Autim Gutpela Tok—Long Ol Pikinini
1 Long ol miting na long ol bikpela kibung, bai yumi lukim bikpela lain ol yangpela man na yangpela meri na ol manki na ol pikinini tu i wok long litimapim nem bilong Jehova. (Sng 148:12) Dispela samting i mas kirapim bel bilong yumi, na taim yumi autim tok bai yumi no lusim tingting long autim tok long ol pikinini bambai ol tu inap kisim save long Jehova na ol tok promis bilong em. Sapos yumi redi long autim tok long ol pikinini, orait rot bai op long ol i kisim save. I gat sampela samting yumi mas tingim.
2 Yumi mas kisim stretpela tingting long ol pikinini na no ken givim baksait long ol, long wanem ol tu inap kisim save long Jehova na laikim tumas em. Baibel i stori long sampela yangpela long bipo, olsem Samuel na Devit na Timoti, em ol i bin stap gut long Jehova, olsem na yumi save, ol yangpela long nau, maski ol i no gat bikpela krismas, ol tu inap stap gut long Jehova. (1 Sml 2:18; Sng 71:17; 2 Ti 3:14, 15) Planti yangpela long nau ol i mekim olsem.
TAIM YU BUNGIM PIKININI
3 Taim yu autim tok na yu bungim wanpela pikinini, yu save tokim em yu laik toktok wantaim papamama bilong em? Na sapos papamama bilong pikinini i no i stap long haus, yu save lusim dispela haus na i go long narapela haus? Yumi mas tingim laip bilong dispela pikinini tu i bikpela samting. Gutpela sapos yu tingim sampela tok yu ken mekim bambai yu inap autim tok long dispela pikinini tu. Yu ken stori liklik long paradais i laik kamap, o yu ken stori long ol samting i laik kamap long bihain. Dispela samting bai kirapim tingting bilong pikinini na em i laik harim tok. Planti pikinini i save long Beten Bilong Bikpela, na sapos yu stori long insait bilong ol tok bilong dispela beten, bai ol inap save long ol gutpela samting bai kamap long bihain.
4 Taim yumi autim tok long pikinini, yu mas save em wok bilong papamama bilong dispela pikinini long bosim ol samting pikinini i mekim. Yu mas tingting gut taim yu laik tilim wanpela buk samting long pikinini. Askim em, papamama bilong em i orait long em i kisim wanpela buk em i laikim, o nogat? Sapos papamama i tambuim ol long kisim ol buk samting long laik bilong ol yet, orait yu ken autim tok tasol long ol, na sapos ol i laik harim, yu ken makim taim bilong kam bek lukim ol taim papamama bilong ol i stap long haus. Long dispela rot, ating bai yu inap helpim papamama bilong ol dispela pikinini tu.
5 Yumi mas redi long autim tok long kain kain man, olsem na yumi no ken lusim tingting long ol yangpela. Taim yumi autim tok yumi mas karim sampela buk samting em ol yangpela bai amamas long kaunim. Oganaisesen bilong Jehova i bin redim planti gutpela buk bilong helpim ol pikinini. Buk Bikpela Tisa na buk Baibel Stori i gutpela bilong helpim ol liklik pikinini. Na ol tok i stap long buk Yangpela na buk Famili inap helpim ol yangpela i gat bikpela krismas liklik. Na i gat planti gutpela tok i stap long ol Wastaua na Kirap! bilong helpim ol. Long olgeta Kirap! i gat wanpela tok, nem bilong en “Ol Yangpela i Laik Save . . . ” na long olgeta Wastaua i gat wanpela hap i stori long “I Stap na Wok Bilong Jisas.” Taim yumi laik tilim ol magasin, gutpela sapos yumi stori long ol dispela samting long ol pikinini. Ol Wastaua na Kirap! i gat ol gutpela piksa long en bilong kirapim bel bilong ol pikinini na bai ol i laik kisim save long dispela God em i bin wokim olgeta samting. Na yumi no ken lusim tingting long tilim ol gutpela buklet olsem Stap Amamas, long wanem ol i gat ol naispela piksa long en. Olsem na taim yu redi long autim tok, yu mas tingim wanem wanem ol samting bai yu kisim bilong tilim long ol pikinini.
6 Taim Jehova i laik kirapim kot bilong givim strafe long ol man, olgeta man bai insait long dispela kot—“olgeta yangpela man na meri, na ol mama na ol pikinini” tu. (Ese 9:6) Sampela brata sista ol i bin kirap mekim wok bilong Jehova taim ol i stap pikinini yet, na ol i mekim inap planti yia. Olsem na taim yumi autim tok, yumi no ken lusim tingting long autim tok long ol pikinini. Yumi mas tingim ol pikinini olsem Jisas i bin mekim, na yumi mas autim tok long ol. (Mt 19:14, 15) Yumi no ken les long autim tok long ol pikinini bambai ol tu i ken kirap long litimapim nem bilong Jehova.
[Ol Askim]
1. (a) Olsem wanem tok bilong Buk Song 148:12 i kamap tru long nau? (b) Rot i op long ol pikinini inap mekim wanem?
2. (a) Bilong wanem yumi no ken givim baksait long ol pikinini? (b) Stori long sampela yangpela em ol i bin i stap gut long Jehova.
3. Taim yumi bungim pikinini, gutpela sapos yumi mekim wanem?
4. Taim yu autim tok long pikinini, yu mas mekim wanem na i olsem yu tingim papamama i bos bilong dispela pikinini?
5. (a) Stori long sampela gutpela samting yumi ken tilim long ol pikinini. (b) Taim yu redi long i go autim tok, yu mas mekim wanem bambai yu redi long autim tok long ol pikinini tu?
6. (a) Kot bilong Jehova bai painim husat? (b) Matyu 19:14, 15 i stori long wanem gutpela pasin bilong Jisas em yumi mas bihainim? (c) Bilong wanem yumi mas autim tok long ol pikinini?