Memorial—Wanpela Bikpela Bung Tru!
1 Long Sande, Mas 23, bihain long taim san i go daun pinis, bai yumi mekim Memorial bilong tingim indai bilong Jisas. (Lu 22:19) Dispela em wanpela bikpela bung tru! Taim Jisas i stap gut long God i go inap long em i dai, em i kamapim klia olsem wanpela man bilong graun inap i stap gut long God maski ol bikpela hevi i painim em, na long dispela rot em i kamapim klia olsem, i stret Jehova i stap nambawan bos. (Hi 5:8) Na tu, Krais i givim gutpela skin olsem ofa bilong baim bek ol manmeri, na dispela i opim rot bilong ol manmeri i bilip long em long kisim laip i stap oltaim. (Jo 3:16) Taim yumi kam long Memorial, yumi kamapim klia olsem yumi pilim tru long bel pasin sori bilong Jehova, na tu, ofa Jisas i bin mekim bilong helpim yumi.
2 I gutpela sapos yumi olgeta i kaunim ol tok bilong Baibel olsem kalenda bilong ol Witnes Bilong Jehova bilong 1997 i makim long Mas 18-23. Na tu, sapos famili i stori long ol tok bilong sapta 112-116 long buk Nambawan Man Tru i Winim Olgeta Narapela Man, dispela bai helpim ol long tingim gut dispela nambawan bikpela wik.
3 Olsem wanem? Yu inap lusim sampela aua moa bilong autim tok long mun bilong Memorial? I gat 5-pela Sarere Sande long mun Mas, na planti pablisa i laik mekim bikpela wok long ol dispela Sarere Sande na bai ol i ken insait long wok painia haptaim. I gutpela sapos yu wanpela bilong ol. Yumi olgeta inap insait tru long wok bilong tokim ol man, bilong wanem em i bikpela samting long ol i kam long Memorial. Memorial bai kamap long Sande, olsem na planti man inap i kam. No ken lusim tingting long singautim olgeta Baibel-stadi na ol man i laik harim tok long i kam bung wantaim yumi. Stori wantaim ol long tok i stap long buk Save, pes 127, paragraf 18, em i stori long dispela wanpela de long olgeta yia em yumi mas tingim.
4 Pilim tru ol samting indai bilong Jisas i mekim long yumi na redi long dispela bikpela bung long 1997. Taim ol Kristen tru long olgeta hap ol i bung bilong mekim Memorial long Mas 23, taim san i go daun pinis, yu mas i stap wantaim ol.