Helpim Yu Inap Kisim Long Grup Bilong Autim Tok
1. Wanem ol helpim yumi bin kisim long Buk Stadi Bilong Kongrigesen em yumi inap kisim yet long grup bilong yumi bilong autim tok?
1 Olsem wanem? I gat sampela gutpela samting bilong Buk Stadi Bilong Kongrigesen yu pilim olsem yu misim? Bipo yumi bung long ol liklik grup na yumi save stap isi. Dispela i bin mekim na i no hatwok long kamap pren bilong ol arapela em ol inap strongim bilip bilong yumi. (Snd. 18:24) Wasman bilong Buk Stadi i save gut long sindaun bilong yumi na em inap givim ol gutpela tok bilong strongim yumi. (Snd. 27:23; 1 Pita 5:2, 3) Yumi inap kisim yet ol dispela helpim long rot bilong grup bilong yumi bilong autim tok.
2. Olsem wanem yumi ken go pas long strongim pasin pren insait long grup bilong yumi bilong autim tok?
2 Go Pas: Sais bilong ol grup bilong autim tok i wankain long sais bilong ol buk stadi grup bilong bipo. Taim yumi “wok gut wantaim” ol arapela long autim tok, yumi inap kamap gutpela pren. (Fili. 1:27) Yu bin wok pinis wantaim hamas pablisa long grup bilong yu? Olsem wanem? Yu inap wok wantaim sampela moa insait long grup na ‘mekim pasin laikim bilong yu i go bikpela moa’? (2 Kor. 6:13) Na tu, sampela taim yumi inap singautim wanpela long grup bilong yumi long bung wantaim yumi long Famili Lotu o long kaikai wantaim yumi. Long sampela kongrigesen ol grup bilong autim tok i save senis senis long redim kaikai long brata i kam bilong mekim pablik tok. Long wik bilong ol long mekim, grup i save bung wantaim na kaikai na strongim narapela narapela maski brata i mekim pablik tok i bung wantaim ol o nogat.
3. Wanem sampela rot we ol elda inap strongim yumi insait long grup bilong autim tok bilong yumi?
3 Tru ol kongrigesen i bin lusim wanpela miting long wik, tasol ol elda i gat bikpela wok yet long strongim ol pablisa. Ol i makim ol wasman bilong ol grup bilong strongim ol wan wan pablisa na skulim ol long wok autim tok. Sapos wasman bilong grup bilong yu i no autim tok yet wantaim yu, orait yu ken askim em long mekim olsem. Na tu, long wanpela wiken long olgeta mun, wasman autim tok i save autim tok wantaim ol narapela narapela grup. Long ol liklik kongrigesen we i no gat planti grup bilong autim tok, ating wasman autim tok bai visitim ol wan wan grup 2-pela taim long wanpela yia. Olsem wanem? Yu save stretim sediul bilong yu na bai yu inap autim tok taim em i visitim grup bilong yu?
4. (a) Ol i stretim ol bung bilong autim tok olsem wanem? (b) Bilong wanem i gutpela long larim grup bilong autim tok i bung long haus bilong yumi?
4 Planti taim i gutpela moa long ol wan wan grup i bung ol yet bilong autim tok long wiken. Taim kongrigesen i gat narapela narapela hap bilong bung bilong autim tok long wankain taim, ating em bai isi moa long ol pablisa long kamap long bung bilong autim tok na long teritori. Em isi moa long makim ol poroman na go hariap long teritori. Na tu, em isi moa long wasman i helpim ol pablisa insait long grup bilong em. Tasol sampela taim ating i gutpela sapos 2-pela o 3-pela grup i bung wantaim. Sapos kongrigesen olgeta i bung long namba 1 Sarere bilong mun o bihain long stadi Wastaua, orait i gutpela moa sapos ol grup i sindaun wantaim na wasman bilong ol i lusim sampela minit long makim ol poroman paslain long brata i pinisim bung bilong autim tok long rot bilong beten.—Lukim blok “Yu Orait Long Ol i Bung Long Haus Bilong Yu?”
5. Maski yumi no mekim moa Buk Stadi Bilong Kongrigesen, yumi ken bilip tru long wanem samting?
5 Tru, yumi no mekim moa Buk Stadi Bilong Kongrigesen, tasol Jehova i wok yet long givim yumi olgeta samting yumi mas i gat bilong mekim laik bilong em. (Hib. 13:20, 21) Jehova i lukautim yumi na yumi no sot long wanpela samting. (Sng. 23:1) I gat planti blesing yumi inap kisim long rot bilong grup bilong autim tok bilong yumi. Sapos yumi go pas long “planim planti kaikai,” orait yumi bai “kamautim planti kaikai.”—2 Kor. 9:6.
[Blok long pes 6]
Yu Orait Long Ol i Bung Long Haus Bilong Yu?
Long sampela kongrigesen ol grup bilong autim tok i save bung wantaim long wiken, long wanem, i no gat inap haus we ol wan wan grup i ken bung. Ol bung bilong autim tok i wanpela wok bilong kongrigesen, olsem na em wanpela gutpela samting tru long bung i ken kamap long haus bilong yu. Yu inap orait long grup i bung long haus bilong yu? No ken ting haus bilong yu i no gutpela tumas na yu no inap mekim. Ol elda bai skelim hap we haus bilong yu i stap long en na ol arapela samting wankain olsem ol i bin mekim taim ol i makim ol hap bilong mekim ol buk stadi. Sapos yu orait long grup i bung long haus bilong yu, orait, toksave long wasman bilong grup bilong yu.