Bihainim Pasin Daun Bilong Jehova

1. Wai na pasin daun bilong Jehova i narakain tru?

TAIM yu lukim ol man i mekim wok bos long ol gavman long nau, yu ting ol i save mekim pasin daun? Nogat tru. Tasol Jehova em God i Gat Olgeta Strong, em i save mekim pasin daun. (Sng. 113:​5-8) Pasin daun i bosim olgeta pasin Jehova i mekim, na i no gat wanpela taim em i save mekim pasin antap. Yumi bai kisim helpim taim yumi skelim 4-pela naispela pasin bilong Jehova, na luksave long hau ol dispela pasin bilong em i soim olsem em i gat pasin daun. Na yumi bai skelim tu hau Jisas i bihainim pasin daun bilong Papa bilong em. Taim yumi skelim ol dispela pasin, dispela bai helpim yumi long go klostu moa long Jehova na bihainim tru pasin daun bilong em.

OL MAN I PILIM ISI MOA LONG TOKTOK WANTAIM JEHOVA

2. Ol tok bilong Buk Song 62:8 i tok wanem long Jehova? (Lukim tu piksa.)

² Ol man i gat pasin antap em hatwok long ol narapela i toktok wantaim ol. Pasin antap bilong ol i save kirapim ol long mekim ol pasin we i mekim ol narapela i surik long ol o abrusim ol tasol. Tasol Jehova em i no olsem! Papa bilong yumi long heven em i gat pasin daun, olsem na em i kirapim yumi olgeta long toktok wantaim em na kamapim olgeta samting yumi pilim long bel na tingting. (Ritim Buk Song 62:8.) Jehova i save redi long putim yau long ol beten bilong ol wokman bilong em wankain olsem wanpela papa i save tingim tru na redi long harim tingting bilong ol pikinini bilong em. Na em i larim planti bilong ol dispela beten i stap long Baibel. Dispela i soim olsem ol man i save pilim isi moa long toktok wantaim em. (Jos. 10:​12-14; 1 Sml. 1:​10-18) Tasol olsem wanem sapos sampela samting i mekim na yumi pilim olsem yumi no gutpela tumas long toktok wantaim Jehova?

3. Wai na yu ken bilip tru olsem Jehova i laik yu mas beten na toktok wantaim em planti taim?

³ Yumi ken toktok wantaim Jehova long rot bilong beten, maski yumi pilim olsem yumi no gutpela inap long em i laikim yumi. Wai na yumi tok olsem? Long tok piksa bilong Jisas long pikinini i bin lusim papa, em i tok Jehova i wankain olsem dispela papa em pikinini bilong em i tanim bel na kam bek long em, maski em i pilim olsem em i no gutpela inap long papa i laikim em na kisim em i go bek insait long famili. Dispela papa i bin mekim wanem taim pikinini bilong em i kam bek long haus? Jisas i tok taim papa i lukim pikinini i kam longwe yet, “em i ran i go na holimpasim em na givim kis long em.” (Luk 15:​17-20) Jehova i wankain olsem dispela papa. Taim em i harim beten bilong olgeta wan wan man em bel na tingting bilong ol i bagarap tru bikos ol i pilim gilti long ol rong ol i mekim o ol i wari, pasin daun bilong em i save kirapim em long putim gut yau long ol. (Kra. 3:​19, 20) Jehova i save sori tru long yumi na i olsem em i ran i kam bilong mekim gut bel bilong yumi na tokim yumi olsem em i marimari long yumi na laikim yumi. (Ais. 57:15) Long wanem rot i olsem Jehova i ran i kam long yumi long nau? Em i save mekim olsem long rot bilong ol elda, ol wanfamili em ol i wanbilip, na ol narapela bratasista Kristen bilong yumi. (Jems 5:​14, 15) Jehova i givim ol dispela helpim long yumi bikos em i laik yumi stap klostu long em.

