Gutpela Wok Ol Yangpela Inap Mekim
1 Planti papamama long nau ol inap tingim bek gutpela wok ol i bin mekim taim ol i wok long i go bikpela insait long tok i tru—em wok bilong tilim ol Wastaua na Kirap! Olsem wanem? Taim yu liklik yet yu bin amamas long mekim dispela wok?
2 Helpim Ol Pikinini Bilong Yu Long Autim Tok: Ol pikinini i yangpela yet na ol i no redi long kamapim ol tok bilong Baibel bilong toktok wantaim ol man, ol inap tilim ol magasin long ol man. Bilong mekim olsem, ol i mas lainim wanpela sotpela tok bilong toktok wantaim ol man. Ol inap mekim sotpela tok tasol, ating ol i ken stori long piksa i stap long namba wan pes bilong magasin. Planti man i amamas long kisim ol magasin long ol yangpela bilong yumi, na planti taim ol i tok amamas long gutpela pasin ol dispela yangpela i save mekim. Taim yumi helpim ol, ol pikinini inap mekim gut wok bilong tilim ol magasin, na long dispela rot ol inap helpim wok bilong autim gutnius bilong Kingdom i go long olgeta hap. Taim ol i go bikpela, ol papamama i laik helpim ol long wok strong yet long kamap gutpela moa long pasin bilong autim tok.
3 Manuel i kirap autim tok long ol haus taim em i gat 3-pela krismas. Papamama bilong em ol i bin helpim em long tingim wanpela sotpela tok bilong toktok wantaim ol man long en. Em i givim bel tru long autim tok wantaim ol, na em i tilim planti magasin, buklet, na ol liklik nius. Em i save autim tok tu long kain kain taim na ples. Long wanpela de, taim papamama bilong em ol i kisim em i go long wanpela pak, em yet i kirap long tilim ol liklik nius long ol man i stap long dispela hap. Maski em i liklik yet, pasin bilong Manuel long givim bel long autim tok i strongim tru papamama bilong em na olgeta insait long kongrigesen.—Snd 22:6.
4 Long kalenda bilong ol Witnes Bilong Jehova bilong yia 2000, ol i makim olgeta Sarere olsem “De Magasin.” Yupela ol papamama, mipela i laik bai yupela i kirap gen long givim bel long mekim dispela wok, na helpim ol pikinini bilong yupela long mekim dispela gutpela wok long olgeta taim.