Yu Save Autim Stret Tok Bilong God?
1 Krais Jisas em i nambawan bikpela tisa i bin i stap long graun. Pasin bilong em long mekim toktok i bin pulim tingting bilong ol man, na kirapim bel bilong ol, na kirapim ol long mekim ol gutpela wok. (Mt 7:28, 29) Tok Bilong God em i as bilong olgeta tok em i bin lainim ol man long en. (Lu 24:44, 45) Em i tok, olgeta tok em i save long en na givim long ol narapela, em i bin kisim long God Jehova. (Jo 7:16) Jisas i bin autim stret Tok Bilong God na em i stap gutpela piksa tru bilong ol disaipel bilong em i ken bihainim.—2 Ti 2:15.
2 Aposel Pol tu em i gutpela piksa—em i save autim stret Tok Bilong God. Em i no kaunim tasol Tok Bilong God long ol man; em i stori gut long ol tok em i kaunim na autim as bilong en, na em i kolim sampela skripsa bambai ol man i ken save, Jisas em i man God i makim. (Ap 17:2-4) Disaipel Apolos tu em “i save tumas long buk bilong God,” na em i autim stret tok bilong en bilong kamapim klia ol tok i tru.—Ap 18:24, 28.
3 Kamap Tisa Bilong Tok Bilong God: Ol man bilong autim tok bilong Kingdom long nau ol i save kamapim ol tok bilong Baibel na toktok gut wantaim ol man long en, na long dispela rot ol i bin skulim planti man i gat gutpela bel. Olsem: Wanpela brata i bin mekim wok long Esekiel 18:4 na sampela narapela skripsa bilong helpim wanpela pasto na 3-pela wanlotu bilong em long ol i ken save wanem samting tru i painim ol stretpela man na ol man nogut long bihain. Dispela i mekim na sampela wanlotu ol i kirap long stadi, na bihain wanpela i bilip long tok i tru. Na wanpela meri, em man bilong em i birua long tok i tru, em i askim wanpela sista long tokim man bilong em long as na ol Witnes Bilong Jehova i no save mekim Krismas na betde. Taim sista i opim buk Toktok Gut na kaunim ol skripsa bilong dispela samting, man hia em i wanbel long ol tok. Meri bilong man em i amamas tru, na em i tok: “Mipela bai kam long ol miting bilong yupela.” Na man i orait long dispela samting!
4 Mekim Wok Long Ol Helpim: Wok Kingdom Bilong Yumi na program bilong Miting Bilong Wok Autim Tok i save helpim gut yumi long autim stret Tok Bilong God. Planti pablisa i tok tenkyu long kain kain soim ol i kaunim long Wok Kingdom na lukim ol brata i mekim long miting, em ol i gutpela na stret long dispela taim nau. Buk Toktok Gut Wantaim Ol Man Long Baibel i givim planti tingting long yumi long pasin bilong autim stret tok long 70 samting bikpela tok bilong Baibel. Buk Save i Bringim Man Long Laip Oltaim i kamapim sotpela tok long ol bikpela tok bilong Baibel em ol nupela man i mas kisim save long en. Stadi 14 na 15 bilong Buk Bilong Skul Bilong Wok Autim Tok i stori long sampela pasin ol gutpela tisa i save mekim bilong helpim ol long kamapim gut ol skripsa, na kaunim gut, na kamapim gut insait bilong en. Yumi mas mekim gutpela wok long olgeta dispela helpim yumi inap kisim.
5 Taim yumi autim stret Tok Bilong God, bai yumi save olsem “em i gat laip, na em i wok strong i stap . . . na em i save gut tru long olgeta tingting na laik bilong bel” bilong ol man yumi autim tok long ol. (Hi 4:12) Ol gutpela samting i kamap bai kirapim yumi long tokaut strong moa long tok i tru na yumi no pret!—Ap 4:31.