Ol Narapela i Lainim Wanem Samting Taim Ol i Lukluk Long Yu?
1 Jisas i tok: “Yupela kisim save long mi na aninit long tok bilong mi.” (Mt. 11:29) Tru tumas, em i no skulim ol man long rot bilong toktok tasol, nogat, em i skulim ol tu long rot bilong stap gutpela piksa. Tingim ol samting ol disaipel i kisim skul long en long rot bilong lukluk long Jisas. Em i gat pasin isi, gutpela pasin, na em i laikim ol narapela. (Mt. 8:1-3; Mk. 6:30-34) Em i gat pasin daun. (Jo. 13:2-5) Taim ol disaipel i mekim wok autim tok wantaim Jisas, ol i lukim em olsem man bilong wok strong tru na man bilong skulim gut ol narapela long tok i tru. (Lu. 8:1; 21:37, 38) Taim ol narapela i lukim yumi autim tok, ol i kisim wanem tingting?
2 Ol Man Bilong Haus: Ol klos i stret yumi pasim, gutpela pasin yumi soim, na pasin bilong yumi long tingim tru narapela man inap mekim bikpela samting long ol man bilong haus. (2 Ko. 6:3; Fl. 1:27) Ol i luksave olsem planti taim yumi save mekim wok long Baibel. Ol narapela i amamas long pasin bilong yumi long putim gut yau long tok ol i mekim. Tingim, pasin bilong stap gutpela piksa long ol dispela samting inap kirapim ol man long harim tok bilong Kingdom.
3 Ol Bratasista Bilong Yumi: Tingim tu gutpela samting pasin bilong yumi inap mekim long ol bratasista. Pasin bilong yumi long givim bel long autim tok inap kirapim ol tu long givim bel long wok autim tok. Olsem ain i sapim ain, gutpela tok yumi bin redim na autim long ol man, dispela inap kirapim ol narapela long mekim gut moa wok bilong autim tok. (Snd. 27:17) Pasin bilong yumi long raitim long notbuk nem bilong ol man husat i laik harim tok na go bek hariap lukim ol, dispela i save kirapim ol narapela long mekim wankain pasin. Taim yumi mekim gut wok autim tok bilong yumi, dispela bai kirapim ol bratasista bilong yumi long mekim wankain pasin.—2 Ti. 4:5.
4 Gutpela sapos sampela taim yu skelim ol pasin na toktok bilong yu yet na samting dispela inap mekim long ol narapela. Gutpela pasin bilong yumi bai amamasim Jehova, na tu, bai yumi inap mekim wankain tok olsem aposel Pol i bin mekim taim em i tok: “Yupela i mas bihainim pasin bilong mi na wokabaut, olsem mi tu mi save bihainim pasin bilong Krais na wokabaut.”—1 Ko. 11:1.
[Askim Bilong Stadi]
1. Ol disaipel bilong Jisas i lainim wanem samting taim ol i lukluk long Jisas?
2. Olsem wanem gutpela pasin na bilas bilong yumi inap kirapim ol man long kisim gutpela tingting long yumi?
3. Pasin bilong yumi inap mekim wanem long ol bratasista bilong yumi?
4. Bilong wanem sampela taim yumi mas skelim pasin bilong yumi?