Baibel i Save Senisim i Stap Bilong Man

Wanpela yangpela man i kirap long smokim mariwana na tabak taim em i yangpela yet. Olsem wanem em i bin kisim strong long lusim dispela pasin? Wanem samting i bin helpim wanpela man husat i insait long wanpela lain raskol long bosim pasin bilong belhat na bel nogut long ol man bilong narapela skin? Skelim stori bilong dispela tupela man.

DISPELA MAN

NEM: HEINRICH MAAR

KRISMAS: 38

KANTRI: KASAKSTAN

BIPO: KALABUS LONG MARIWANA NA TABAK

LAIP BILONG MI LONG BIPO: Mama i bin karim mi long hap saut bilong Kasakstan, em 120 kilomita longwe long biktaun Tashkent. Long taim bilong san, dispela ples i save kamap drai na hot tru, olsem 45 digri Selsias. Na long taim bilong kol, ples i save kamap kol inap long mak i aninit long 10 digri Selsias​​—em gutpela ples bilong planim ol grep na mariwana.

Papamama bilong mi ol i bilong Jemani. Tupela wantaim ol i evanjelikal Kristen, tasol ol i no save go long lotu. Ol i skulim mi long kolim long tingting dispela beten, Papa Bilong Mipela. Taim mi gat 14 krismas, inap sotpela haptaim mama na bikpela susa bilong mi ol i stadi long Baibel wantaim ol Witnes Bilong Jehova. Wanpela taim mi putim yau i stap taim tupela Witnes husat i stadi wantaim mama, ol i soim em long nem bilong God long Baibel bilong em yet. Mi kirap nogut long dispela. Mama i lusim stadi, na mi yet i no mekim sampela samting bilong kisim save long God. Tasol bihain, tisa bilong mi long skul i kamapim kain kain giaman stori em i bin harim ol man i mekim long ol Witnes Bilong Jehova. Bipo mi bin bihainim susa bilong mi i go long sampela miting bilong ol Witnes Bilong Jehova, olsem na mi tokim tisa olsem ol dispela stori i no tru.

Taim mi gat 15 krismas, ol i salim mi i go long Leningrad, nau ol i kolim St. Petersburg, Rasia, bilong kisim save long pasin bilong mekim wanpela wok. Mi tokim ol wanrum bilong mi long ol liklik save mi gat pinis long Jehova. Tasol mi kirap long smok. Taim mi raun i go long ples bilong mi long Kasakstan, em isi long mi baim mariwana, maski lo i tambuim. Na tu, mi dring planti tumas vodka, em strongpela dring, na wain em mipela yet i wokim long haus.

Mi pinisim skul na insait long ami bilong Rasia inap tupela yia. Tasol mi tingim yet sampela tok mi bin lainim long Baibel taim mi stap yangpela yet. Taim rot i op, mi save toktok wantaim ol wansoldia na stori long ol long Jehova, na mi save sambai long ol Witnes taim ol narapela i sutim ol tok giaman long ol.

Bihain long mi pinisim wok bilong mi long ami, mi go sindaun long Jemani. Mi stap long kem bilong ol man bilong ol narapela kantri, na mi kisim wanpela liklik buk bilong mekim Baibel stadi, em ol Witnes i wokim. Mi givim bel tru long ritim na mi wanbel olsem ol tok bilong en i tru. Tasol mi stap kalabus long tabak na mariwana na mi hatwok long lusim. Bihain liklik mi go sindaun klostu long taun Karlsruhe. Long dispela hap mi bungim wanpela Witnes Bilong Jehova, na em i kirap stadi wantaim mi long Baibel.

BAIBEL I SENISIM I STAP BILONG MI: Inap longpela taim, mi bin holim tingting olsem Baibel em Tok Bilong God. Na taim mi ritim pinis dispela buk bilong mekim Baibel stadi, mi bilip tru olsem Baibel i bekim olgeta bikpela askim long i stap bilong man. Tasol longpela hap taim i lus na mi no senisim yet ol pasin bilong mi. Bihain mi pilim tru tok bilong Baibel long 2 Korin 7:​1, na mi strongim tingting long rausim “olgeta pasin doti bilong bodi na bilong spirit,” na dispela i makim olsem mi mas lusim mariwana na tabak.

Kwiktaim mi lusim pasin bilong smokim mariwana. Tasol inap sikspela mun mi stap kalabus yet long tabak. Orait, wanpela taim dispela Witnes husat i stadi wantaim mi long Baibel, em i askim mi, “Yu stap bilong mekim wanem?” Dispela i kirapim mi long tingting long pasin bilong mi long stap kalabus long tabak. Inap sampela taim mi bin traim long lusim pasin bilong smok. Tasol nau mi tingting strong long mi mas beten paslain long laik i kamap long kisim sigaret, na mi no ken smok pastaim na bihain askim God long fogivim mi. Long 1993, mi makim wanpela de stret long mi bai lusim smok. Jehova i helpim mi na kirap long dispela de na i kam inap long nau, mi no bin putim han liklik long wanpela sigaret.

GUTPELA SAMTING I PAINIM MI: Nau mi stap fri na mi no tromoi bikpela mani moa long baim mariwana na tabak, em ol samting bilong nogutim bodi, olsem na helt bilong mi i kamap gutpela moa. Long nau, mi amamas long mekim wok volantia long brens ofis bilong ol Witnes Bilong Jehova long Jemani. Mi amamas tru olsem mi bin lain long bihainim tok bilong Baibel long laip bilong mi! Nau mi save long ol tok bilong Baibel, na dispela i mekim na i stap bilong mi i gat as tru bilong en.

