Inapim Laik Bilong Yu Long Ol Samting Bilong Spirit
1 “Ol Man Bilong Givim Bel Long Autim Tok Bilong Kingdom” Kibung Distrik bai inapim laik bilong yumi long kisim ol samting bilong spirit. Olsem gutpela kaikai, program bilong kibung bai strongim yumi long ol samting bilong spirit—em bai kamapim “ol gutpela tok yumi bilip long en.” (1 Ti. 4:6) Program bai helpim yumi long go klostu moa long Jehova. Bai yumi kisim ol gutpela tok bilong helpim yumi long sanap strong na karim ol hevi. Jehova i tok promis: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” (Sng. 32:8) Yumi amamas tru em i save soim rot long yumi, a? Orait nau yumi ken tingim sampela samting yumi ken mekim na bai program i ken helpim tru yumi.
2 Redim Bel: Yumi olgeta wan wan i mas was gut tru long tingting bilong bel. (Snd. 4:23) Bilong mekim olsem, yumi mas bosim gut bel na no ken giamanim bel. Kibung em taim bilong tingim pasin bilong yumi long pas gut wantaim Jehova, na ‘glasim gut stretpela lo i mekim yumi i stap fri.’ Bilong redim bel long ‘kisim ol tok God i laik planim long bel’ bilong yumi, yumi mas askim em long skelim gut yumi na sapos i gat sampela “tok giaman” i stap long tingting bilong yumi, yumi laik bai em i ken stretim na bringim yumi long rot bilong “kisim laip bilong i stap gut oltaim oltaim.”—Jems 1:21, 25; Sng. 139:23, 24.
3 Putim Yau na Tingim Gut: Jisas i tok Maria i mekim gutpela pasin taim em i putim gut yau long ol tok bilong em. Em i tok: “Dispela samting Maria i laik kisim, em i gutpela samting tru, olsem na yumi no ken pasim em long kisim dispela gutpela samting.” (Lu. 10:39, 42) Sapos yumi gat wankain tingting olsem bilong Maria, bai yumi no larim ol liklik samting tasol i pulim tingting bilong yumi. Bai yumi sindaun na putim gut yau long olgeta tok bilong program. Sapos i gat as na yumi mas lusim sia, yumi mas kambek kwiktaim na putim yau gen long program. Sampela i save sindaun nabaut ausait na lusim ol bikpela tok bilong program, na dispela pasin i no gutpela. Yumi no ken toktok o wokabaut nating, na sapos yumi mekim wok long mobail-fon, pager, kamera, o video-kamera, yumi mas was gut; nogut dispela i pulim ai bilong ol narapela.
4 Taim yumi putim yau long ol tok, i gutpela sapos yumi raitim sampela sotpela tok long notbuk bilong helpim yumi long skelim ol tok brata i kamapim na olsem wanem ol tok em i mekim i kamapim klia bikpela as bilong tok. Ol tok yumi harim, yumi mas bungim wantaim ol tok yumi save pinis long en. Dispela bai helpim yumi long kisim gut ol tok na holim long tingting. Taim yumi lukim gen ol tok long notbuk, yumi mas tingim olsem wanem yumi inap bihainim. Yumi olgeta wan wan i mas askim yumi yet: ‘Dispela tok i mekim wanem long pasin bilong mi long pas gut wantaim Jehova? Mi mas stretim wanem ol samting long i stap bilong mi? Olsem wanem mi ken bihainim dispela tok long pasin mi mekim long ol narapela? Olsem wanem mi ken mekim wok long dispela tok long wok autim tok?’ Stori wantaim ol narapela long ol tok yumi laikim. Sapos yumi mekim ol dispela samting, dispela bai helpim yumi long holim ol tok bilong Jehova ‘long tingting bilong yumi.’—Snd. 4:20, 21.
5 Bihainim Ol Tok Yumi Lainim: Wanpela man i bin go long kibung distrik em i tok: “Program i bin helpim mi yet—em i bin kirapim mi long skelim ol samting i stap long bel bilong mi yet na bilong famili bilong mi, na i bin kirapim mi long mi mas kamapim ol gutpela tok bilong Baibel bilong helpim famili long taim i gat wok long mekim olsem. Em i bin helpim mi long luksave olsem mi mas helpim kongrigesen moa yet.” Ating planti bilong yumi tu i bin pilim olsem. Tasol nogut yumi kisim nupela strong long kibung na em tasol, nogat. Jisas i tok: “Yupela i save pinis long as tingting bilong dispela pasin mi mekim, na sapos yupela i bihainim gut, orait yupela i ken amamas.” (Jo. 13:17) Em nau, yumi mas wok strong long bihainim ol tok i stret long yumi yet. (Fl. 4:9) Dispela em rot bilong inapim tru laik bilong yumi long ol samting bilong spirit.
[Blok long pes 13]
Tingim Gut Ol Tok Yu Harim:
■ Em i mekim wanem long pasin bilong mi long pas gut wantaim Jehova?
■ Em i mekim wanem long pasin mi mekim long ol narapela?
■ Olsem wanem mi ken bihainim dispela tok long i stap bilong mi na long wok autim tok?