1925​​—Wan Handret Yia i Go Pinis

OL SAMTING MIPELA I TINGTING LONG EN I NO KAMAP

Long 1925, planti Sumatin Bilong Baibel i ting olsem God bai mekim dispela graun i kamap wanpela Paradais gen. Bilong wanem ol i holim kain tingting olsem? Brata Albert Schroeder em bihain em i mekim wok long lain Gavening Bodi, em i tok: “Mipela i bin ting olsem liklik hap lain brata bilong Krais em God i bin makim ol na ol i stap yet long graun, ol bai go long heven na insait long Kingdom. Na tu, mipela i ting olsem ol bilipman bilong bipo olsem Abraham, Devit, na ol narapela, ol bai kirap bek olsem ol prins na mekim wok long wanpela gavman em hap bilong Kingdom Bilong God na ol bai bosim dispela graun.” Taim samting ol i tingting long en i no kamap long dispela yia, dispela i mekim na sampela bilong ol i bel hevi.—Prov. 13:12.

Maski ol i gat dispela bel hevi, planti Ol Sumatin Bilong Baibel i bisi yet long autim tok na ol i wok long luksave moa yet olsem em i bikpela samting tru long ol i mas mekim wok olsem ol Witnes Bilong Jehova. Olsem, tingim wok ol i mekim long yusim redio brodkas long autim tok long planti manmeri moa long olgeta hap bilong graun.

WOK BILONG REDIO BRODKAS I GO BIKPELA

Long 1924, planti manmeri i wok long harim WBBR redio stesin, olsem na long 1925 Ol Sumatin Bilong Baibel i wokim narapela bikpela redio stesin. Long dispela taim, ol i wokim dispela redio stesin klostu long Chicago, Illinois. Nem bilong dispela nupela redio stesin em WORD. Ralph Leffler em wanpela redio ensinia husat i bin insait long wok konstraksen bilong dispela redio stesin, em i tok: “Long taim bilong winta long taim nait i kol nogut tru, planti manmeri long olgeta hap i save harim dispela redio stesin WORD.” Olsem, wanpela famili em ol i stap moa long 5,000 kilomita longwe long Pilot Station, Alaska, ol i bin harim wanpela bilong ol fes brodkas bilong dispela redio stesin. Bihain long ol i harim dispela brodkas, dispela famili i raitim wanpela pas long ol brata i wok long dispela redio stesin na ol i tok tenkyu long ol i helpim ol long kisim sampela save moa long God na long Baibel.

Nius Was Taua bilong Disemba 1, 1925 i stori long olsem wanem planti man long olgeta hap bilong graun i putim yau long dispela redio stesin. Em i tok: “Dispela redio stesin WORD em i wanpela bilong ol gutpela redio stesin long olgeta hap bilong Amerika, na em i save ron long 5,000 wats. Risepsen bilong dispela redio stesin i gutpela tru, olsem na ol manmeri long Is na Wes kos bilong Amerika i ken harim brodkas bilong en, na tu, ol lain i stap long Kuba na longwe tru long hap not bilong Alaska i ken harim dispela brodkas. Planti em ol i no bin harim tok i tru long bipo, ol i amamas tru long harim brodkas long dispela redio stesin.”

Long dispela wankain taim, Ol Sumatin Bilong Baibel i laik tu long yusim redio brodkas long autim gutnius long Kanada. Long 1924, ol i wokim redio stesin CHUC long Saskatoon, Saskatchewan. Em i wanpela bilong ol fes redio stesin bilong lotu long Kanada. Long 1925, ol i laik muvim dispela liklik redio stesin i go long wanpela bikpela bilding. Olsem na Watch Tower Society i baim dispela redio stesin na muvim ol brodkasting studio bilong en i go long Regent Building, em i wanpela olpela haus tieta long Saskatoon em ol i bin baim na stretim bilong mekim ol redio brodkas.

