Baibel i Save Senisim i Stap Bilong Man

WANEM samting i helpim wanpela man bipo em i insait long lain raskol na kalabus long mariwana long lusim ol dispela pasin i save bagarapim man? Bilong wanem wanpela man husat i bin pilai musik long wanpela tres metal ben i katim longpela gras bilong em na senisim tingting bilong em long musik em i bin laikim? Wanem samting i kirapim wanpela man bipo em i bin sakim ol lotu na gavman, na nau em i kirap autim ol tok bilong lotu? Skelim tok ol dispela man i mekim.

“Mi Lusim Kalabus Bilong Smok Na Mariwana.”​​—PETER KAUSANGA

KRISMAS: 32

KANTRI: NAMIBIA

BIPO: INSAIT LONG LAIN RASKOL NA KALABUS LONG MARIWANA

LAIP BILONG MI LONG BIPO: Mi kamap bikpela long Kehemu, wanpela bilong 4-pela bikpela setelmen long taun Rundu. Ol manmeri long dispela hap i kisim mani long rot bilong salim diwai, ston sakol, na wit samting.

Taim mi gat 2-pela krismas tasol, mama bilong mi i dai, olsem na bubu meri i lukautim mi. Mipela i no gat planti samting. Mi no gat pasin bilong bikhet, tasol ol wankrismas i subim mi, na mi mekim ol pasin nogut. Long skul mi go insait long wanpela lain raskol. Mipela i pait long rot, mekim nogut long ol narapela, stil, salim ol daimon long pasin hait, na dring tumas alkohol na kisim drak. Tupela taim ol i holim mi na kalabusim mi, long wanem, mi paulim mani.

Mi lusim skul taim mi stap long gret 10, na bihain mi lusim dispela taun na lain raskol na go sindaun long narapela hap. Mi laik kirapim nupela laip. Tasol mi kalabus yet long mariwana. Sampela taim mi save wokabaut inap planti kilomita bilong kisim wanpela sigaret mariwana.

BAIBEL I SENISIM I STAP BILONG MI: Long kirap bilong 1999, mi bungim sampela Witnes Bilong Jehova, em ol i tilim ol buk na nius long ol man i wokabaut long rot. Ol i mekim gutpela pasin rispek long mi, na dispela i sutim tru bel bilong mi. Tok i stap long ol buk na nius mi bin kisim i mekim na mi save olsem mi painim pinis lotu i tru. Mi kirap stadi gut long Baibel na i no longtaim na mi luksave olsem mi mas senisim sampela pasin bilong mi sapos mi laik bai God Jehova i amamas long mi.

Mi makim wanpela de long mi bai lusim smok na long dispela de mi bagarapim olgeta samting bilong smok mi holim. Na tu, mi tokim ol pren long ol i no ken givim sigaret long mi, na mi askim ol long ol i no ken smok taim ol i stap klostu long mi. Tasol ol samting i no kamap olsem mi makim. Tupela taim mi pundaun long strongpela laik bilong kisim sigaret na mariwana. Tasol dispela i no bagarapim bel bilong mi. Mi tingim stiatok i stap long Sindaun 24:16: “Maski sapos stretpela man i save pundaun planti taim, oltaim em bai i kirap gen.” Bihain mi lusim kalabus bilong smok na mariwana.

Taim mi wok long kisim sampela save moa long Jehova, mi kisim strongpela laik long i stap pren tru bilong em. Wanpela skripsa long Baibel i sutim tru bel bilong mi, em Song 27:10: “Maski papa na mama i givim baksait long mi, Bikpela bai i lukautim mi.” Taim mi wok strong moa long stadi long Baibel, mi kisim save olsem dispela tok em i tru. Mi pilim olsem Jehova i kamap wanpela Papa tru na em i lukautim mi.

Na tu, oltaim mi bung wantaim ol Witnes Bilong Jehova. Namel long ol mi lukim olsem ol i pren tru na narapela i laikim tru narapela. Bipo mi no bin pilim kain pasin laikim olsem.

GUTPELA SAMTING I PAINIM MI: Jehova na ol wanbilip Witnes i bin helpim mi long senisim bilas, klos, pasin, na toktok bilong mi i kamap gutpela moa. Taim mi lukluk i go bek, mi ting olsem laip bilong mi i senis olsem wanpela liklik snek i kamap wanpela naispela bataplai. Ol wanblut bilong mi i amamas long ol pasin bilong mi i senis, na nau ol i trastim mi. Nau mi marit na mi wok strong long stap olsem gutpela maritman long meri bilong mi na lukautim gut ol pikinini bilong mi.

