem long wanpela samting, yumi mas mekim wanem? (Pro. 2:3-5)

(3) Yumi olgeta i save kisim wankain kaikai bilong spirit.

Olsem wanem long ol manmeri ol i no tingim ol samting Jehova i mekim bilong givim kaikai bilong spirit long yumi? (Skelim Aisaia 1:3; 9:16; 65:14.)

(4) Krais Jisas em i Hetman bilong yumi, i no wanpela man bilong graun, na yumi olgeta i save lotu long Jehova long rot bilong em.

I gat wanpela as tru na yumi ken ting yumi winim ol narapela man? (Rom 3:23, 24; 12:3; Mt. 23:8-10)

(5) Maski yumi stap we we, yumi save wetim Kingdom bilong God. Yumi save dispela Kingdom tasol inap helpim ol man.

Dispela samting i helpim yumi olsem wanem na lain bilong yumi i no bruk bruk? (Mt. 6:9, 10; Mai. 4:3)

(6) Spirit holi i kamapim ol gutpela pasin long ol man i lotuim Jehova na ol dispela pasin i helpim ol long i stap wanbel.

Yumi mas mekim wanem na bai spirit bilong God inap kamapim ol gutpela pasin long yumi? (Sam 1:2; Pro. 22:4; Re. 3:6; Ap. 5:32)

Sapos yumi gat ol dispela gutpela pasin, dispela i helpim yumi olsem wanem long i stap gut wantaim Jehova? na i stap gut wantaim ol brata? (Ga. 5:22, 23)

(7) Yumi olgeta yumi gat wok long autim dispela gutpela tok bilong Kingdom bilong God.

Sapos yumi wok strong long autim tok wantaim ol brata Kristen, olsem wanem dispela bai helpim yumi long kisim gutpela tingting long ol? (Skelim Kolosi 4:7, 11.)

⁹ I no hatwok tumas long yumi save long ol dispela samting, tasol i hatwok liklik long bihainim. Tasol sapos yumi bihainim, bai yumi pas tru wantaim Jehova. Taim yumi bung wantaim ol brata Kristen bilong yumi, yumi save amamas. I olsem Sam 133:1 i tok: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas.” Taim yu lusim ol man bilong olpela pasin na yu bung long ol miting wantaim ol manmeri i givim bel tru long Jehova, yu pilim em gutpela tumas, a?

Klia Long Ol Samting i Laik Brukim Lain

¹⁰ Bilong holimpas dispela gutpela pasin bilong i stap wanbel, yumi mas abrusim olgeta samting i laik brukim lain bilong yumi. Wanpela samting em pasin bilong bihainim tingting bilong yumi yet. Jehova i laik helpim yumi long abrusim dispela pasin, olsem na em i kamapim long ples klia as bilong en, em Seten. Seten i giamanim Iv na Iv i ting sapos em i sakim tok bilong God na em yet i skelim ol samting em i laik mekim, dispela bai helpim em. Adam i bihainim pasin bikhet bilong em. Pasin bikhet bilong tupela i bagarapim tupela yet na yumi tu. (Jen. 2:16, 17; 3:1-6, 17-19) Nau pasin bikhet i pulap tru long graun, olsem na yumi mas was gut, nogut yumi bihainim dispela pasin. Jehova i sori long yumi na em i helpim yumi. Em i givim ol gutpela tok long yumi long rot bilong oganaisesen bilong em.

