Baibel i Save Senisim i Stap Bilong Man

Wanpela meri husat i save hait na salim ol daimon i gat tambu long en, na i save stil long bos bilong em, wanem samting i mekim na em i kamap wokmeri em ol narapela i trastim? Wanpela meri husat i bin traim long suasaid tupela taim, wanem samting i bin helpim em na nau i stap bilong em i gat as bilong en? Wanpela man husat i save dring planti na kisim drak, olsem wanem em i kisim strong bilong sakim ol dispela pasin em ol inap bagarapim em? Tingim tok ol i mekim.

DISPELA MERI

NEM: MARGARET DEBRUYN

KRISMAS: 45

KANTRI: BOTSWANA

BIPO: HAIT NA SALIM DAIMON, NA STIL

LAIP BILONG MI LONG BIPO: Papa bilong mi em i bilong Jemani, tasol em i kamap sitisen bilong Saut-Wes Afrika (nau ol i kolim Namibia). Mama bilong mi, em i bilong Botswana, bilong lain Mangologa. Mama i karim mi long taun Gobabis, Namibia.

Long 1970 samting, gavman bilong Saut Afrika i bosim strong Namibia na ol i strong long ol man i mas bihainim ol lo apartheid long ol taun na long ol viles. Papa bilong mi em i waitman na Mama em i blakmeri, olsem na ol i mas katim marit. So Mama i kisim mi na ol bratasusa bilong mi na i go bek sindaun long Gansi, long Botswana.

Long 1979, mi go sindaun long Lobatse, long Botswana, na mi stap wantaim waspapamama na bai mi ken pinisim skul bilong mi. Bihain, mi mekim wok kuskus long wanpela woksop. Long sindaun mi kamap bikpela long en, mi bilip olsem God i no save lukautim ol manmeri, olsem na yu mas mekim olgeta samting yu inap mekim​—maski i gat rong long en o nogat​—bilong lukautim yu yet na famili bilong yu long ol samting bilong skin.

Mi holim wok i gat namba, olsem na mi yusim dispela bilong stilim ol speapat bilong ka long ples wok bilong mi. Taim tren i kam long taun long nait, mi wantaim ol poroman i save kalap long tren na stilim ol samting. Na tu, mi save salim ol daimon, gol, na bras long pasin hait i go long ol narapela kantri. Mi kirap long kisim drak, kros pait, na mi gat planti boipren.

Orait long 1993, ol i lukim mi stil na ol i rausim mi long wok. Ol pren giaman bilong mi i lusim mi, long wanem, ol i pret long bos bai painimaut olsem ol tu i save stil. Pasin ol i mekim long mi i bagarapim tru bel bilong mi, na mi no gat moa bilip long wanpela man.

BAIBEL I SENISIM I STAP BILONG MI: Long 1994, mi bungim Tim na Virginia, em tupela misineri bilong ol Witnes Bilong Jehova. Ol i toktok wantaim mi long nupela ples wok bilong mi na helpim mi long lain long ol tok bilong Baibel long taim bilong belo. Bihain, taim mi pilim olsem mi ken bilip long ol, mi singautim ol i kam long haus bilong mi long stadi wantaim mi long Baibel.

Mi luksave olsem, bilong mi ken amamasim God, mi mas mekim sampela senis long laip bilong mi. Olsem, tok bilong 1 Korin 6:​9, 10 i skulim mi olsem “ol man i save mekim pasin pamuk, . . . na ol stilman, na ol man i save mangal long ol samting bilong ol arapela man, na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God.” Isi isi mi wok long lusim ol pasin nogut bilong mi. Mi lusim pasin bilong stil. Mi no poromanim moa ol lain raskol em mipela i kamap bikpela wantaim. Bihain mi kisim strong long Jehova na mi lusim ol boipren bilong mi.

GUTPELA SAMTING I PAINIM MI: Mi wok strong tru na mi bin lain long bosim pasin bilong mi long belhat na mi no ken singaut bikmaus long ol pikinini taim ol i mekim sampela samting i no stret. (Efesus 4:​31) Mi traim long toktok long pasin isi. Dispela pasin bilong mekim tok isi i kamapim gutpela samting na mekim mipela famili i pas gut wantaim.