DISPELA MAN

NEM: TITUS SHANGADI

KRISMAS: 43

KANTRI: NAMIBIA

BIPO: MAN I INSAIT LONG LAIN RASKOL

LAIP BILONG MI LONG BIPO: Mi kamap bikpela long wanpela liklik ples long Ohangwena long hap not bilong Namibia. Ol i bin paitim na kilim i dai ol manmeri long ples bilong mi taim pait i kamap long ol yia namel long 1980 na 1990. Long ples bilong mi, sapos wanpela mangi i save gut long pait na em inap paitim ol arapela mangi, ol man bai tingim em olsem man tru. Olsem na mi lain long pait!

Taim mi pinisim skul, mi go stap wantaim kandere bilong mi long wanpela taun i stap long nambis, em Swakopmund. Mi go kamap long dispela hap, na bihain liklik mi insait long wanpela lain raskol bilong ol yangpela bikhetman. Mipela i save go long ol hap bilong taun we ol i no laikim ol blakskin long i go long en, olsem ol hotel na ol haus dring, na mipela i save go tasol bilong kirapim pait. Planti taim mipela i bin pait wantaim ol sekiuriti gad na ol polis. Long olgeta nait mi save karim wanpela longpela naip i sap tru, bambai mi inap bagarapim man i laik pait long mi.

Long wanpela nait, mi wok long pait i stap wantaim wanpela lain birua na klostu ol i kilim mi i dai. Wanpela birua i kam long baksait bilong mi na em i laik katim nek bilong mi, tasol long dispela taim stret wanpela poroman bilong mi i paitim em i go pundaun. Klostu tru mi dai, tasol mi strong yet long pait na bagarapim ol man. Sapos mi tok pait wantaim wanpela man o meri, oltaim mi save go pas long kirapim pait.

BAIBEL I SENISIM I STAP BILONG MI: Taim mi bungim wanpela Witnes Bilong Jehova long namba wan taim, dispela meri Witnes i ritim sampela ves bilong Buk Song sapta 37, na em i tokim mi olsem Buk Kamapim Tok Hait i stori long ol narapela gutpela tok promis bilong ol samting bai kamap bihain. Tasol em i no tokim mi long wanem hap stret ol dispela tok promis i stap long en, olsem na mi painim wanpela Baibel na long dispela nait yet mi ritim olgeta tok long Buk Kamapim Tok Hait. Mi laikim tru tok promis mi ritim long Kamapim Tok Hait 21:​3, 4 olsem “ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” Taim ol Witnes i kam bek, mi orait long ol i ken stadi wantaim mi long Baibel.

I hatwok tru long mi senisim tingting na pasin bilong mi. Tasol mi kisim save long tok bilong Aposel 10:​34, 35 olsem, “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” Na tu, mi wok strong long bihainim tok bilong Rom 12:18: “Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man.”

Mi lain long bosim belhat bilong mi, tasol mi mas lusim tu pasin bilong i stap kalabus long smok tabak. Planti taim mi save aiwara wantaim na beten askim Jehova long helpim mi. Pastaim mi bihainim pasin kranki; mi save tok olsem mi bai smokim laspela sigaret, na bihain mi save beten. Dispela Witnes husat i stadi wantaim mi long Baibel, em i helpim mi long luksave olsem mobeta mi beten taim laik i kamap long mi kisim sigaret. Na mi no ken bung moa wantaim ol arapela em ol i save smok. Na tu, mi toktok wantaim ol wanwok bilong mi long ol samting nogut i save kamap long pasin bilong smok. Dispela i helpim mi gut, long wanem, nau i no gat rot moa long kisim fri ol sigaret​​—ol arapela wanwok em ol i save smok ol i no givim moa ol sigaret long mi.

Bihain, mi lusim pasin bilong smok na mi lusim ol olpela pasin bilong mi. Inap sikspela mun mi lainim ol stiatok bilong Baibel na bihainim long i stap bilong mi, na mi winim mak long kisim baptais olsem wanpela Witnes Bilong Jehova.

GUTPELA SAMTING I PAINIM MI: Mi lukim pasin laikim i stap namel long ol Witnes Bilong Jehova, maski lain o skin kala bilong ol i narapela narapela, na dispela i kirapim mi long bilip olsem ol i bihainim lotu i tru. Paslain long mi kisim baptais olsem wanpela Witnes, wanpela waitman long kongrigesen i singautim mi i go kaikai wantaim em long haus bilong em. Dispela i olsem wanpela driman. I no gat wanpela taim bipo we mi bin sindaun wantaim wanpela waitman, na moa yet long kaikai wantaim em long haus bilong em. Nau mi insait long lain brata tru i stap long olgeta hap bilong graun.

Long bipo, ol sekiuriti gad na ol polis i bin traim long fosim mi long senisim tingting na pasin bilong mi, tasol ol i no inap. Baibel tasol i gat strong long helpim mi long senisim pasin bilong mi na kamap man bilong amamas.

[Rait long pes 29]

“Planti taim mi save aiwara wantaim na beten askim Jehova long helpim mi”