Tupela Nupela Brata Long Lain Gavening Bodi

LONG Trinde, Janueri 18, 2023, wanpela spesel toksave i kamap long jw.org, i gat tokaut olsem ol i makim Brata Gage Fleegle na Jeffrey Winder long mekim wok insait long lain Gavening Bodi bilong ol Witnes Bilong Jehova. Tupela brata wantaim i stap gut long mekim wok bilong Jehova inap longpela taim.

Papamama bilong Brata Fleegle i mekim bikpela long em long tok i tru long hap wes bilong Pennsylvania, Amerika. Taim em i tineja, famili bilong em i muv i go long wanpela liklik taun we i gat bikpela nid bilong ol pablisa. I no longtaim bihain, em i kisim baptais long Novemba 20, 1988.

Oltaim papamama bilong Brata Fleegle i kirapim em long insait long fultaim sevis. Planti taim ol i save invaitim ol wasman sekit na ol Betelait i kam long haus bilong ol, na Brata Fleegle inap lukim olsem ol dispela bratasista i stap amamas tru. I no longtaim bihain long em i kisim baptais, em i kirap mekim wok painia oltaim long Septemba 1, 1989. Tupela yia bihain, em i inapim wanpela mak em i bin putim taim em i gat 12-pela krismas—em mak bilong wok long Betel. Em i kirapim wok bilong em long Brooklyn Betel long Oktoba 1991.

Long Betel, Brata Fleegle i wok long hap bilong baindim ol buk inap 8-pela yia, bihain ol i makim em long wok long Sevis Dipatmen. Long dispela taim, em i stap long wanpela kongrigesen i mekim tokples Rasia inap sampela yia. Long 2006, em i maritim meri bilong em Nadia, na em i joinim Brata Fleegle long wok long Betel. Tupela wantaim i stap long kongrigesen i mekim tokples Potugal, na winim 10-pela yia ol i stap long kongrigesen i mekim tokples Spen. Bihain long Brata Fleegle i mekim wok long Sevis Dipatmen inap planti yia, ol i makim em long wok long ofis bilong Komiti Bilong Wok Tisa na bihain long en, em i wok long ofis bilong Sevis Komiti. Long Mas 2022, ol i makim em long stap olsem helpim bilong Sevis Komiti bilong lain Gavening Bodi.

Brata Winder i kamap bikpela long Murrieta, California, Amerika. Papamama bilong em i mekim bikpela long em long tok i tru, na em i kisim baptais long Mas 29, 1986. Long mun bihain, em i kirap mekim wok painia haptaim. Em i laikim tru dispela wok, olsem na em i laik wok yet long mekim wok painia. Em i mekim painia haptaim inap sampela mun, na bihain em i kirap mekim painia oltaim long Oktoba 1, 1986.

Taim Brata Winder i tineja, em i go visitim tupela bikpela brata bilong em i mekim wok long Betel long dispela taim. Dispela i kirapim laik bilong em long mekim wok long Betel taim em i go bikpela. Na long Me 1990, em i kisim invatesen long i go wok long Wallkill Betel.

Long Betel, Brata Winder i wok long narapela narapela dipatmen, olsem Klining Dipatmen, Fam Dipatmen, na Betel Ofis. Long 1997, em i maritim meri bilong em Angela, na kirap long dispela taim na i kam inap long nau ol i wok long Betel. Long 2014 ol i muv i go long Warwick, long dispela hap Brata Winder i helpim wok konstraksen bilong wol hetkota. Long 2016, ol i muv i go long Wastaua Ediukesen Senta long Patterson, long dispela hap Brata Winder i wok long Audio/Video Services. Na 4-pela yia bihain, ol i muv i go bek long Warwick, na Brata Winder i kisim asainmen long wok long ofis bilong Komiti Bilong Lukautim Ol Wokman. Long Mas 2022, ol i makim em long stap olsem helpim bilong Komiti Bilong Lukautim Ol Wokman bilong Gavening Bodi.

Yumi beten olsem Jehova i ken blesim ol dispela “man olsem ol presen” em ol i wok yet long givim bel olgeta long sapotim ol wok bilong Kingdom.—Efe. 4:8.