“Yupela i Mas Mekim Olsem Bilong Tingim Mi”
1 Taim ol yia i lus, isi isi ol man i save lusim tingting long as tru bilong ol bikpela samting. Olsem na taim Jisas i kirapim ‘kaikai bilong Bikpela,’ em i tokim ol disaipel: “Yupela i mas mekim olsem bilong tingim mi.” Kirap long dispela taim ol Kristen i bung long olgeta yia long de Jisas i bin dai na ol i tokaut long “i dai bilong Bikpela, inap long taim em i kam bek.”—1 Ko 11:20, 23-26.
2 Klostu nau Jisas bai kisim ol laspela hap bilong “liklik lain” i go long heven, em namba bilong ol i wok long i go daun. (Lu 12:32; Jo 14:2, 3) Long dispela yia, long Epril 11, lain remnan em spirit i makim ol na ol manmeri bilong lain “arapela sipsip” em namba bilong ol i wok long i go bikpela, ol bai bung bilong mekim Kaikai Bilong Bikpela. (Jo 10:16; KTH 7:9, 10) Dispela bai helpim yumi long pilim tru bikpela pasin sori bilong Jehova long salim dispela wanpela Pikinini bilong em i kam bilong helpim ol manmeri. Memorial bai kamapim klia gutpela pasin bilong Jisas, pasin bilong em long laikim ol man na i stap gut long God i go inap long em i dai, na wok king bilong em long Kingdom bilong God nau i kamap pinis, na tu, ol blesing Kingdom bai bringim long ol manmeri. Tru tumas, em wanpela bikpela de bilong tingim!
3 Redi Nau: Yumi olgeta i mas mekim ol samting bambai dispela Memorial i ken givim bikpela amamas long yumi yet na ol man i kam bung wantaim yumi. Bilong redim tingting na bel bilong yumi, yumi ken kaunim ol stori long Baibel long ol samting Jisas i bin mekim sampela de paslain long indai bilong em, na ol samting i kamap paslain liklik long taim ol i kilim em i dai. Ating long famili-stadi yumi mekim paslain long Memorial, yumi ken stadi gen long ol tok bilong buk Nambawan Man Tru, sapta 112-116.
4 Hamas man yu save long ol, em ating ol inap kam long Memorial sapos yu strongim ol long pilim tru ol samting bilong dispela bung, na yu singautim ol long kam, na mekim gut long ol taim ol i kam. Wokim lista, na mekim ol samting yu inap mekim bilong helpim ol long kam. Bihain long Memorial, helpim ol long wok yet long kamap strong long ol samting bilong spirit na strongim ol long kam long ol miting long olgeta taim.
5 Long mun bilong Memorial, kongrigesen bai stretim sampela rot bilong helpim olgeta pablisa long mekim bikpela wok autim tok moa. Olsem wanem? Sapos yu stretim gut sedyul bilong yu, inap yu mekim wok painia haptaim long Epril o Me? Wanpela gutpela rot bilong kamapim klia olsem yumi pilim tru olgeta samting ofa bilong Jisas i bin mekim long yumi em olsem: Yumi ken tokim ol man long God bilong yumi, Jehova, na ol blesing em Kingdom bilong Pikinini bilong em bai kamapim.—Sng 79:13; 147:1.