“Mi Painim As Tru Bilong i Stap Bilong Mi.”​​—MARCOS PAULO DE SOUSA

KRISMAS: 29

KANTRI: BRASIL

BIPO: PILAI MUSIK LONG TRES METAL BEN

LAIP BILONG MI LONG BIPO: Famili bilong mi i sindaun long Jaguariuna, long São Paulo. Papamama bilong mi ol i strongpela Katolik, na taim mi yangpela, mi mekim wok long alta. Olsem na ol wanklas long komiuniti skul i tok bilas long mi. Tasol taim mi gat 15 krismas, mi kisim save long hevi metal rok musik. Mi kirap bung wantaim ol man bilong mekim rok musik. Mi larim gras bilong mi i go longpela. Na long 1996, papa i helpim mi long baim ol namba wan dram bilong mi long pilaim musik.

Long 1998, mi joinim wanpela tres metal rok ben. Musik mipela i pilaim i kamapim ol tingting bilong Satan na ol tok doti, na i litimapim pasin bilong pait. Musik i stiaim tingting, pasin, na laik bilong mi. Pasin bilong mi i go nogut moa na mi save belhat hariap.

BAIBEL I SENISIM I STAP BILONG MI: Long 1999, em namba wan taim mi bungim ol Witnes Bilong Jehova. Ol i tokim mi olsem ol i laik stadi long Baibel wantaim mi, na mi kirap stadi, maski mi no gat strongpela laik long kisim save. Tasol ol samting mi lainim long Baibel i mekim na mi kisim nupela tingting long i stap bilong mi.

Ol man i save long mi olsem “man i gat longpela gras,” “hapman bilong pilaim rok musik,” o “man bilong paitim dram.” Tasol mi luksave olsem pasin bilong pilaim musik long ben i mekim na mi tingim mi yet tasol na kisim pasin bilong resis wantaim ol narapela. Mi no amamas long nem mi kisim. Mi luksave olsem ol man em mi singsing wantaim ol, i stap bilong ol i no gat as tru bilong en. Isi isi mi kisim save olsem sapos mi laik bai God Jehova i amamas long mi, mi mas lusim hevi metal musik na pasin bilong pamuk na lotuim god giaman, em ol pasin i kamap long rot bilong dispela kain musik.

Mi laikim tru musik na longpela gras bilong mi. Mi tingting planti, nogut mi no inap i stap laip sapos mi no gat ol dispela samting. Na tu, mi man bilong belhat na kros na mi save olsem mi mas lain long bosim gut bel. Tasol long rot bilong stadi long Baibel, mi kirap laikim tru Jehova. Mi kisim save long pasin laikim bilong God, na pasin isi, na marimari bilong em na dispela i kirapim mi long laikim em. Mi beten askim Jehova long helpim mi long senisim pasin bilong mi, na em i bin helpim mi. Mi kisim save olsem tok bilong Hibru 4:​12, em i tru. Dispela ves i tok: “Tok bilong God em i gat laip, na em i wok strong i stap.”

Taim mi kirap bung wantaim ol Witnes Bilong Jehova, mi luksave olsem ol i gat narapela pasin. Em namba wan taim long laip bilong mi long lukim olsem ol i gat pasin laikim tru. Dispela pasin i kamap ples klia tru long ol bikpela kibung bilong ol Witnes. Mi kirap nogut long lukim ol volantia i givim bel tru long mekim wok bambai ol man i kam bung ol i ken stap gut.

GUTPELA SAMTING I PAINIM MI: Jehova i helpim mi, na nau mi inap bosim gut bel bilong mi. Mi pilim olsem mi no gat moa pasin bilong tingim mi yet na pasin antap.

Mi mas tok tru olsem inap sampela haptaim mi gat laik yet long sindaun bilong mi long bipo​—tasol nau, nogat. Nau mi painim pinis as tru long i stap bilong mi. Mi amamas olsem mi lain long tingim gut ol narapela na mi laik helpim ol.