4. Wai na ol manmeri i pilim isi long toktok wantaim Jisas?

⁴ Jisas i bihainim pasin bilong Papa bilong em. Jisas i save mekim pasin daun wankain olsem Papa bilong em. Dispela i mekim na taim em i stap long graun, ol manmeri i pilim isi long toktok wantaim em. Ol i pilim isi long givim ol askim long em tu. (Mak 4:​10, 11) So taim em i askim ol long kamapim tingting bilong ol long wanpela samting, ol i save tokim em long ol samting ol i pilim long bel. (Mat. 16:​13-16) Na taim ol i mekim ol popaia ol i no pret, long wanem, ol i save olsem Jisas i gat gutpela pasin, pasin marimari, na em i no save les kwik long ol. (Mat. 17:​24-27) Jisas i bihainim gut tru ol pasin bilong Papa bilong em na long dispela rot ol disaipel bilong em i save gut moa long Jehova. (Jon 14:9) Ol i kisim save olsem Jehova em i no wankain olsem ol hetman bilong lotu long taim bilong ol em ol i gat hatpela pasin, pasin antap, na i hatwok long ol man i go toktok long ol, nogat. Jehova i gat pasin daun, na em i save redi long putim yau long olgeta man.

5. Olsem wanem ol narapela inap pilim isi moa long toktok wantaim yumi taim yumi gat pasin daun?

⁵ Hau yumi ken bihainim pasin bilong Jehova? Taim yumi wok strong long kisim pasin daun, em bai isi moa long ol narapela i toktok wantaim yumi. Pasin daun bai pasim yumi long bel nogut long ol narapela, kisim pasin antap, na i no redi long lusim rong bilong ol narapela, em ol pasin we inap mekim na ol narapela i go longwe long yumi. Tasol pasin daun bai helpim yumi long mekim gutpela pasin, i no les kwik, na redi long lusim rong bilong ol narapela, em ol pasin we bai kirapim ol narapela long pas gut moa wantaim yumi. (Kol. 3:​12-14) Na moa yet, ol elda i mas wok strong long stap olsem ol man em ol narapela i ken pilim isi moa long toktok wantaim ol. Bilong mekim olsem, ol i mas stap long ol hap em ol narapela i stap long en. Dispela i makim olsem ol i mas wok strong long kam long olgeta miting bilong kongrigesen long Haus Kingdom na ol i no ken joinim ol miting long rot bilong vidio konferens tasol. Na sapos i stret long sindaun bilong ol, ol i mas wok wantaim ol narapela bratasista long mekim wok autim tok. Taim ol bratasista i save gut moa long ol elda, ol bai pilim isi moa long toktok wantaim ol taim ol i nidim helpim.

JEHOVA I SAVE REDI LONG BIHAINIM TINGTING BILONG OL NARAPELA

6-7. Wanem ol eksampel i soim olsem Jehova i redi long bihainim tingting bilong ol wokman bilong em?

⁶ Planti manmeri em ol i gat pasin antap, ol i no save bihainim tingting bilong ol narapela. Tasol Jehova em i gat pasin daun, olsem na em i save redi long bihainim tingting bilong ol narapela, maski tingting bilong em i antap moa long tingting bilong olgeta manmeri. Skelim samting em i bin mekim long Miriam em sista bilong Moses. Miriam na brata bilong em Aron i bin komplein long Moses em mausman bilong Jehova. So pasin Miriam i mekim i soim olsem em i no rispek long Jehova. Em as na Jehova i belhat long Miriam na mekim sik lepra i kamap long em. Tasol taim Aron i beten long God na askim em long oraitim Miriam, na Moses i beten strong na askim Jehova long oraitim susa bilong em, God i mekim wanem? God i no mekim pasin antap na ting olsem i stret dispela strafe i mas stap olsem, nogat. Jehova i mekim pasin daun na em i bihainim tingting bilong tupela na em i oraitim Miriam.—Nam. 12:​1-15.

⁷ Jehova i mekim pasin daun tu long pasin em i mekim long King Hesekia. Long rot bilong profet bilong Em, Jehova i tokim king olsem em bai dai long dispela sik bilong em. Hesekia i krai nogut tru na beten askim Jehova long oraitim em. Jehova i sori long em na surikim 15 yia moa long laip bilong em. (2 Kin. 20:​1, 5, 6) Tru tumas, pasin daun bilong Jehova i kirapim em long mekim pasin sori na redi long bihainim tingting bilong ol narapela.

