Mekim Gutpela Wok Long Ol Olpela Magasin

Ol olpela magasin i no inap helpim man sapos yumi putim tasol long haus o tromoi nating, olsem na yumi mas tilim. Wanpela magasin tasol inap kirapim laik bilong man long kisim save long tok i tru na singaut long nem bilong Jehova. (Rom 10:13, 14) Daunbilo em sampela tok yupela i ken mekim bilong tilim ol olgeta magasin.

• Taim yumi autim tok long ol teritori yumi no save autim tok planti taim long en, ating yumi ken lusim wanpela magasin long ol haus i no gat man, tasol putim long hap we narapela man i no ken lukim.

• Taim yumi autim tok long ol pablik ples, olsem long ol bas stop we planti man i wet long kisim bas, askim ol wan wan man sapos ol i laikim wanpela samting bilong ritim, soim sampela olpela magasin long ol, na ol yet i ken makim nius ol i laikim.

• Taim yumi go long ol ples bilong wasim klos, ol praivet haus sik, klinik, o kain ples olsem insait long teritori bilong kongrigesen, lusim sampela olpela magasin long risepsen. I gutpela long kisim tok orait long bos pastaim. Sapos yu lukim olsem i gat sampela magasin i stap pinis, no ken putim gen.

• Taim yu redi long mekim ol gobek, skelim ol wan wan man yu laik go lukim ol. Olsem wanem? Em i gat famili? Em i save laik long raun? Em i save amamas long wok gaden? Sekim ol olpela magasin na painim sapos i gat wanpela stori em man bai amamas long ritim, na soim long em taim yu go bek lukim em.

• Sapos planti taim yu bin go bek long lukim wanpela man i laik harim tok tasol yu no bungim em, na nau yu bungim em gen, soim em ol olpela magasin we em i no bin kisim.