Dispela redio stesin i bin helpim planti manmeri i stap long ol liklik taun na ol ples i stap longwe long ol liklik taun bilong Saskatchewan long harim gutnius long festaim. Olsem, long wanpela taun i stap longwe tru, wanpela meri em nem bilong em Mrs. Graham i bin putim yau long wanpela brodkas na bihain em i raitim pas long ol brata na askim ol long salim ol litresa bilong Baibel i kam long em. Brata George Naish i tok: “Singaut bilong em olsem ‘Skulim mipela!’ i soim klia olsem em i laik tru long save long tok bilong Baibel, olsem na mipela i salim olgeta volium bilong Studies in the Scriptures i go long em.” I no longtaim, Mrs. Graham i wok long autim gutnius bilong Kingdom i go long ol ples i stap longwe tru.

LAINIM WANPELA BIKPELA TOK I TRU

Nius Was Taua bilong Mas 1, 1925, i gat wanpela atikol nem bilong en, “Birth of the Nation.” Wai na ol tok bilong dispela atikol em i bikpela samting tru? Long wanem, inap sampela haptaim Ol Sumatin Bilong Baibel i bin save olsem Satan i gat wanpela oganaisesen em ol spirit nogut i stap long heven i insait long en, na tu, dispela oganaisesen i kontrolim olgeta lotu, ol bikpela bisnis, na ol gavman bilong dispela graun. Tasol long rot bilong dispela atikol, “gutpela wokboi i gat savetingting” i helpim ol bratasista long luksave olsem Jehova tu i gat wanpela oganaisesen, na dispela oganaisesen i no wankain long oganaisesen bilong Satan na em i sakim Satan na ol lain i bihainim em. (Mat. 24:45) Na tu, gutpela wokboi i tokaut olsem Kingdom Bilong i kirap mekim wok long yia 1914, na long dispela wankain yia “woa i kamap long heven” na ol i tromoi Satan na ol spirit nogut bilong em i kam daun long graun na ol i no inap go bek long heven.—Rev. 12:​7-9.

Sampela i pilim hatwok long bilipim dispela nupela save ol i kisim. Dispela atikol i stori long dispela olsem: “Sapos i gat sampela em ol i ritim dispela Was Taua na ol i no wanbel long ol tok ol i ritim, orait i gutpela ol i stap isi na ol i wetim Bikpela, na oltaim bel bilong ol i mas gutpela.”

Tasol wanpela kolpota (nau yumi kolim painia) em nem bilong em Tom Eyre na em i bilong Briten, em i stori long hau planti Sumatin Bilong Baibel i pilim taim ol i ritim dispela atikol, em i tok: “Ol bratasista i amamas tru long nupela save ol i kisim long Revelesen sapta 12. Taim mipela i luksave olsem dispela Kingdom i kirap pinis long mekim wok bos long heven, mipela i laik tru long autim dispela gutnius long ol narapela. Dispela i kirapim mipela long givim bel long mekim planti wok moa, na tu, i helpim mipela long luksave long olsem wanem Jehova i wok long stiaim lain bilong em long wetim ol bikpela samting bai kamap bihain.”

STAP OLSEM OL WITNES BILONG JEHOVA

Long nau, ol Witnes Bilong Jehova i save gut tru long tok bilong Aisaia 43:​10, em i tok: “Jehova i tok, ‘Yupela i witnes bilong mi, yes, wokman bilong mi em mi bin makim.’” Tasol paslain long yia 1925, ol pablikesen bilong yumi i no stori planti long ol tok bilong dispela skripsa. Tasol bihain ol samting i senis. Long 1925, nius Was Taua i stori long ol tok bilong Aisaia 43:10 na 12 long 11-pela nius Wastaua bilong stadi!

Long pinis bilong Ogas 1925, Ol Sumatin Bilong Baibel i bung long wanpela kibung long Indianapolis, Indiana. Ol i raitim tok bilong Joseph F. Rutherford long program pepa bilong kibung. Em i tok: “Yumi kam long dispela kibung bilong . . . . Bikpela i ken strongim yumi bai yumi kisim nupela strong olsem ol witnes bilong em na autim tok long ol manmeri.” Olgeta manmeri i kam long dispela 8-pela de kibung, ol i kisim nupela strong long autim tok bilong Jehova long olgeta taim rot i op long mekim olsem.