8. Wanem ol eksampel i soim olsem Jisas i save mekim gutpela pasin long ol narapela? (Mak 3:​1-6)

⁸ Jisas i bihainim pasin bilong Papa bilong em. Taim Jisas i stap long graun, em i save mekim gutpela pasin long ol narapela taim i stret long mekim olsem. Olsem, em i bin oraitim ol sikman long de Sabat, maski ol hetman bilong lotu i kros nogut tru long dispela samting. (Ritim Mak 3:​1-6.) Jisas i wok yet long stap olsem gutpela het bilong kongrigesen Kristen long nau. Olsem, taim wanpela long kongrigesen i mekim bikpela sin, em i no les kwik long em na em i givim rot long em long tanim bel na senisim pasin bilong em.—Rev. 2:​2-5.

9. Olsem wanem yumi ken kisim pasin bilong bihainim gutpela tingting? (Lukim tu ol piksa.)

⁹ Hau yumi ken bihainim pasin bilong Jehova? Long pasin daun yumi mas wok yet long bihainim tingting na pasin bilong Jehova long redi long bihainim tingting bilong ol narapela. (Jems 3:17) Olsem, ol papamama husat i redi long bihainim tingting bilong narapela, ol i no putim strongpela lo tumas long ol pikinini bilong ol long bihainim, tasol long wankain taim ol i no ekspektim ol liklik pikinini bilong ol long mekim ol samting ol i no inap long mekim. Wanpela gutpela eksampel em stori bilong Jekop i stap long Stat 33:​12-14. Ol papamama husat i gat pasin daun na i save bihainim gutpela tingting, ol i mas wok strong long sakim pasin bilong skelim wanpela pikinini wantaim narapela pikinini. Ol elda Kristen tu i mas redi long bihainim tingting bilong ol narapela. Wanpela rot ol i ken mekim olsem em long redi long bihainim tingting bilong ol narapela elda insait long lain elda taim dispela i no pait wantaim ol stiatok bilong Baibel. (1 Tim. 3:​2, 3) Na yumi olgeta i ken wok strong long kliagut long tingting bilong ol narapela taim tingting bilong ol i no wankain long tingting bilong yumi. (Rom 14:1) Olgeta long kongrigesen i mas wok strong long soim olsem ol i “save bihainim gutpela tingting.”—Fili. 4:5.

JEHOVA I NO SAVE LES KWIK

10. Long wanem ol rot Jehova i soim olsem em i no save les kwik?

¹⁰ Ating yu luksave olsem ol man i gat pasin antap ol i save les long wet. Pasin antap i mekim na ol i save les kwik. Tasol dispela em i no wankain long Jehova, em Man i gat pasin bilong i no les kwik! Olsem, long taim bilong Noa, Jehova i tok long wet inap 120 yia paslain long Em i bagarapim ol man nogut. (Stt. 6:3) Noa i gat inap haptaim long mekim bikpela long ol pikinini bilong em na bai famili bilong em i ken helpim em taim em i wokim sip. Bihain, ensel bilong Jehova i putim gut yau taim Abraham i kwestenim em long God i laik bagarapim taun Sodom na Gomora. Man i gat pasin antap bai tok, ‘Yu husat na yu kwestenim mi!’ Tasol ensel i bihainim pasin bilong Jehova na em i no les kwik long Abraham taim em i mekim ol dispela askim.—Stt. 18:​20-33.

