“Laikim Tru Olgeta Wanbilip”
Klostu 2,000 yia i go pinis, aposel Pita i bin raitim dispela tok i stap long het tok. (1 Pita 2:17) Tasol yumi mas bihainim moa yet dispela tok long nau, winim bipo! Olsem wanem yumi inap laikim tru ol wanbilip long olgeta hap bilong graun? Yumi stap namel long ol manmeri i no gat pasin laikim, olsem na yumi ken mekim wanem na bai pasin laikim bilong yumi i no ken pinis? (Mat. 24:12) Taim yu lukim vidio Our Whole Association of Brothers, traim long bekim ol dispela askim.
(1) Long wanem taim yumi kamap wanpela bilong dispela bikpela lain brata Kristen? (2) Wanem 3-pela samting em ol bratasista long olgeta hap i save mekim? (3) Olsem wanem ol brata bilong yumi i soim olsem ol i wok strong long autim tok (a) long bikpela ples nating bilong Alaska?, (b) long ol bikpela haba bilong Yurop?, na (c) long bikbus bilong Peru? (4) Bilong wanem yumi no ken ting wok autim tok i wanpela wok nating tasol? (5) Kamapim sampela stori long wok ol Witnes Bilong Jehova i bin mekim bilong helpim na mekim gut bel bilong narapela narapela (a) bihain long bikpela guria, (b) bihain long saiklon, na (c) long taim pait i kamap insait long kantri. (6) Long wanem ol rot yumi olgeta inap kamapim klia nambawan bikpela mak bilong lain brata Kristen tru? (Jon 13:35) (7) Wanem ol gutpela samting i save kamap taim yumi wok wantaim long sanapim ol Haus Kingdom? (8) Olsem wanem ol brata bilong yumi long Isten Yurop na Rasia i bin pas gut wantaim Jehova taim gavman i tambuim wok bilong ol? (9) Wanem ol hatwok em planti Witnes i save mekim bilong i go long ol kibung? Bilong wanem ol i mekim olsem? (10) Olsem wanem dispela vidio i bin strongim yu (a) long lotuim Jehova long ol miting Kristen wantaim ol bratasista bilong yu na stap wanbel?, (b) long helpim ol narapela long taim bilong hevi?, na (c) long mekim gut wok autim tok taim yu inap mekim, na long wanem wanem rot yu inap mekim? (11) Olsem wanem na long wanem taim yumi ken yusim dispela vidio long wok autim tok?
Nambawan as na yumi insait long lain bratasista Kristen, em pasin bilong yumi long laikim tru Jehova. Yumi amamas tru long kisim save long em na skulim ol narapela man long em. Na yumi laikim tru ol man em Jehova i laikim ol. Taim yumi helpim ol long taim bilong hevi, yumi no ting God i mas tok tenkyu long yumi. Nogat. Yumi tenkyu long God, long wanem, yumi tingim lain bratasista Kristen i olsem wanpela gutpela presen i kam long em. Yumi stap long taim bilong las de bilong dispela graun we i no gat pasin laikim, olsem na yumi mas wok yet long soim olsem yumi laikim tru olgeta wanbilip bilong yumi!