Mekim Tok Tru Long Ol Narapela
1 Wanpela bilong tupela nambawan lo, i olsem: “Yu mas laikim ol [narapela] olsem yu laikim yu yet.” (Mt 22:39) Dispela pasin bilong laikim ol narapela i mas kirapim yumi long helpim ol man long kisim save long nambawan gutpela samting yumi holim—em ol tok i tru yumi painim pinis long Baibel. Ol Wastaua na Kirap! i save kamapim gut ol tok i tru i stap long Baibel, olsem na wok bilong tilim dispela tupela nius long mun Me, em i wanpela rot bilong yumi ken ‘mekim tok tru long ol narapela.’—Ef 4:25.
2 Yu mas tilim “Kirap!” bilong Epril 8 inap long olgeta i pinis. Yu ken kirapim tok olsem:
◼ “Wanem tingting bilong yu taim yu harim tok olsem bihain bai i no gat pait moa long graun? [Larim man i bekim tok.] Olsem wanem? Yu save ol lotu bilong graun ol i rot bilong kirapim ol man long insait long pait na kilim man i dai? [Larim man i bekim tok.] Tasol lukim dispela samting Baibel i tok ol man i lotu tru long God bai mekim.” Kaunim Aisaia 2:2-4 i stap antap long pes 4 bilong dispela Kirap!, na long pes 10, kaunim paragraf aninit long het-tok, “Singautim Ol Man i Laikim Tumas Bel Isi.” Orait nau kamapim askim: “Yu save God bai mekim wanem bilong kamapim dispela samting? Bekim bilong dispela askim i stap long dispela nius. Pe bilong en, em 30 toea tasol.”
3 “Wastaua” bilong Epril 15 i stori long “I Gat Wanem As na Lotu Tru i Kisim Blesing Bilong God.” Paslain long tilim, yu ken mekim dispela askim:
◼ “I gat planti handet lotu i stap long graun. Yu ting God i orait long dispela olgeta lotu? [Larim man i bekim tok.] Jisas i tok profet olsem, maski ol man i tok ol i mekim wok bilong God, sapos ol i no bihainim laik bilong God, bai God i sakim ol. [Kaunim Matyu 7:21-23.] Em bikpela samting long yumi mas save long wanem lotu i tru, em lotu Jisas i bin lainim ol man long bihainim.” Opim nius long pes 16, na lukim liklik het-tok “Lotu Tru i Mas Kamapim Wanem Kaikai?,” na stori long wanpela samting lotu tru i mas kamapim.
4 Sapos yu laik mekim liklik tok tasol, yu ken tok olsem:
◼ “Planti man i ting planti nius bilong nau ol man i save amamas long en, ol i stori tumas long ol samting bilong wok bisnis, pasin pamuk, o kros na pait. [Soim Wastaua na Kirap! long man.] Tupela nius hia i gat gutpela tok bilong Baibel i stap long en. Ol i save skulim yumi long planti samting na helpim yumi long lotuim God na laikim ol narapela na bihainim stretpela pasin. Sapos yu laik kaunim kain tok olsem, mi save bai yu amamas long kaunim ol tok i stap long ol dispela nius. Long dispela mun, mipela i wok long tokim ol man long kisim ol dispela nius long rot bilong sabskripsen.” Kolim pe bilong sabskripsen. Sapos man i no laik kisim, tilim tupela nius wantaim buklet, Tewel Bilong Ol Daiman, long K1.00.
5 Sapos yumi givim bel long mekim tok tru long ol narapela, bai yumi inap helpim planti man long kisim bikpela amamas.—Ap 8:4, 8.