Ol Nupela Singsing Bilong Lotu!
1 Long miting bilong Watch Tower Bible and Tract Society of Pennsylvania i save kamap long olgeta yia—dispela miting i bin kamap long Oktoba 4 2014—ol i tokaut olsem ol bai stretim gen singsing buk em nau tasol yumi bin kisim. Em gutpela nius tru, laka! Ol i kirapim ol lain i bung long dispela miting long tingim ol singsing bilong Kingdom ol i bikpela samting long lotu bilong yumi.—Sng. 96:2.
2 Ating yu laik save, ‘Bilong wanem ol i mas stretim gen singsing buk?’ I gat sampela risen na ol i mas mekim. Namba 1, save bilong yumi long ol tok bilong Baibel i wok long senis na kamap klia moa, na dispela inap mekim sampela samting long ol tok bilong ol singsing bilong yumi. (Snd. 4:18) Narapela risen: Planti tok na ol hap tok i stap long singsing buk bilong yumi long nau em ol i kisim long Baibel New World Translation yumi holim pastaim. Olsem na nau ol i mas senisim ol dispela tok o hap tok na bai i stret long ol tok i stap long nupela Baibel New World Translation yumi holim nau. Ol i mas mekim bikpela wok long stretim gen ol tok bilong singsing na bai i stret wantaim ol nupela save yumi kisim long nau, olsem na ol i ting i gutpela long kamapim tu sampela nupela singsing moa.
3 Olsem wanem? Yumi mas wet inap long ol i prinim nupela singsing buk pastaim na nau yumi ken kirap yusim ol nupela singsing? Nogat. Mipela i amamas long toksave long yupela olsem long sampela mun bihain, mipela bai putim sampela nupela singsing long Web-sait bilong yumi jw.org. Taim mipela i tokaut pinis long wanpela nupela singsing, mipela bai makim dispela singsing bilong mekim long pinis bilong wanpela Miting Bilong Wok na raitim olsem “nupela singsing.”
4 Rot Bilong Lainim Ol Nupela Singsing: Em i hatwok liklik long lainim ol nupela singsing. Tasol, olsem man bilong raitim song, yumi laik singsing strong long ol miting bilong kongrigesen na “no ken pasim maus.” (Sng. 30:12) Bilong lainim ol nupela singsing, bihainim ol dispela pasin.
Traim planti taim long putim yau long ol rekoding bilong singsing ol i pilaim wantaim piano, em ol bai putim long Web-sait bilong yumi. Taim yu harim ol musik bilong ol singsing planti taim, em i isi long tingim.
Stadi gut long ol tok bilong singsing, na traim long tingim.
Singsing bihainim musik na kolim ol toktok bilong singsing. Mekim traim planti taim inap yupela i save gut.
Sampela taim long Famili Lotu yupela i ken prektis long ol nupela singsing inap famili i save gut long en.
5 Long ol mun bihain taim ol i makim wanpela nupela singsing bilong pinisim Miting Bilong Wok, kongrigesen bai putim yau long musik wanpela taim pastaim. Na bihain odiens bai singsing bihainim musik, olsem yumi save mekim.
6 Tingim, pasin bilong singsing long ol miting i save mekim yumi amamas taim yumi olgeta i bungim nek long singsing bilong litimapim nem bilong Jehova. Olsem na yumi no ken kisim pasin bilong lusim fom nating long taim bilong singsing long ol miting Kristen.
7 I gat narapela rot em yumi inap soim olsem yumi pilim tru ol musik bilong lotu i bikpela samting. Long taim bilong ol kibung sekit na ol kibung rijinel, ol i save pilaim ol musik paslain long ol hap bilong program i kirap. Tupela taim long olgeta yia, ol brata na sista bilong yumi long olgeta hap bilong graun i save baim rot bilong ol yet long kam long Patterson, New York, bilong wokim ol dispela naispela musik yumi save harim long taim bilong lotu. Olsem na taim siaman i singautim yumi long kisim ples sindaun na harim ol musik dispela lain (orchestra) i redim, yumi mas bihainim tok. Taim yumi mekim olsem, dispela i redim tingting na bel bilong yumi long ol tok bai kamap.—Esr. 7:10.
8 Bai yumi pinisim miting bilong yumi long nupela singsing nem bilong en “The Kingdom Is in Place—Let It Come!” Dispela singsing, em ol i bin kamapim long dispela miting bilong olgeta yia, em ol i bin kamapim bilong makim 100 yia aniveseri bilong taim Kingdom i kirap mekim wok.
9 Tru tumas, ol nupela singsing em “ol gutpela samting” tru i kam long Jehova. (Mat. 12:35a) Yumi tingting strong long lainim ol dispela nupela singsing na givim bel olgeta long singsing, na litimapim nem bilong God bilong yumi na givim ona long em!—Sng. 147:1.