Ol Yangpela i Laik Save . . .

Bilong Wanem Mi Mas Skelim Ol Piksa Wokabaut Mi Laik Lukim?

YANGPELA meri Karen i tok, ‘Ol piksa wokabaut i no save pulim tingting bilong mi. Mi save go lukim, long wanem mi laik bai ol dispela piksa i mekim na mi kirap nogut na pret pret long ol samting mi lukim​—mi save kisim amamas long dispela kain piksa wokabaut.’ Planti yangpela i save mekim wankain tok; ol i tok, ol piksa wokabaut i no save pulim tingting bilong ol. Tasol wanpela yangpela meri nem bilong em Jojia, em i no wanbel long tok bilong ol dispela yangpela. Em i bin lukim sampela piksa wokabaut nogut na em i tok, ‘Mi no inap lusim tingting long ol samting mi bin lukim long ol dispela piksa. Mi wok long tingim tingim, na dispela i kirapim mi na mi laik mekim ol dispela samting mi bin lukim.’

Ol yangpela i save laikim tru ol piksa wokabaut. Long hap bilong Amerika, ol i bin skelim ol manmeri i bin i go lukim ol piksa wokabaut insait long wanpela yia, na ol i tok i gat 113 milion ol i bin i go, na insait long dispela lain planti (inap olsem 36 pesen) em ol yangpela. Tasol planti milion moa ol i save lukim ol piksa long ol video na televisen i stap long haus bilong ol yet. Tru, wan wan taim yumi olgeta i laik malolo na kisim liklik amamas, na taim yumi lukim wanpela gutpela piksa, dispela inap kirapim tingting bilong yumi na givim malolo long yumi. Planti yangpela ol i save pilim olsem taim ol i stap nating na i no gat wanpela samting bilong mekim, olsem long apinun samting, ol i laik lukim wanpela piksa. Tasol wanem kain piksa wokabaut bai yu lukim? Yu ting em i bikpela samting long yu mas skelim ol piksa yu laik lukim, o nogat?

Ol Kain Piksa Wokabaut Bilong Nau

Wanpela kain dokta bilong helpim ol pikinini i gat sik bilong tingting, em Robert Coles, em i stori long ol piksa wokabaut bilong nau na em i tok, planti piksa ol i save givim tingting long ol yangpela na ol i kirap tingim ‘ol amamas bilong dispela graun, na ol samting bilong maritpasin, na pait, na mangal, na pasin bilong tingim skin bilong yumi yet.’ Na wanpela dokta (em Vince Hammond) em i kamapim wanpela wok bilong skelim dispela samting na em tu i tok, ‘long nau planti piksa wokabaut long sampela kantri i kamapim pasin bilong pait na bagarapim man.’ Ol lain i wok wantaim dispela man ol i skelim 1,000 piksa wokabaut long sampela kantri nabaut na yu ting ol i tok wanem long ol dispela piksa? Ol i tok, ‘Long olgeta hap ol i save wokim ol piksa nogut bilong pait na bagarapim man.’

Planti yangpela ol i save laikim ol piksa bilong ol man i gat ol spirit nogut i stap long ol na piksa bilong ol narapela kain pasin ol spirit nogut i save kamapim, na pasin bilong bagarapim meri, na ol pasin nogut nogut bilong katim nabaut ol man na givim bikpela pen nogut tru long ol. Wanpela nius bilong ol yangpela (Seventeen) i kamapim sampela tok bilong Dokta Neil Senior, em i tok, ‘Ol samting i save kamap insait long ol dispela kain piksa, em olgeta famili i no laik bai ol dispela samting i painim ol.’ Tasol planti yangpela i save go lukim ol dispela kain piksa.

Na long nau ol i save wokim planti piksa nogut bilong ol man na meri i mekim maritpasin na ol kain pasin olsem. Wanpela bikpela tisa bilong yunivesiti em i tok, ‘Long Kanada planti yangpela i gat 12-pela krismas i go inap 17 krismas ol i save baim ol dispela kain video. Mi ting dispela i save paulim tingting bilong ol long ol samting bilong maritpasin na ol i kirap mekim ol pasin i no stret.’

Tasol ol bikpela kampani i save wokim ol dispela kain piksa wokabaut na video, ating ol i no tingim dispela samting. Wanpela nius (Variety) i tok, ‘Long nau ol i wokim planti piksa i kamapim klia tru pasin bilong pait na bagarapim man na pasin pamuk na ol narapela kain pasin sem, tasol ol i no wokim planti gutpela piksa i stret long ol famili i ken lukim​—i olsem ol i wok long lusim ol dispela kain piksa na ol i no laik wokim moa.’ Olsem na yu mas tingting: ‘Sapos mi wok long lukim ol dispela kain piksa nogut, dispela inap paulim mi na bagarapim tingting bilong mi o olsem wanem?’