11. Olsem 2 Pita 3:9 i kamapim, wai na Jehova i soim olsem em i gat pasin bilong i no les kwik long taim bilong yumi?

¹¹ Long pasin daun Jehova i soim olsem em i gat pasin bilong i no les kwik long taim bilong yumi tu. Em i wetim dispela taim stret em i bin makim i kamap na bai em i ken pinisim pasin nogut bilong nau. Wai na em i no les kwik? “Long wanem, em i no laik bai wanpela i kisim bagarap. Em i laik bai olgeta i tanim bel.” (Ritim 2 Pita 3:9.) Yu ting dispela pasin bilong Jehova long i no les kwik i lus nating? Nogat! Planti milion manmeri i gat gutpela bel ol i kirap long go klostu long em. Na yumi bilip olsem planti milion manmeri moa bai mekim olsem. Maski i olsem, pasin bilong Jehova long i no les kwik i gat mak bilong en. Jehova i laikim ol manmeri, tasol em bai i no inap lukluk tasol. Em bai i no inap larim ol manmeri nogut i mekim ol pasin nogut bilong ol i go moa yet, nogat.—Hab. 2:3.

12. Olsem wanem Jisas i bihainim pasin bilong Jehova long i no les kwik?

¹² Jisas i bihainim pasin bilong Papa bilong em. Inap planti tausen yia, Jisas i bihainim pasin bilong Papa bilong em long i no les kwik. Jisas i lukim Satan i krungutim gutnem bilong Jehova, na gutnem bilong ol gutpela wokman bilong Em. (Stt. 3:​4, 5; Jop 1:11; Rev. 12:10) Na tu, Jisas i bin lukim ol man i bin karim planti pen na hevi. Piksaim long tingting bikpela laik em i gat long “bagarapim ol samting Devil i kamapim”! (1 Jon 3:8) Tasol wanem samting i helpim Jisas long i no les kwik na wetim taim stret Jehova i bin makim bilong em long bagarapim na pinisim tru ol samting Devil i bin kamapim? Wanpela risen em olsem, pasin daun bilong Jisas i kirapim em long lusim ol samting long han bilong Jehova na bihainim stret taim em Jehova yet i makim.—Apo. 1:7.

13. Jisas i mekim wanem bilong soim olsem em i no les kwik long ol aposel bilong em, na wai na em i mekim olsem?

¹³ Taim Jisas i stap long graun, em i no les kwik long ol aposel bilong em. Olsem, taim ol aposel i tok pait long husat namel long ol i nambawan tru na i winim ol narapela, Jisas i no givap hariap long ol. Em i wok yet long soim pasin bilong i no les kwik long ol. (Luk 9:46; 22:​24-27) Em i bilip tru olsem sampela haptaim bihain ol bai senisim pasin bilong ol. Sampela taim yu pilim olsem yu bin mekim wankain popaia planti taim? Sapos olsem, yu ken amamas long save olsem King husat i bosim yumi long nau em man i gat pasin daun na pasin bilong i no les kwik.

14. Yumi ken mekim wanem na bai yumi ken kisim pasin bilong i no les kwik?

¹⁴ Hau yumi ken bihainim pasin bilong Jehova? Taim yumi kisim “tingting bilong Krais,” dispela i opim rot long yumi inap kisim ol tingting na ol pasin i wankain olsem bilong Jehova. (1 Kor. 2:16) So hau yumi ken kliagut long tingting bilong Krais? I no gat sotkat rot bilong mekim olsem. Yumi mas ritim Ol Gutnius. Na yumi mas lusim sampela haptaim long tingim hau ol dispela stori yumi ritim i kamapim tingting bilong Krais long ol samting. Na tu, yumi mas askim Jehova long helpim yumi long kisim tingting bilong Krais long mekim pasin daun na i no les kwik. Taim yumi wok long kisim tingting bilong Krais, yumi bai bihainim ol pasin i wankain olsem bilong God long rot bilong i no les kwik long yumi yet na ol wanbilip bilong yumi.—Mat. 18:​26-30, 35.

