Ol Lapun i Save Wok Strong Long Autim Tok
1 Taim ol man i wok long go lapun, planti bilong ol i save tingting long lusim wok mani na ol i no laik hatwok long mekim wanpela samting i go inap long ol i dai. Ating ol i pilim olsem ol i bin mekim bikpela wok pinis na i stret nau ol i mas malolo. O ol i laik mekim tasol ol samting bilong kisim amamas long en i go inap long taim ol i dai.—Lu 12:19.
2 Yumi ol wokman bilong Jehova i dediket pinis long em, yumi gat narapela tingting long i stap bilong yumi. Yumi save, yumi no inap pinis long mekim wok bilong God. Yumi gat stretpela tingting long dispela, long wanem, yumi tingim “laip bilong i stap gut oltaim oltaim.” (Ju 21) Taim man i stap planti yia na lainim planti samting, dispela inap mekim na em bai i gat gutpela save moa. Olsem na em inap kisim planti gutpela tingting na em inap pilim tru ol samting long i stap bilong yumi ol man. Ol dispela gutpela pasin inap helpim tru wanpela wokman bilong autim gutnius.
3 Taim man i go lapun, i no skin tasol i go lapun, nogat; tingting na pasin bilong em tu i senis. Sapos yu tingting long i stap longpela taim, na yu wok strong bambai tingting bilong yu i stap olsem yangpela, ating yu inap long mekim olsem. Taim ol lapun i kisim sampela save moa long ol samting bilong spirit na ol i kamapim long ol narapela, dispela bai helpim ol long i stap amamas.—1 Ko 9:23.
4 Stori Bilong Sampela Lapun: Wanpela sista i gat 86 krismas, em i tok: “Mi bin kisim save long tok i tru inap olsem 60 yia bipo, na taim mi tingting bek long ol dispela 60 yia, gutpela tok promis bilong Jehova i kamap strong long bel bilong mi. Tru tumas, sapos man i bihainim God, bai God i mekim gut long em—em i larim yumi i kisim bikpela amamas olsem man i kisim planti kaikai long gaden na em i amamas.” (Sng 18:25) Wanpela lapun brata i tingim indai bilong meri bilong em na olsem wanem dispela i bin givim bikpela bel hevi long em, na bihain long en bikpela sik i painim em. Em i tok: “Tasol long pasin marimari bilong Jehova, mi kisim bek strong na tupela yia bihain mi inap insait long wok painia. Mi amamas tru long Jehova, long wanem, taim mi mekim bikpela wok moa bilong autim tok, skin bilong mi i kamap orait liklik!”
5 Yumi mas tok amamas long ol lapun, long wanem, i gat planti lapun ol i laik wok strong long autim tok inap long skel bilong ol! I gat gutpela as na ol inap tok olsem: “God, yu bin skulim mi long taim mi liklik yet na i kam inap long nau, na mi save tokaut yet long ol gutpela gutpela samting yu bin mekim.”—Sng 71:17.