Ol Yangpela i Laik Save . . .

Olsem Wanem Mi Ken Skelim Ol Piksa Wokabaut i Stret Long Lukim?

WANPELA meri em longtaim em i insait long ol wok bilong wokim piksa wokabaut, em i tok: “Ol manmeri . . . i save askim mi bilong wanem nau mi no save lukim moa ol piksa wokabaut. As bilong en, i gat planti piksa i nogut tru.” Bilong kisim amamas em i no laik lukim moa ol piksa wokabaut.

Yangpela meri Denis i gat tingting i wankain liklik, tasol em i no strong tumas long lusim olgeta. Em i tok, “I no gat planti gutpela piksa bilong lukim, long wanem, planti piksa i kamapim pasin bilong pait na bagarapim man. Olsem na mi save tingting gut long ol samting mi laik lukim.”

Ating sampela taim yu tu yu laik lukim piksa wokabaut. Olsem na bilong kisim malolo samting ating yu no laik pinis olgeta long lukim piksa wokabaut. Tasol sapos yu lukim toksave bilong ol nius long ol piksa wokabaut i kamap bai yu save, ol tok i kamap long Kirap! bilong mun Februeri i stret long dispela, olsem: I gat wan wan piksa tasol ol i wokim long nau i stret long yangpela Kristen i ken lukim.a Dispela i no liklik samting tasol, long wanem ol piksa yu lukim i kamapim ples klia ol samting yu ting i bikpela samting tru. Na ol i kamapim klia ol kain man o meri yu laik poroman wantaim ol, na kain toktok yu orait long harim, na tingting bilong yu long ol samting bilong maritpasin.

Baibel i tok strong long yumi no ken “laikim pasin nogut.” (Buk Song 97:10) Yu ting yu bihainim dispela tok sapos yu save lukim ol piksa bilong pasin ol spirit nogut i kamapim long kapsaitim blut bilong ol man, na pait na bagarapim man, na kamapim klia tru pasin pamuk? Nogat tru! Ol yangpela em ol i tingim tru ol lo bilong God na ol i putim olsem nambawan samting bilong ol, bai ol i bihainim tok bilong Baibel long Filipai 4:​8, olsem: “Ol brata, mi laik mekim wanpela tok moa. Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.” I no olsem yu no ken lukim moa ol piksa wokabaut, nogat; tasol yu mas skelim gut ol piksa yu laik lukim. Olsem wanem yu ken mekim?

Inap Yu Ken Lukim o Nogat?

Mak ol i givim long piksa i ken helpim yu na bai yu ken save, yu inap lukim o nogat. Na papamama tu i ken tingim dispela mak na ol i ken tokim yu, em i orait long lukim o nogat.

Tasol sampela taim mak ol i givim long piksa i no tok stret na ol inap giamanim yu. Ating ol man bilong putim mak i no wanbel long ol stretpela pasin na lo bilong Baibel. Na tu, pasin bilong ol man i wok long go nogut, olsem na planti piksa wokabaut em bipo ol man i ting i nogut tru, nau ol i ting i orait long olgeta man i ken lukim.

Yangpela man Dimalo i pilim pinis dispela samting taim em i go lukim wanpela piksa em ol man i bin givim gutpela mak long en, tasol “tok nogut na pait na bagarapim man” i pulap long en. Tru ol mak i ken helpim yu, tasol nogut yu tingim ol dispela mak tasol taim yu skelim ol piksa i stret long lukim. Baibel i tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”​—Sindaun 14:15.

Sampela Rot Moa Bilong Skelim Ol Piksa Wokabaut

I gat wanem ol narapela samting bilong helpim yu long skelim gut ol piksa wokabaut? Sapos yu lukim toksave na stori bilong piksa long nius samting, bai yu inap save em i wanem kain piksa. Tasol yu mas was gut! Ol stori na toksave ol nius i mekim long piksa i kamapim tingting bilong ol man tasol. Na sapos sampela hap bilong piksa i nogut nogut tru, ating ol toksave bilong piksa i laik haitim dispela samting.

Wanpela yangpela meri nem bilong em Koni, em i tok: “Sapos mi save long nem bilong ol man em ol i insait long piksa wokabaut, dispela i helpim mi long save olsem dispela piksa i wanem kain.” Ol Kristen wanlain bilong yu em ol i bihainim stretpela lo bilong Baibel, ating ol i save, dispela piksa yu laik lukim i gutpela o nogat. Na bos bilong haus piksa o man bilong salim tiket, ating ol tu inap tok klia long piksa i wanem kain. Tasol planti man i save stori tasol long ol samting ol yet i save laikim long piksa. Olsem na gutpela yu askim ol long ol samting ol i ting i nogut long piksa, a? Askim ol stret: Piksa i kamapim pasin bilong pait na bagarapim man? o em i kamapim klia man na meri i mekim maritpasin? o piksa i kamapim stori bilong ol man i gat spirit nogut i stap long ol?

