Autim Nem Bilong Jehova Long Olgeta Hap Bilong Graun
1 Taim Jisas i tokim ol disaipel bilong em long autim tok “i go inap long olgeta hap bilong graun,” em i bin i stap olsem piksa bilong ol i ken bihainim. (Ap 1:8) Long olgeta taim na long wanem wanem hap em i bungim ol man, em i save toktok long laik bilong God long ol man. Lain gutpela wokboi i bihainim pasin bilong Jisas na ol i mekim wok long kain kain rot bilong autim nem bilong Jehova long olgeta hap bilong graun.—Ais 12:4, 5.
2 Wok Autim Tok Long Bipo: Long ol yia i go pinis, ol i save putim ol tok bilong Baibel long ol niuspepa; ol i wokim piksa “Photo-Drama of Creation” na soim long planti milion manmeri; ol i mekim wok long ol ka i gat ol bikmaus long en; na ol pikap i gat toktok long en, na inap liklik taim ol i mekim wok long redio—long ol dispela rot ol i bin autim gutnius. Ol i save strongim ol brata sista long ol yet i ken toktok wantaim ol man ol i bungim ol bambai ol i ken mekim gobek long ol man i laik harim tok na helpim ol. Olsem na wok autim tok long ol haus i bin i stap olsem gutpela rot tru bilong kamapim nem bilong Jehova long olgeta hap.—Ap 5:42.
3 Wok Autim Tok Long Taim Bilong Yumi: Ol samting i wok long senis na ol man i save hariap hariap long mekim ol samting, na long planti ples yumi save painim ol man wan wan taim tasol long ol haus. Wan wan man tasol i laik lusim taim long kaunim ol samting bilong spirit na tingting long en. Olsem na yumi mas senisim wok autim tok bilong yumi bambai i stret long ol. Bilong skruim sampela wok moa long autim tok long ol haus na inapim teritori, Sosaiti i strongim yumi long go long hap ol man i stap long en na yumi “mas redi oltaim” long bekim tok long ol man i askim yumi long bilip bilong yumi. (1 Pi 3:15) Dispela i makim olsem yumi mas painim rot bilong autim tok long ol wanwok, ol wanskul, ol man i wokabaut long rot na long ol pak o long ol ples bilong putim ol ka, long ol stua, na long olgeta hap yumi painim ol man long en. Jehova i helpim yumi olsem na wok yumi mekim i kamap gutpela tru. Olsem wanem? Yu insait long wok bilong autim tok long ol man long wanem wanem hap ol i stap long en?
4 Yumi olgeta i mas painim rot bilong autim nem bilong Jehova long olgeta man long teritori bilong yumi. Yumi inap kisim bikpela amamas long mekim tru wok autim tok, na yumi wetim Jehova i pulim ol man i gat gutpela bel i kam.—Jo 6:44.