ROT BILONG LUSIM PASIN BILONG HEITIM NARAPELA

1 | Mekim Wankain Pasin Long Olgeta man

Tok Bilong Baibel:

“God i save mekim wankain pasin long olgeta man. Na em i save laikim [olgeta man] husat i save pret long em na bihainim stretpela pasin maski [ol] i bilong wanem lain.”—APOSEL 10:34, 35.

Mining Bilong En:

Jehovaa God i no save skelim yumi bilong wanem kantri, lain, skin kala, o kalsa bilong yumi. Nogat, bikpela samting em i save lukluk long tingting na laik i stap long bel bilong man. Baibel i tok “ol man i save lukluk long bodi. Tasol Jehova i save lukim bel bilong man.”—1 Samuel 16:7.

Samting Yu Ken Mekim:

Tru, yumi no inap lukim bel bilong man, tasol yumi ken traim long bihainim pasin bilong God na tingim olgeta man i wankain. Traim long lukluk long pasin bilong wan wan man, na i no wanpela lain olgeta. Sapos yu luksave olsem yu gat tingting kranki long ol narapela—ating ol i bilong narapela skin kala o narapela lain—beten askim God long helpim yu long lusim dispela pasin. (Buk Song 139:23, 24) Sapos yu beten askim Jehova long givim yu strong long mekim wankain pasin long olgeta man, yu ken bilip olsem em bai harim beten bilong yu na helpim yu.—1 Pita 3:12.

a Jehova em nem bilong God.—Buk Song 83:18.

“I no gat wanpela taim bipo we mi bin sindaun wantaim wanpela waitman . . . Nau mi insait long lain brata tru i stap long olgeta hap bilong graun.”—TITUS

Ekspiriens—TITUS

Lusim Pasin Bilong Heitim Narapela

Titus i insait long wanpela lain raskol em ol i belhat long ol lo i no stret gavman i putim we i sapotim wanpela skin kala na i daunim narapela skin kala. Em i tok: “Mipela i save go long ol hap bilong taun we ol i no laikim ol blakskin long i go long en, olsem ol hotel na ol haus dring, na mipela i save go tasol bilong kirapim pait.” Titus i luksave olsem em i heitim ol narapela na dispela i kirapim em long pait na bagarapim ol narapela, na em i tok moa: “Sapos mi tok pait wantaim wanpela man o meri, oltaim mi save go pas long kirapim pait.”

Pasin bilong Titus i kirap long senis taim ol Witnes Bilong Jehova i stat stadi wantaim em long Baibel. Taim em i ritim Baibel, tok bilong en i senisim tru tingting bilong em. Em i pilim tu dispela tok promis bilong Baibel olsem bihain “bai i no gat dai moa, na ol bai i no bel hevi moa na krai moa, na ol bai i no inap pilim pen gen.”—Revelesen 21:3, 4.

Pastaim Titus i hatwok long lusim pasin bilong heitim ol narapela long bel bilong em. Em i tok: “I hatwok tru long mi senisim tingting na pasin bilong mi.” Taim em i kisim save long tok bilong Aposel 10:34, 35, we i tok God i save mekim wankain pasin long olgeta man, dispela i helpim em.

Wanem samting i kamap? Titus i tok: “Mi lukim pasin laikim i stap namel long ol Witnes Bilong Jehova, maski lain o skin kala bilong ol i narapela narapela, na dispela i kirapim mi long bilip olsem ol i bihainim lotu i tru. Paslain long mi kisim baptais olsem wanpela Witnes, wanpela waitman long kongrigesen i singautim mi i go kaikai wantaim em long haus bilong em. Dispela i olsem wanpela driman. I no gat wanpela taim bipo we mi bin sindaun wantaim wanpela waitman, na moa yet long kaikai wantaim em long haus bilong em. Nau mi insait long lain brata tru i stap long olgeta hap bilong graun.”