Faivpela Rot Bilong Painim Wanpela Baibel Stadi
1. Sapos yu hatwok long painim wanpela Baibel stadi, orait yu mas mekim wanem? Bilong wanem yu mas mekim olsem?
1 Olsem wanem? Yu hatwok long painim wanpela man husat i laik stadi long Baibel? No ken givap. Jehova i save blesim ol manmeri husat i no les long bihainim laik bilong em. (Gal. 6:9) Daunbilo i gat 5-pela rot bilong helpim yu.
2. Olsem wanem yumi ken bihainim pasin bilong tokaut stret bilong kirapim wanpela Baibel stadi?
2 Tokaut Stret: Planti manmeri i save olsem yumi save tilim ol Wastaua na Kirap!, tasol ating ol i no save olsem yumi save mekim Baibel stadi wantaim ol man. Olsem na taim yumi autim tok long ol haus, i gutpela sapos yumi tokaut stret long ol man olsem yumi laik mekim Baibel stadi wantaim ol. Na tu, ol man i laik harim tok, yumi ken askim ol sapos ol i laik stadi long Baibel. Sapos ol i tok nogat, yu ken wok yet long lusim ol buk na nius long ol na kirapim laik bilong ol long harim tok. Wanpela brata i bin go lukim tupela marit inap planti yia long magasin-raun bilong em. Em i tilim ol nupela nius long ol na em i redi long lusim ol, tasol em i kisim wanpela tingting na em i tok: “Olsem wanem? Yupela i laik stadi long Baibel?” Em i kirap nogut taim tupela i tok yes. Nau dispela tupela marit i baptais pinis.
3. I stret long yumi ting olsem olgeta manmeri yumi lukim long ol miting i gat wanpela Witnes i stadi wantaim ol? Stori long dispela.
3 Ol Man i Save Kam Long Ol Miting: No ken ting olsem olgeta manmeri yumi lukim long ol miting i gat wanpela Witnes i stadi wantaim ol. Wanpela brata i tok: “Ol man mi bin stadi wantaim ol, planti bilong ol mi bin bungim ol long ol miting.” Wanpela sista i kirap toktok wantaim wanpela meri bilong sem. Tupela pikinini meri bilong dispela meri ol i baptais pinis na ol i stap long kongrigesen. Inap 15 yia dispela meri i wok long kam long ol miting na olgeta taim em i save kam paslain stret long miting i kirap na bihain stret long miting i pinis. Dispela meri i orait long stadi na bihain em i kamap wanpela Witnes. Dispela sista i tok: “Mi sori tru olsem 15 yia i lus na bihain mi askim em long em i gat laik long stadi!”
4. Olsem wanem yumi inap painim wanpela stadi long rot bilong askim narapela?
4 Askim narapela: Wanpela sista i save go wantaim ol arapela taim ol i go lukim ol Baibel stadi bilong ol. Em i kisim tok orait long tisa, na taim stadi i pinis, em i askim sumatin olsem em i save long sampela arapela husat i gat laik long stadi long Baibel. Taim yu tilim buk Baibel i Tok long wanpela gobek, ating yu inap askim em olsem: “Yu save long narapela husat bai amamas long kisim wanpela buk olsem?” Sampela taim sampela samting i mekim na ol pablisa na ol painia i no inap mekim stadi wantaim man ol i bungim long teritori. So toksave long ol arapela olsem yu laikim wanpela Baibel stadi.
5. Ol poroman marit bilong planti brata na sista ol i no wanbilip, olsem na bilong wanem yumi laik askim ol long stadi?
5 Ol Poroman Marit Husat i No Wanbilip: Olsem wanem? I gat sampela pablisa long kongrigesen em poroman marit bilong ol i no wanbilip? Sampela husat i no wanbilip i no laik stori long Baibel wantaim poroman marit bilong ol, tasol ol i orait long stadi wantaim narapela husat i no famili bilong em. I gutpela long toktok wantaim poroman i bilip na painimaut wanem rot i gutpela long bihainim.
6. Olsem wanem pasin bilong beten em i bikpela samting taim yu laik painim wanpela Baibel stadi?
6 Beten: No ken lusim tingting olsem beten i gat strong. (Jem. 5:16) Jehova i tok promis long harim ol prea bilong yumi taim ol i stret wantaim laik bilong em. (1 Jo. 5:14) Wanpela brata husat i save bisi tru i bin kirap beten askim God long em i laikim wanpela Baibel stadi. Meri bilong dispela brata i gat tupela tingting, olsem brata i gat taim bilong lukautim na helpim sumatin o nogat, na moa yet sapos sumatin i gat planti hevi. So taim sista i beten askim Jehova long helpim man bilong em long painim wanpela stadi em i kamapim wari bilong em long Jehova. Ol i kisim bekim bilong prea bilong ol 2-pela wik bihain taim wanpela painia long kongrigesen i bungim wanpela man long teritori em i laik stadi na painia i givim dispela stadi long brata. Meri bilong brata i tok: “Long ol pablisa husat i ting ol i no inap lukautim wanpela stadi, mi laik tok olsem: Long prea bilong yu tokaut stret long samting yu laik mekim, na no ken stop long beten. Mitupela i bin kisim bikpela amamas moa yet.” Sapos yu wok strong na yu no givap, ating yu tu inap painim wanpela Baibel stadi na kisim amamas long helpim narapela man long bihainim ‘rot i go long laip.’—Mat. 7:13, 14.