Samting Em i Mekim long Ai na Yau Bilong Yu

Ol piksa i gat bikpela strong na ol inap bosim skin bilong yu. Jisas i tok: “Ai em i lam bilong bodi.” (Matyu 6:22) Na samting yu lukim long ai, dispela inap stiaim tingting bilong yu. Olsem wanpela bikpela buk i tok, “tingting i save bihainim ai.” Tru, tingting i bosim ai taim ai i laik lukluk long wanpela samting. Tasol taim ai bilong yu i wok long lukluk long ol traipela piksa i save kamap long ol piksa wokabaut, em nau, tingting bilong yu i no bosim yu moa​—man i bin wokim piksa, em yet i bosim tingting bilong yu. Sampela yangpela, taim ol i wok long lukim piksa, i olsem dispela piksa i kalabusim tingting bilong ol na tingting i pas long dispela piksa tasol na ol i lusim tingting long olgeta narapela samting​—i olsem ol yet i stap insait long dispela stori.

Na “yau bilong yumi ken harim ol toktok” em tu i strongpela samting bilong bosim tingting bilong yumi na ol samting yumi mekim. (Sindaun 20:12) Ol piksa na toktok i save pulim ai na tingting, na ol musik tu i givim strong long piksa bilong pulim tingting na kirapim bel bilong man o kirapim pret o kros long bel bilong em, o kirapim ol laik nogut long bel. Olsem na piksa wokabaut i save pulim tru tingting na bel bilong sampela man, na maski dispela stori em i stori nating tasol, long tingting bilong ol em i samting tru.

Samting Em i Mekim long Tingting na Pasin Bilong Yu

Ol tingting dispela piksa wokabaut i kamapim em inap stiaim tingting bilong yu. Olsem na ol man bilong wokim ol dispela piksa wokabaut ol i laik bai yu wanbel tru wantaim man i stap insait long piksa, maski em i man nogut olsem raskol, o em i wokim kain kain pasin bilong givim pen long ol man na em i laik holim bikpela strong bilong bosim ol man. Olsem na sapos yu no was gut, bai yu gat laik long dispela man nogut i mas win na abrusim bagarap!a

Wanpela piksa wokabaut i bin kamap, na wanpela man insait long piksa em i holim resa na em i mekim save katkatim na bagarapim ol man nabaut. Ol manmeri i sindaun lukim dispela piksa ol i amamas tru long em na ol i singaut bikmaus na ol i laik bai em i mekim moa yet dispela pasin nogut bilong kapsaitim blut bilong ol man! Dispela piksa i pulim tingting na bel bilong ol na paulim ol, olsem na ol i no inap tingim moa wanem samting i stret na wanem samting i no stret, na bel bilong ol i no sori liklik long ol man na meri i kisim bagarap long han bilong dispela man nogut.

Dispela pasin i narapela kain tru long tok bilong Baibel i tok, yumi no ken amamas long wanpela man i kisim bikpela hevi o kisim bagarap! (Sindaun 17:5) Dispela pasin i narapela kain tru long gutpela lo Jisas i bin kolim, olsem: “Olgeta pasin yupela i laik bai ol arapela man i mas mekim long yupela, ol dispela pasin tasol yupela i mas mekim long ol.” (Matyu 7:12) Na yu mas tingting: Sapos yu wok long singaut bilong subim man insait long piksa bambai em i ken kilim i dai wanpela man, yu ting dispela i stret wantaim tok bilong Baibel i tok yumi mas “mekim gutpela pasin long ol arapela”? (Efesus 4:32) Taim yu mekim olsem, yu wanbel wantaim “ol man nogut” na yu helpim ol, a?​—Buk Song 26:​4, 5.

Samting Piksa i Wok Hait long Mekim

Tasol ating yu save ting olsem samting ol dispela piksa wokabaut i mekim long yu em i bilong liklik taim tasol na bai yu lusim tingting long en. Tru ating bai yu no ken kirap mekim save long ol man na katkatim nabaut ol long resa samting long wanem yu bin lukim dispela long wanpela piksa wokabaut. Tasol wanpela nius bilong Nu Silan i tok, ‘Ol i skelim ol pasin nogut bilong pait na bagarapim man nau i wok long kamap na ol i ting, ol samting ol man i save lukim long ol piksa wokabaut nogut na ol video nogut, dispela i save kirapim ol long bihainim ol dispela pasin ol i bin lukim.’ Na wanpela buk bilong helpim ol yangpela (Adolescence) em tu i tok, long nau ol saveman i ting, ol piksa bilong pait na bagarapim man em ol yangpela i save lukim long televisen, dispela i save kirapim ol long pait na bikhet nabaut.