Long Sarere, Ogas 29, Brata Rutherford i mekim wanpela tok em tim bilong en “A Call to Action.” Long dispela tok, em i stori olsem wok autim tok em i bikpela samting tru na em i tok: “Jehova i tokim lain manmeri bilong em olsem . . . : ‘Yupela i witnes bilong mi, na mi God tru.’ Na bihain em i mekim dispela strongpela tok olsem: ‘Yupela i stap olsem mak bilong olgeta lain manmeri i ken lukim.’ I no gat wanpela lain long dispela graun em ol i stap olsem mak em ol narapela inap lukim, tasol lain bilong Jehova wanpela tasol i stap olsem mak em olgeta lain manmeri i ken lukim, em ol i gat spirit bilong Bikpela na ol i stap olsem ol witnes bilong em.”—Ais. 43:12; 62:​10, BB.

Bihain long Brata Rutherford i mekim dispela tok, em i ritim wanpela resolusen taitol bilong en, “Message of Hope,” na olgeta long odiens i wanbel long dispela tok olsem Kingdom Bilong God wanpela tasol “bai bringim bel isi, gutpela sindaun, gutpela helt, givim laip long man, helpim ol man long stap fri na stap amamas inap oltaim.” Bihain ol i tanim dispela tok i go long sampela tokples na ol i prinim tu long wanpela liklik nius. Na ol i tilim inap olsem 40 milion kopi samting long ol manmeri.

Inap sampela yia i lus, tasol Ol Sumatin Bilong Baibel i no senisim yet nem bilong ol i go kamap ol Witnes Bilong Jehova. Maski i olsem, ol i luksave long bikpela wok ol i mas mekim olsem ol witnes bilong em.

GO BEK LUKIM OL MAN I LAIK HARIM TOK

Taim namba bilong ol Sumatin Bilong Baibel long olgeta hap bilong graun i wok long i go bikpela moa, ol i kirapim ol bratasista long go bek na visitim ol lain em ol i amamas long putim yau long gutnius ol i bin autim long ol long pastaim. Bihain long ol i mekim kempein bilong tilim dispela liklik nius Message of Hope, nius Bulletina i tokaut olsem: “Stretim rot bilong go bek na visitim ol manmeri em yupela i no bin tilim litresa long ol, tasol yupela i bin lusim liklik nius Message of Hope long ol.”

Nius Bulletin bilong Janueri 1925 i kamapim tu ripot bilong wanpela Sumatin Bilong Baibel long Plano, Texas, em i tok: “Mipela i kirap nogut olsem taim mipela i go bek long ol teritori mipela i autim tok long en long bipo, ol manmeri i amamas moa long putim yau winim taim mipela i autim tok long ol nupela ples. Insait long 10-pela yia i go pinis, inap 5-pela taim mipela i go bek autim tok long wanpela liklik taun long teritori bilong mipela. . . . I no longtaim i go pinis, Sista Hendrix na mama bilong mi i go bek na autim tok long dispela ples na ol i tilim planti buk moa winim long bipo.”

Na long Panama, wanpela kolpota i tok: “Planti em pastaim ol i no laik putim yau, ol i senisim tingting na ol i amamas long putim yau taim mi go bek na autim tok long ol long namba 2 o namba 3 taim. Long yia i go pinis, mi lusim bikpela haptaim long go bek na autim tok long ol lain mi bin autim tok long ol pastaim na planti gutpela samting i kamap long wok autim tok bilong mi.”

LUKLUK I GO HET

Long pinis bilong 1925, long pas em i save raitim long ol kolpota long olgeta yia, Brata Rutherford i stori long wok autim tok ol i mekim long dispela yia na em i stori long ol bikpela wok ol bai mekim long bihain. Em i tok: “Long yia i go pinis, yupela i amamas long mekim isi bel bilong planti manmeri em ol i bel hevi. Dispela wok i mekim yupela i amamas tru . . . Long neks yia, planti moa rot bai op long yupela inap autim tok long God na long kingdom bilong em na long soim klia husat lain i mekim lotu i tru. . . . Yumi olgeta i ken bungim nek wantaim na singim ol song bilong preisim God na King bilong yumi.”

Long pinis bilong 1925, ol brata i wokim plen long mekim Betel long Brooklyn i kamap bikpela moa. Long 1926, oganaisesen i kirap mekim bikpela wok konstraksen projek winim long bipo.