Mekim Wok Autim Tok i Kamap Gutpela Moa—Raitim Nem Samting Bilong Man i Harim Tok
“Oltaim yu mas tingim ol samting yu mas mekim na tingim wok tisa bilong yu.” (1 Tim. 4:16) Tok aposel Pol i mekim long Timoti i kamapim olsem, maski yumi nupela o yumi save gut long autim tok, yumi mas strong long mekim wok autim tok bilong yumi i kamap gutpela moa. Bilong helpim yumi, bai i gat wanpela nupela hap stori nem bilong en “Mekim Wok Autim Tok i Kamap Gutpela Moa,” bai stap long Wok Kingdom. Wan wan atikol bai stori long wanpela pasin bilong autim tok we i bikpela samting, na em bai kamapim ol gutpela rot long olsem wanem yumi ken kisim dispela pasin. Long mun we Wok Kingdom i stori long wanpela pasin bilong autim tok, yumi olgeta i ken wok strong long bihainim dispela pasin. Long pinis bilong mun, long wanpela hap bilong Miting Bilong Wok, bai yumi stori long gutpela samting i bin kamap taim yumi wok strong long bihainim dispela pasin. Long dispela mun, yumi laik wok strong long mekim moa yet pasin bilong raitim nem, na atres samting bilong man i laik harim tok.
Em i Bikpela Samting: Bilong inapim dispela wok, yumi mas autim tok na mekim sampela samting moa. Yumi mas go bek lukim ol man i harim tok na skulim ol, olsem givim wara long sid bilong tok i tru yumi bin planim. (Mat. 28:19, 20; 1 Kor. 3:6-9) Olsem na yumi mas go bek lukim man, stori long samting em i laik save long en, na stori moa long samting yumi bin toktok long en. Taim yumi painim man i laik harim tok, i gutpela yumi raitim nem na atres samting bilong em.
Rot Bilong Mekim:
• Yu mas i gat notbuk long beg na bai yu ken raitim nem na atres samting bilong man i laik harim tok. Raitim klia ol tok, na long olgeta taim raitim ol narapela tok yupela i stori long en. Taim yupela i stori pinis, kwiktaim raitim ol dispela samting.
• Raitim ol samting olsem: Nem, telefon namba, atres o e-mail atres bilong man. Yu luksave long wanem ol samting long em na famili bilong em we i gutpela long tingim?
• Raitim ol samting yupela i bin toktok long en. Yu bin ritim wanem ol skripsa? Em i tok em i bilip long wanem samting? Yu tilim wanem buk samting long em? Raitim taim, de, na det yu go lukim em.
• Raitim ol samting yu tingting long mekim taim yu go bek. Yu tokim em bai yu stori long wanem samting? Yu tok long go bek lukim em long wanem taim?
• Long olgeta taim, yu mas raitim sampela tok moa taim yu mekim gobek. I no gat rong sapos yu raitim planti tok long notbuk.
Traim Mekim Olsem Long Dispela Mun:
• Taim yu raitim nem samting long notbuk, tokim brata o sista i wok wantaim yu long ol samting yu raitim.