Na sampela nius i kamapim ripot bilong sampela man em ol i mekim kain kain pasin nogut tru olsem ol i bin lukim long ol piksa wokabaut. Wanpela yangpela em i laik pilai na sanap long han antap long haus kepten bilong trak taim trak i spit i go, na em i kisim bagarap long en na em i dai. Em i bin lukim wanpela man i mekim olsem long wanpela piksa wokabaut. Olsem na yu no ken ting ol samting yu lukim long ol piksa i no inap pulim yu long bihainim ol pasin nogut.

Na planti piksa i save wok hait long pulim yu na stiaim tingting bilong yu. Olsem: Ating yu lukim pinis sampela wanlain bilong yu ol i save mekim ol toktok o putim ol kain bilas o wokim gras olsem ol i lukim ol man o meri i mekim long ol piksa wokabaut o televisen samting, a? Olsem na yu ken save, ol piksa i gat strong na ol inap bosim tingting na pasin bilong yu na bai yu kirap bihainim samting yu lukim. Na taim ol yangpela i lukim ol piksa nogut, dispela inap bagarapim gutpela pasin bilong ol na paulim tingting bilong ol. Wanpela man i gat wok long skelim dispela samting, em Dokta Thomas Radecki, em i tok, sapos planti taim ol yangpela i wok long lukim ol piksa nogut bilong pait samting, dispela bai mekim long tingting na bel bilong ol na bihain ol i no inap pilim moa olsem pait na bagarapim man em i samting nogut.

Baibel i tok: “Bikpela i save skelim ol stretpela man na ol man nogut. Em i no laikim tru ol man i sakim lo bilong em.” (Buk Song 11:5) Sapos yu wok long lukim ol piksa bilong pait na bikhet nabaut, yu ting dispela bai mekim long yu na bai yu orait long pasin nogut? Ating olsem, a? Na ating bai yu amamas long lukim ol dispela kain piksa bilong pait na bagarapim man. Na em inap kirapim yu na taim yu mas stretim wanpela hevi o kros samting i stap namel long yu na narapela, ating bai yu laik stretim long rot bilong pait. Olsem na Baibel i tok stret tru long Sindaun 10:​23, em i tok: “Ol man i no gat gutpela tingting, ol i save amamas long mekim olkain pasin nogut.”

Na olsem wanem long ol stretpela pasin Kristen yu bihainim? Sapos yu wok long lukim ol piksa nogut bilong pamuk na olkain pasin sem na ol man na meri bilong piksa i stap pui nating, ating bai yu no tingim moa olsem pasin pamuk i gat rong long en na em inap long bagarapim na givim bikpela hevi long ol man na meri i save mekim dispela pasin. Na em inap bagarapim tingting bilong yu na bai yu no ken nolaik tru long pasin nogut.​—Buk Song 97:10.

Wanpela meri bilong raitim buk (Jane Burgess-Kohn) em i stori long wanpela yangpela meri nem bilong em Jeni. Em i bin i go long piksa wokabaut wantaim wanpela yangpela man na tupela i lukim piksa bilong man i holim meri na kis na mekim ol kain pasin sem. Dispela i kirapim bel bilong em na long dispela nait em wantaim yangpela man i kirap mekim olsem​—narapela i holim narapela na nau em i no inap bosim moa skin bilong em. Jeni i tokaut long samting i kamap na em i tok, “Sori tumas, i no hatwok long yangpela man i grisim mi long mekim pasin pamuk, long wanem mi no gat strong moa long sakim. Olsem wanem na tingting bilong mi i paul olgeta na mi mekim tasol? Na mi no bin laikim tumas dispela yangpela man tu!”

Tru tumas, ol piksa wokabaut i gat strong na ol inap bosim bel na tingting na pasin bilong yu. Olsem na yu mas skelim gut ol piksa yu laik lukim, a? Wanpela Kirap! bilong bihain bai stori long dispela samting.

[Futnot]

[Rait long pes 11]

‘Mi no inap lusim tingting long ol samting mi bin lukim long ol dispela piksa. Mi wok long tingim tingim, na dispela i kirapim mi na mi laik mekim ol dispela samting mi bin lukim’

[Rait long pes 12]

‘Ol i skelim ol pasin nogut bilong pait na bagarapim man nau i wok long kamap na ol i ting, ol samting ol man i save lukim long ol piksa wokabaut nogut na ol video nogut, dispela i save kirapim ol long bihainim ol dispela pasin ol i bin lukim’

[Piksa long pes 10]

Planti yangpela, taim ol i lukim piksa wokabaut bilong man i bagarapim man, o stil, o mekim pasin pamuk, ol i save singaut na amamas long em na ol i laik bai em i mekim moa yet