¹¹ Long rot bilong dispela oganaisesen yumi kisim save long gutpela tok promis bilong Jehova, em bai pinisim dispela pasin bilong nau na kamapim nupela heven na nupela graun, “na bai stretpela pasin tasol i stap long en.” (2 Pi. 3:13) Yumi amamas tru, long wanem liklik taim tasol na bai dispela pasin nogut bilong nau i pinis na bai graun i kamap gutpela ples Paradais. Tasol olsem wanem long ol samting yumi mekim? Wokabaut bilong yumi i makim olsem yumi laik i stap long dispela nupela taim i gat stretpela pasin tasol long en? Baibel i tok klia: “Yupela i no ken laikim pasin bilong graun, na olgeta samting bilong graun. Sapos wanpela man i laikim pasin bilong graun, orait em i no save laikim tru Papa.” (1 Jon 2:15) Tru, i gat planti pasin bilong dispela graun yumi no laikim. Tasol nogut yumi nolaik tasol long ol samting i save pasim yumi long inapim laik bilong yumi. Olsem wanem? Yumi save givim baksait long ol tingting bilong dispela graun, olsem pasin bilong bikhet na bihainim tingting na laik bilong yumi yet? Yumi save givim bel long bihainim tok bilong Jehova? Yumi daunim ol laik nogut bilong skin na bihainim laik bilong God? Maski yumi stap we we o yumi mekim wanem samting, orait, wokabaut bilong yumi i mas kamapim bel bilong yumi, olsem yumi tingim God pastaim.—Pro. 3:5, 6.

¹² Jehova i makim pinis taim bilong pinisim pasin nogut bilong dispela graun wantaim olgeta manmeri i save laikim dispela pasin, na Jehova bai mekim long dispela taim stret. Jehova i no ken surikim dispela taim o senisim lo bilong em bambai em i ken helpim ol manmeri i holimpas yet pasin bilong dispela graun, na ol i givim hap bel tasol long kisim save na bihainim laik bilong God. Nau em i taim bilong kirap na mekim wok! (Luk 13:23, 24; 17:32; 21:34-36) Olsem na yumi amamas long lukim ‘bikpela lain manmeri’ ol i wok strong long harim ol tok Jehova i givim long ol long rot bilong oganaisesen bilong em, na ol i stap wanbel, na ol i wokabaut long rot bilong Em!

[Ol Futnot]

STORI GEN LONG OL DISPELA TOK

● Jehova i gat wanem laik long ol man i lotuim em?

● Taim yumi kisim save pinis long ol as tok bilong Baibel, yumi mas i go moa yet na wok strong long mekim wanem?

● Yumi stori pinis long ol samting i helpim yumi long i stap wanbel, orait ol dispela samting i mas kirapim yumi olgeta wan wan long mekim wanem?

[Askim Bilong Stadi]

1, 2. (a) I gat wanem as na sampela man i stap wanbel tru long lotu nau long taim bilong yumi? (b) Baibel i stori olsem wanem long dispela samting?

3, 4. (a) Olsem wanem na yumi ken tok, sampela “lain” ol i tanim bel i go long Jehova? (b) I gat wanem ol askim yu mas tingim?

5. (a) Bihain bai husat ol i stap wanbel long lotu? (b) Bilong wanem nau ol man i mas tanim bel hariap na kamap man bilong lotuim Jehova? Olsem wanem yumi ken helpim ol narapela man long kirap na lotuim Jehova?

6. Taim yumi kisim save pinis long ol as tok bilong Baibel, nau yumi mas wok strong long mekim wanem samting moa?

7. Olsem wanem yumi inap i stap wanbel tru long nau? Bilong i stap olsem, yumi mekim wanem?

8. (a) Taim yumi gat sampela askim i sutim yumi yet na yumi lukim Baibel bambai yumi ken tingim bekim bilong ol dispela askim, dispela i helpim yumi olsem wanem? (b) Bekim ol askim i stap long dispela paragraf na skelim ol samting i save helpim yumi long i stap wanbel.

9. Taim yumi bihainim ol dispela tok i tru, dispela i mekim wanem long yumi?

10. Bilong wanem yumi mas was gut, nogut yumi bikhet na bihainim tingting bilong yumi yet tasol?

11. Yumi mas mekim wanem na dispela bai makim olsem yumi laik tru long i stap long Nupela Taim God bai kamapim?

12. (a) Bilong wanem yumi mas kirap nau na kisim save long rot bilong Jehova na bihainim dispela rot long olgeta wokabaut bilong yumi? (b) Yumi yet yumi mas ting olsem wanem long ol tok bilong Baibel dispela paragraf i makim?