JEHOVA I SAVE TINGIM TRU OL MAN I GAT PASIN DAUN

15. Olsem wanem Jehova i bihainim tok i stap long Buk Song 138:6?

¹⁵ Ritim Buk Song 138:6. Em i gutpela samting tru long save olsem Jehova em King bilong heven na graun em i save tingim tru ol wokman bilong em i gat pasin daun! Tingim sampela man na meri em ol i gat pasin daun na Jehova i bin givim ona long ol insait long planti handret yia i go pinis. Ating yu no inap tingim sampela bilong ol dispela manmeri, tasol Baibel i gat stori bilong ol. Jehova i kirapim Moses long raitim stori bilong wanpela nes meri nem bilong em Debora, em i bin stap laip long bipo. Em i bin mekim wok long haus bilong Aisak na Jekop wantaim inap 125 yia! Maski yumi no save gut long dispela gutpela meri, Jehova i larim stori bilong em na ol gutpela pasin bilong em i stap long Baibel. (Stt. 24:59; 35:​8, ftn.) Planti handret yia bihain, Jehova i bin makim yangpela mangi Devit, em wasman bilong sipsip, long kamap king bilong Israel. (2 Sml. 22:​1, 36) Bihain tasol long Jisas i bon, God i onarim ol wasman bilong sipsip em ol i gat pasin daun long rot bilong salim ol ensel i go long ol, na ol i fes lain long kisim toksave olsem dispela Mesaia husat bai kamap bihain em i bon long taun Betlehem i stap klostu long ol. (Luk 2:​8-11) Na taim Josep na Maria i bringim Jisas i go long tempel, Jehova i onarim lapun Simeon na Ana long rot bilong kamapim klia long tupela olsem em i Pikinini bilong Em. (Luk 2:​25-30, 36-38) Tru tumas, “maski Jehova i stap antap tru, em i save tingim ol man i gat pasin daun”!

16. Olsem wanem Jisas i bihainim pasin bilong Papa bilong em long pasin em i mekim long ol narapela?

¹⁶ Jisas i bihainim pasin bilong Papa bilong em. Wankain olsem Papa bilong em, Jisas i onarim ol man i gat pasin daun. Em i skulim ol man “i no bin kisim bikpela skul na [ol] man nating” long ol tok i tru bilong Kingdom Bilong God. (Apo. 4:13; Mat. 11:25) Na tu, Jisas i oraitim sik bilong ol manmeri na em i mekim pasin long ol we i helpim ol long pilim olsem em i laikim ol na rispektim ol. (Luk 5:13) Long laspela nait paslain long Jisas i dai, em i mekim wok bilong wanpela wokboi nating long rot bilong wasim lek bilong ol aposel bilong em. (Jon 13:5) Na paslain long em i go long heven, em i tingim tru ol disaipel bilong em long bipo na long nau tu long rot bilong givim wanpela bikpela wok long ol, em long helpim ol narapela manmeri long kisim laip oltaim.—Mat. 28:​19, 20.

17. Yumi ken mekim wanem bilong laikim na rispektim ol narapela? (Lukim tu piksa.)

¹⁷ Hau yumi ken bihainim pasin bilong Jehova? Yumi laikim na rispektim ol manmeri taim yumi autim gutnius long olgeta manmeri husat i putim yau, maski ol i bilong wanem bekgraun, skin kala, o ol i gat wanem kain ediukesen. Na yumi laikim ol bratasista bilong yumi na rispektim ol taim yumi tingim olsem ol i winim yumi, maski yumi gat save o yumi holim bikpela wok. (Fili. 2:3) Jehova i save amamas taim yumi daunim yumi yet na go pas long givim ona long ol narapela long ol dispela rot na long ol narapela rot tu.—Rom 12:10; Sef. 3:12.

18. Wai na yu laik bihainim pasin daun bilong Jehova?

¹⁸ Taim yumi wok strong long bihainim pasin daun bilong Papa bilong yumi long heven, yumi bai kamap olsem man em ol narapela i pilim isi moa long toktok wantaim, man bilong redi long bihainim tingting bilong ol narapela, na man bilong i no les kwik. Na yumi bai laikim ol narapela na rispektim ol, olsem Jehova i mekim. Ol hatwok yumi mekim bilong pas gut moa wantaim God bilong yumi husat i gat pasin daun i ken helpim yumi long kamap man o meri i dia tumas long ai bilong em!—Ais. 43:4.