Kamapim Tenkyu Long Nambawan Gutpela Presen God i Givim
1. Bilong wanem yumi tenkyu tru long Jehova?
1 Jehova i givim yumi planti “presen i gutpela tru,” na nambawan bikpela presen tru em pe bilong baim bek ol man long rot bilong gutpela Pikinini bilong em. (Jem. 1:17) Dispela presen i opim rot long yumi inap kisim planti blesing, na tu, God inap lusim sin bilong yumi. (Ef. 1:7) Long dispela as na yumi save tenkyu tru long God. Long taim bilong Memorial, yumi mas lusim sampela haptaim long tingim tingim long bel dispela gutpela presen.
2. Olsem wanem yumi ken helpim famili long pilim tru dispela pe bilong baim bek man? Yu yet i ken mekim wanem bilong pilim moa yet dispela presen?
2 Helpim Famili Long Pilim Tru Dispela Presen: Bilong helpim famili bilong yu long pilim tru dispela presen, long ol wik paslain long taim bilong Memorial long Mas 30, i gutpela long yupela i yusim taim bilong Famili Lotu long skelim ol tok i stori long pe bilong baim bek man. Na tu, famili olgeta i ken skelim Baibel ritim bilong Memorial long olgeta wan wan de. Yu yet i ken tingting long olsem wanem pe bilong baim bek man i bin helpim yu, na dispela i mekim wanem long tingting bilong yu long Jehova, long yu yet, long ol narapela, na long ol samting bai kamap bihain.—Sng. 77:12.
3. Olsem wanem yumi ken soim tenkyu bilong yumi?
3 Soim Tenkyu Bilong Yumi: Pasin bilong pilim tru pe bilong baim bek man, dispela i kirapim yumi long tokim ol narapela long Jehova na long bikpela pasin laikim bilong em long salim Pikinini bilong em i kam. (Sng. 145:2-7) Long Mas, Epril, na Me, sampela famili i soim tenkyu bilong ol long rot bilong stretim tok bambai wanpela bilong famili i ken mekim wok painia haptaim. Sapos yu no inap mekim olsem, orait yu ting yu inap lusim sampela hap “taim” moa long mekim bikpela wok moa bilong autim tok? (Ef. 5:16) Na tu, pasin bilong pilim tru pe bilong baim bek man bai kirapim yumi long helpim ol narapela long kam long Memorial wantaim yumi. (KTH 22:17) Kirap nau long raitim wanpela lista bilong singautim ol gobek, ol Baibel sumatin, ol wanblut, ol wanwok, na ol neiba, na insait olgeta long dispela spesel wok bilong singautim ol man i kam long Memorial.
4. Long wanem ol rot yumi inap mekim gutpela wok long taim bilong Memorial?
4 Taim bilong Memorial i opim ol nupela rot bilong yumi ken kamapim long Jehova olsem yumi tenkyu tru long dispela presen em i givim long yumi ol man. Long dispela taim yumi laik mekim ol samting bilong strongim na soim tenkyu bilong yumi long dispela pe bilong baim bek man na tenkyu long “olgeta gutpela samting bilong Krais, em yumi ol man i no inap tru long skelim na kaunim.”—Ef. 3:8.