Laikim God na Ol Narapela—Hau Long Kisim Ol Dispela Pasin

Maski yumi no stap aninit long Lo Bilong Moses, tupela bikpela lo—laikim God na ol narapela—Jehova i laik yumi mas bihainim dispela tupela lo. (Mt 22:37-39) Yumi no bon wantaim pasin laikim. Yumi mas kisim dispela pasin. Hau bai yumi kisim? Wanpela rot em long ritim Baibel long olgeta de. Taim yumi skelim ol pasin bilong Jehova em Baibel i stori long en, yumi “amamas long em i gutpela tumas.” (Sg 27:4) Long dispela rot, pasin bilong yumi long laikim em bai i go bikpela na yumi bai gat wankain tingting olsem em. Dispela bai kirapim yumi long bihainim ol lo bilong God, na tu, yumi bai redi long daunim laik bilong yumi yet na helpim ol narapela. (Jon 13:34, 35; 1Jo 5:3) Yu ken bihainim dispela 3-pela rot bambai yu inap kisim amamas taim yu ritim Baibel:

• Piksaim ol samting long tingting. Tingim olsem yu tu i stap long dispela taim. Yu bai lukim, harim, na smelim wanem ol samting? Ol manmeri long dispela taim i pilim olsem wanem?

  

• Bihainim kain kain rot. Yu ken bihainim ol dispela rot: Ritim long bikpela nek, o bihainim gut taim yu harim odio rekoding. Ritim stori bilong wanpela man o meri long Baibel o wanpela topik em yu laik kisim save long en. Eksampel, yusim Apendiks A7 o B12 long New World Translation of the Holy Scriptures na ritim stori bilong Jisas. Ritim sapta olgeta em teks bilong de i kam long en. Ritim ol buk bilong Baibel kirap long namba 1 buk i go long laspela buk.

  

• Kliagut long ol tok yu ritim. Sapos yu ritim wanpela sapta long olgeta de na tingim tingim ol tok yu ritim, dispela i gutpela moa winim pasin bilong ritim planti sapta bikos yu laik pinisim hariap Baibel ritim bilong yu. Skelim na tingim gut ol samting i kamap. Yusim ol mep na ol majinel referens. Mekim wok painimaut long wanpela poin we yu no kliagut long en. Sapos inap, lusim wankain haptaim olsem yu save yusim long rit long tingim tingim ol tok yu ritim.