Ol pren bilong mi long bipo, na ol neiba tu, i kisim save olsem ol i ken trastim mi. Mi kamap olsem wokmeri i no save stil na ol narapela i trastim mi​—mi save lukautim gut ol kago na mani. Long dispela rot mi inap lukautim mi yet long ol samting bilong skin. Mi lusim bikpela hap taim tu long helpim ol narapela long kisim save long Baibel. Mi wanbel tru long tok bilong Sindaun 10:22: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”

DISPELA MERI

NEM: GLORIA ELIZARRARÁS DE CHOPERENA

KRISMAS: 37

KANTRI: MEKSIKO

BIPO: TRAIM LONG SUASAID

LAIP BILONG MI LONG BIPO: Mi kamap bikpela long wanpela hap we ol maniman tasol i save sindaun long en, long Naucalpan, long Meksiko. Taim mi yangpela yet, mi save bikhet na mi save laikim tru long i go long ol pati. Long taim mi gat 12 krismas, mi kirap long smok, na long 14 krismas mi kirap dring, na long 16 krismas mi kirap kisim drak. Sampela yia bihain, mi lusim famili. Planti bilong ol pren bilong mi em famili bilong ol i bin paitim ol na toknogutim ol na ol i no pas gut wantaim. Mi pilim olsem laip i no gat as bilong en, olsem na tupela taim mi traim long suasaid.

Taim mi gat 19 krismas, mi kirap mekim wok olsem model na mi poromanim ol man i go long ol bung samting. Mi save bung wantaim ol lain bilong mekim wok politik na ol piksa wokabaut samting. Bihain, mi marit na mi gat ol pikinini, tasol mi yet i save wokim olgeta disisen insait long famili bilong mi. Mi wok yet long dring na smok na insait long ol pati samting. Taim mi toktok, mi save kolim ol tok nogut na mekim ol tok pilai doti. Na tu, mi gat pasin bilong belhat kwik.

Klostu olgeta pren bilong mi i gat wankain sindaun olsem mi. Long ai bilong ol, i olsem mi stap amamas. Tasol mi no amamas na mi pilim olsem i stap bilong mi i no gat as bilong en.

BAIBEL I SENISIM I STAP BILONG MI: Long 1998, mi kirap stadi long Baibel wantaim ol Witnes Bilong Jehova. Baibel i lainim mi olsem i stap bilong yumi i gat as bilong en. Mi lain olsem God Jehova i tingting long kamapim bek Paradais long graun, na em bai kirapim bek ol man i dai pinis, na mi inap stap long dispela taim.

Mi kisim save tu olsem, bilong kamapim klia olsem mi laikim God, mi mas bihainim lo bilong em. (1 Jon 5:3) Pastaim mi pilim olsem dispela em i hatwok, long wanem, mi no save bihainim tok bilong ol narapela. Tasol bihain, mi luksave olsem mi yet i no inap bosim wokabaut bilong mi. (Jeremaia 10:23) Mi beten askim Jehova long stiaim mi. Mi askim em long helpim mi long mekim ol samting i stret wantaim ol stiatok bilong em, na bai mi ken skulim ol pikinini bilong mi na bai sindaun bilong ol i no ken kamap wankain olsem bilong mi.

Mi hatwok tru long mekim ol senis, tasol mi kirap bihainim tok i stap long Efesus 4:​22-​24: “Bipo yupela tu i bin wokabaut long pasin bilong olpela man. . . . Tasol nau yupela i mas rausim dispela olpela pasin na tingting bilong yupela i mas kamap nupela. Yupela i mas kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” Long mi, bilong kamap nupela mi mas lusim ol pasin doti olsem pasin bilong smok, na tu, mi mas lain long lusim pasin bilong tok nogut. Inap tripela yia i lus na mi mekim ol senis mi mas mekim na bai mi ken kisim baptais olsem wanpela Witnes Bilong Jehova.

Na tu, mi tingim olsem mi mas mekim gut wok bilong mi olsem meri marit na mama. Mi kirap bihainim tok i stap long 1 Pita 3:​1, 2: “Yupela maritmeri, yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel, long wanem, ol i lukim yupela meri i save wokabaut stret na aninit tru long ol.”

GUTPELA SAMTING I PAINIM MI: Mi tenkyu tru long Jehova, long wanem, nau mi save olsem laip i gat as tru bilong en. Mi pilim olsem mi wanpela gutpela meri na mi mekim bikpela long ol pikinini bilong mi long gutpela rot. Sampela taim, bel bilong mi i save kotim mi long ol pasin mi bin mekim long bipo, tasol Jehova i save long bel bilong mi. (1 Jon 3:​19, 20) Tru tumas, pasin bilong bihainim ol stretpela lo bilong Baibel i lukautim mi long ol samting inap bagarapim mi, na i givim bel isi long mi.

DISPELA MAN

NEM: JAILSON CORREA DE OLIVEIRA

KRISMAS: 33

KANTRI: BRASIL

BIPO: DRING PLANTI ALKOHOL NA KISIM DRAK

LAIP BILONG MI LONG BIPO: Mama i karim mi long Baģe, wanpela taun bilong Brasil, em i stap klostu long boda bilong Brasil na Uruguay na i gat olsem 100,000 manmeri i sindaun long en. Nambawan wok bisnis bilong ol man long dispela hap em wok gaden na lukautim bulmakau. Mi kamap bikpela long ples we planti man i stap rabis na i gat ol lain raskol i save pait, na planti yangpela i save dring planti na kisim drak.