“Mi Amamas Long Tingim Gut Ol Narapela.”​​—GEOFFREY NOBLE

KRISMAS: 59

KANTRI: AMERIKA

BIPO: SAKIM OL LOTU NA GAVMAN

LAIP BILONG MI LONG BIPO: Mi kamap bikpela long Ipswich, Massachusetts, wanpela taun i stap long nambis na planti wokman i sindaun long en. Taim mi bikpela pinis, mi go sindaun long wanpela ples kanaka long hap bilong Vermont. Mitupela gelpren bilong mi i no holim planti samting olsem planti man long Not Amerika i holim. Mipela i no gat pawa, olsem na mipela i laitim paia insait long haus na kukim kaikai long paiawut mipela i kisim long bus. Mipela i gat wanpela toilet i stap ausait long haus, na klostu yia olgeta mipela i no gat tep wara. Mipela i sakim pasin na sindaun bilong ol man, na bilas bilong mipela i kamapim klia dispela samting. Wanpela taim mi hambak olsem mi no komim gras bilong mi inap 6-pela mun.

Long dispela taim, Amerika i insait long Woa Bilong Vietnam. Dispela i mekim na mi no gat stretpela tingting long gavman. Mi lukim pasin giaman bilong gavman na lotu. Mi pilim olsem ol dispela lain i no gat bekim bilong ol askim, na ol wan wan man yet i mas makim wanem samting i stret na wanem samting i no stret. Olsem na mi no ting i gat rong long stilim ol samting mi sot long en.

BAIBEL I SENISIM I STAP BILONG MI: Mitupela gelpren i kirap ritim Baibel, tasol mipela i no klia liklik long ol tok bilong en. Mi kisim ol drak, tasol mi traim long lusim. Gelpren bilong mi i laik bai mitupela i marit na kamapim pikinini. Long dispela taim, wanpela Witnes Bilong Jehova i kam lukim mipela long haus, na em i kirap stadi long Baibel wantaim mipela.

I no longtaim na mi lusim ol pasin nogut; tasol i hatwok moa long senisim tingting bilong mi long wok bos bilong ol lotu na gavman. Mi gat tupela tingting long olgeta samting. Taim mi go bikpela, mi yet i no gat ol lo i stiaim pasin bilong mi, olsem na i hatwok long mi long bihainim ol lo bilong ol narapela.

Long olgeta taim mi bilip long wanpela Man Bilong Wokim yumi, maski mi no save gut long em. Tasol taim mi stadi long Baibel, mi kisim gut save long pasin bilong God Jehova. Mi luksave olsem em i kamapim long ples klia ol samting em i laik mi mas mekim. Ol lo bilong em i klia tru. Na tu, mi kisim save olsem em i gat tingting long mekim dispela graun i kamap wanpela paradais. (2 Pita 3:13) Ol dispela tok i tru i mekim na mi laik senisim pasin bilong mi, bambai mi inap winim mak long mekim wok bilong em.

Mi pilim tru pasin bilong ol Witnes Bilong Jehova long ol i no laik insait long woa. Mi no save long narapela lotu i stap long olgeta hap na ol i bihainim dispela wankain lo em Baibel i as bilong en.

Mi save olsem sapos mi laik lotuim Jehova, mi mas senisim bilas na klos bilong mi. Pastaim mi no amamas tumas long bihainim pasin bilong ol Witnes long bilas na putim klos. Mi na ol pren bilong mi, mipela i no gat gutpela siot, trausis, o su. Na tu, mi no gat nektai! Tasol mi katim gras bilong mi na mekim lukluk bilong mi i kamap gutpela moa. Maski i olsem, mi tingim yet namba wan taim mi go autim tok long ol haus. I gat wanpela glas na mi lukim mi yet long en. Mi tingting planti, ‘Mi bin mekim wanem?’ Bihain mi amamas long nupela lukluk bilong mi.

GUTPELA SAMTING I PAINIM MI: Mi maritim gelpren bilong mi, na mipela i amamas yet long marit bilong mipela. Mitupela i bin mekim bikpela long 3-pela pikinini bilong mipela na ol i laikim tru Jehova na mekim wok bilong em. Na tu, mi amamas long mi bin helpim sampela long kisim save long tok i tru bilong Baibel, em wankain tok i bin helpim mi long senisim laip bilong mi.

Bipo mi hambak olsem mi no save wari long tingting bilong ol narapela man. Nau mi amamas long gutpela samting mi kisim long pasin bilong tingim gut ol narapela na long ol narapela i tingim mi.

[Rait long pes 26]

“Mi save wokabaut inap planti kilomita bilong kisim wanpela sigaret mariwana”

[Rait long pes 28]

“Ol samting mi lainim long Baibel i mekim na mi kisim nupela tingting long i stap bilong mi”

[Rait long pes 29]

“Mi no amamas tumas long bihainim pasin bilong ol Witnes long bilas na putim klos”