Yu Inap Mekim “Bikpela Wok Bilong Helpim Planti Manmeri”?
1 Taim rot i op long aposel Pol long mekim “bikpela wok bilong helpim planti manmeri,” em i amamas long bihainim dispela rot bilong helpim wok bilong Kingdom Bilong God maski planti man i birua long em. (1 Ko. 16:9) Long nau, inap 642,000 pablisa long olgeta hap i mekim bikpela wok bilong helpim planti manmeri na ol i kamap painia oltaim.
2 Sindaun i Save Senis: Maski sindaun bilong yumi long nau i pasim yumi long mekim bikpela wok, sindaun bilong yumi man i save senis. Olsem na i gutpela long sampela taim yumi skelim sindaun bilong yumi yet, no ken wet i go inap long taim olgeta samting long sindaun bilong yumi i gutpela tasol. (Sav. 11:4) Olsem wanem? Yu wanpela yangpela em klostu nau bai yu grediuet long haiskul? Yu wanpela papa o mama em klostu nau pikinini bilong yu bai kirap skul? Klostu nau bai yu ritaia long wok mani bilong yu? Ol dispela kain senis inap mekim na bai yu gat sampela hap taim moa na nau yu inap kirap mekim wok painia oltaim. Wanpela sista bipo em i gat bikpela sik, em i kirap mekim wok painia taim em i gat 89 krismas. Bilong wanem em i mekim olsem? Em i no bin stap long haus sik winim wanpela yia, olsem na em i ting em inap mekim wok painia.
3 Olsem Pol, pastaim em i bin tingting long go lukim ol brata bilong em long Korin. Tasol em i senisim plen bilong em na bai em i ken autim gutnius. Planti bratasista husat i mekim wok painia oltaim long nau, ol i bin mekim planti senis long sindaun bilong ol bambai ol i ken mekim dispela wok. Sampela i bin lusim sampela gutpela samting bilong ol na bai mani ol i kisim long wanpela wok haptaim inap lukautim ol long sait bilong skin. Ol i kisim amamas long gutpela wok ol i mekim. (1 Ti. 6:6-8) Sampela marit i bin mekim sampela senis na bai wok mani bilong man tasol inap lukautim ol, na nau meri inap mekim wok painia.
4 No ken hariap na ting yu no inap mekim wok painia long wanem yu no inap winim ol aua. Bilong winim ol aua, yu mas winim tupela aua samting tasol long olgeta wan wan de. Sapos yu no save yu inap mekim o nogat, orait traim mekim wok painia haptaim inap wanpela o tupela mun na putim mak long winim 70 aua. Long dispela rot yu inap kisim amamas bilong wok painia. (Sng. 34:8) Toktok wantaim ol bratasista husat i mekim wok painia long nau. Ating ol i bin winim wankain ol hevi olsem yu gat. (Snd. 15:22) Askim Jehova long blesim hatwok yu mekim bilong mekim bikpela wok moa bilong autim tok.—1 Jo. 5:14.
5 Wanpela Gutpela Wok Tru: Wok painia oltaim i save givim planti blesing. Dispela wok i mekim na bai yu kisim bikpela amamas em pasin bilong givim planti samting i kamapim. (Ap. 20:35) Wok painia bai helpim yu long mekim gutpela wok moa long tok tru bilong Baibel. (2 Ti. 2:15) Dispela wok i mekim na planti taim moa bai yu lukim pasin bilong Jehova long helpim yu. (Ap. 11:21; Fl. 4:11-13) Na tu, wok painia bai helpim yu long kamapim ol gutpela pasin bilong spirit, olsem pasin bilong sanap strong, na em bai helpim yu long go klostu moa long Jehova. (Jem. 4:8) Olsem wanem? Yu inap kirap mekim bikpela wok bilong helpim planti manmeri na kamap wanpela painia oltaim?
[Askim Bilong Stadi]
1. Wanem rot i op long yumi ken bihainim?
2. Bilong wanem i gutpela long sampela taim yumi skelim sindaun bilong yumi?
3. Sampela i bin mekim wanem ol senis na bai ol inap mekim wok painia oltaim?
4. Yumi ken mekim wanem sapos yumi no save yumi inap winim ol aua o nogat?
5. Bilong wanem wok painia em i wanpela gutpela wok tru?