Bipo Yu Wanpela Painia Oltaim?
1. Planti i bin mekim wanem gutpela wok, tasol sampela i bin mekim wanem?
1 Planti tausen i bin mekim wok painia na “skulim ol manmeri na autim gutnius.” (Apo. 5:42) Tasol i gat kain kain as na sampela i bin lusim wok painia. Olsem wanem? Sapos bipo yu bin mekim wok painia oltaim, yu bin skelim sindaun bilong yu long nau bilong save sapos yu inap kirap mekim gen wok painia?
2. Ol lain husat i bin painia long bipo, bilong wanem ol i mas skelim sindaun bilong ol long nau?
2 Sindaun i Senis: Ating samting i bin mekim na yu lusim wok painia, tasol nau dispela samting i no pasim yu moa. Olsem, sapos yu bin lusim wok painia, bikos yu no inap winim 90 aua long wanpela mun, yu ting yu inap mekim gen dispela wok, long wanem, nau yu mas winim 70 aua tasol? Ating i no gat nid moa long yu wok mani planti aua olsem bipo o wok bilong yu long lukautim famili i no bikpela olsem bipo. Wanpela sista em sik i mekim na em i mas lusim wok painia, em inap kirap painia gen taim em i gat 89 krismas. Inap wanpela yia em i no bin slip long haus sik, na em i pilim olsem helt bilong em i gutpela inap long em i ken painia gen!
3. Olsem wanem famili inap wok gut wantaim bilong helpim wanpela long famili long painia?
3 Ating yu no bin mekim wok painia bipo, tasol wanpela long famili bilong yu i bin lusim dispela wok bilong lukautim wanpela long famili, kain olsem lapun papa o mama. (1 Tim. 5:4, 8) Sapos olsem, yu ting yu o sampela narapela long famili inap mekim sampela samting moa bilong helpim em? Gutpela sapos yupela i toktok wantaim long dispela samting. (Snd. 15:22) Taim famili i wok gut wantaim bambai wanpela inap mekim wok painia, olgeta i ken pilim olsem ol i insait long dispela wok.
4. Olsem wanem sapos nau yu no inap kirap gen long mekim wok painia?
4 Yu no ken bel hevi sapos sindaun bilong yu long nau i pasim yu long kirap gen long mekim wok painia. Yu gat laik long mekim dispela wok, na dispela i mekim Jehova i amamas. (2 Kor. 8:12) Yusim save yu bin kisim taim yu mekim wok painia, bilong mekim gut wok autim tok long nau. Long rot bilong beten, tokim Jehova long laik bilong yu long mekim wok painia, na redi long senisim ol samting long sindaun bilong yu taim rot i op. (1 Jon 5:14) Ating bihain, Jehova bai opim ‘bikpela dua na i givim rot long yu long mekim wok’ na bai yu inap kisim amamas gen olsem wanpela painia oltaim!—1 Kor. 16:9.