Bihain long mi lusim skul, mi kirap long dring, smokim mariwana, na harim ol musik hevi-metal. Mi no bilip long God. Mi ting olsem olgeta pen na hevi i painim ol man na ol pasin nogut long graun, ol dispela samting i kamapim klia olsem God i no stap.

Mi save raitim singsing na pilaim gita, na planti taim mi kisim ol tok long Buk Kamapim Tok Hait long Baibel bilong mekim olsem. Singsing grup bilong mi i no kamap gutpela, olsem na mi kirap kisim ol strongpela drak nogut. Mi no wari sapos dispela i kilim mi i dai. Planti man bilong singsing em mi save adorim, ol i bin mekim olsem na i dai.

Bilong baim drak, mi save kisim dinau mani long bubu mama bilong mi, em husat i bin mekim bikpela long mi. Mi save giamanim em taim em i askim mi long wanem wok mi mekim long dispela mani. Samting i mekim na i hatwok moa i olsem, mi insait long wok bilong ol spirit nogut. Mi insait long mekim blak-pawa, na mi ting dispela bai helpim mi long kamapim ol gutpela musik.

BAIBEL I SENISIM I STAP BILONG MI: Taim mi kirap stadi long Baibel na i go long ol miting bilong ol Witnes Bilong Jehova, tingting na pasin bilong mi i wok long senis. Isi isi mi kisim dispela laik bilong i stap laip na i stap amamas. Dispela nupela tingting i kirapim mi long katim longpela gras bilong mi. Mi bin larim gras bilong mi i gro longpela bilong soim olsem mi no amamas na mi save bikhet. Bihain mi luksave olsem bilong God i ken orait long mi, mi mas lusim drak na smok na pasin bilong dring planti alkohol. Na tu, mi lukim olsem mi mas senisim ol musik mi save harim.

Namba wan taim mi go long wanpela miting bilong ol Witnes Bilong Jehova, mi lukim wanpela tok bilong Baibel em ol i raitim na putim long wol bilong Haus Kingdom. Em tok bilong Sindaun 3:​5, 6: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” Taim mi tingim dispela skripsa, dispela i strongim bel bilong mi olsem Jehova bai helpim mi long senisim laip bilong mi sapos mi larim em i mekim olsem.

Tasol bilong senisim pasin mi bin bihainim inap longtaim pinis, na lusim pasin bilong dring planti na kisim olkain drak samting, dispela i gat hatwok tru long en, i kain olsem mi mas katim na rausim han bilong mi. (Matyu 18:​8, 9) Mi no inap mekim ol dispela senis isi isi. Olsem na wantu mi lusim olgeta pasin nogut bilong mi long wankain taim tasol. Mi abrusim ol ples na ol manmeri em ol inap pulim mi i go bek long bihainim olpela pasin bilong mi.

Mi lain long amamas long ol samting mi mekim long olgeta wan wan de, na mi no tingim tumas bel hevi bilong mi. Mi pilim olsem em i gutpela samting tru long stap klin long ol samting bilong skin, na pasin, na pas gut wantaim Jehova. Mi beten na kisim helpim long Jehova na bai mi no ken lukluk i go bek long ol samting mi lusim, tasol mi mas lukluk i go long ol samting bilong bihain. Sampela taim mi pundaun na mekim gen ol olpela pasin bilong mi. Tasol mi save strong yet long mekim Baibel stadi bilong mi wantaim tisa bilong mi, maski sampela taim spak bilong mi i stap yet.

Taim mi kisim save long tok i tru bilong Baibel long God em i wanem kain​​—olsem em i tingim tru yumi wan wan, na em bai bagarapim ol lotu giaman, na nau em i sapotim wok autim tok long olgeta hap bilong graun​​—ol dispela tok i stret long tingting bilong mi. (Matyu 7:​21-​23; 24:14; 1 Pita 5:​6, 7) Orait nau, mi dediketim laip bilong mi long Jehova. Mi laik soim em olsem mi tenkyu long olgeta samting em i mekim long mi.

GUTPELA SAMTING I PAINIM MI: Nau mi pilim olsem laip bilong mi i gat as tru bilong en. (Saveman 12:13) Nau mi save helpim famili bilong mi, mi no moa putim hevi long ol. Mi tokim tumbuna mama bilong mi long ol gutpela samting long Baibel mi lainim, na nau em i dediketim laip bilong em long Jehova. Sampela long famili bilong mi na wanpela man bipo mi save singsing wantaim em, ol i dediketim laip bilong ol tu long Jehova.

Nau mi marit, na mi na meri bilong mi i save lusim bikpela hap taim long helpim ol narapela long kisim save long Baibel. Mi pilim olsem mi kisim gutpela samting tru, long wanem, nau mi “bilip strong long Bikpela.”

[Rait long pes 29]

“Isi isi mi kisim dispela laik bilong i stap laip na i stap amamas”