Tu, ating papamama bilong yu inap givim sampela gutpela tingting long yu. Yangpela meri Vanesa i tok: “Mi save askim papamama bilong mi long tingting bilong ol. Sapos ol i orait long mi go lukim wanpela piksa, orait mi go lukim.”

Em wankain samting tu taim yu laik baim video bilong lukim inap sampela de. Skelim gut karamap. I gat sampela piksa o tok long karamap bambai yu ken save video i no gutpela bilong lukim? Sapos olsem, orait putim i go bek! Na sapos wanpela wokboi bilong stua i lukim pinis dispela video yu laik kisim, gutpela sapos yu toktok wantaim em long dispela video, i gat wanem stori na piksa long en. Sindaun 14:16 i tok: “Man i gat gutpela tingting i save lukaut gut na abrusim olkain trabel. Tasol man i no gat gutpela tingting, em i ting em inap mekim olgeta kain samting, na em i no wari long pasin bilong en.”

Lusim, Mekim i Dai

Tasol olsem wanem sapos yu baim pinis wanpela video na taim yu lukim yu save em piksa nogut tru? Orait nau bai yu mekim wanem? Dispela tasol: Mekim i dai! Ating i hatwok liklik, a? Long wanem, sapos long bel yu pilim olsem yu tu yu insait long dispela stori, ating bai yu laik lukim pinis bilong dispela piksa na bai yu ken save, dispela stori i pinis olsem wanem. Tasol em savepasin sapos yu givim baksait long ol pasin nogut.​—Lukim Matyu 5:​29, 30.

Tasol sapos yu sindaun pinis insait long haus piksa wantaim ol poroman bilong yu na piksa yu lukim i kamapim ol samting yu no orait tru long en, bai yu mekim wanem nau? Yangpela man Josep i kisim dispela kain hevi. Tokaut bilong wanpela nupela piksa wokabaut i tok olsem: “Yu mas lukim.” Tasol Josep i tok: “Piksa i kirap na 3-pela taim insait long 5 minit mi lukim man i pait na bagarapim narapela man, na sampela man na meri i stap as nating.” Josep i toksave long ol poroman na em i lusim haus piksa. Yu ting em i sem? Josep i tok, “Nogat tru. Mi tingim Jehova pastaim na mi laik mekim ol samting em i laikim.”

Tru, ol wanlain bilong yu bai strong long yu na bai yu no ken mekim olsem. Na sampela yangpela em ol i go bikpela insait long famili Kristen, ol tu inap putim hevi long yu; ating ol i bin lukim planti piksa nogut na nau bel bilong ol i no gat tok moa. (1 Timoti 4:2) Ating ol bai sutim tok long yu olsem tingting bilong yu i kranki o yu laik mekim olsem yu stretpela man tumas. Tasol nogut yu bihainim ol; yu “mas i stap stret long ai bilong God.” (1 Pita 3:16) Tasol maski ol wanlain i ting olsem wanem long yu, yu no ken tingting planti long dispela. Bikpela samting yu mas tingim, em Jehova yet i ting olsem wanem long yu. Na sapos ol poroman bilong yu i tok bilas o tok nogut long yu long wanem yu bihainim maus bilong bel bilong yu, maski​—gutpela yu painim ol nupela poroman. (Sindaun 13:20) Yu yet yu bos bilong ai bilong yu, na yau bilong yu, na tingting bilong yu. No ken larim ol narapela i bosim yu.​—Skelim Jop 12:11; 31:1; Sindaun 4:23.

Stap Stret long Ai Bilong God

Yangpela meri Jojia i save haitim krismas bilong em bambai em inap i go insait long haus piksa na lukim ol piksa wokabaut, em ol i gat mak bilong tambuim ol yangpela long lukim. Tasol bihain liklik, em i gat laik long stap gut wantaim God olsem pren bilong em. Olsem na em i pinis long lukim ol piksa nogut na em i painim ol narapela samting em inap mekim wantaim ol poroman Kristen bilong em. Jojia i tok: “Nau bel bilong mi i no gat tok moa. Na mi inap slip gut, long wanem bel bilong mi i stap klin tru na i stap isi.”

Olsem wanem long yu? Yu laik stap klin long ai bilong Man i skelim bel bilong ol man, em God Jehova? (Sindaun 17:3) Sapos yu laik stap olsem, yu mas was gut long ol samting yu putim long tingting na bel bilong yu. Abrusim ol piksa i kamapim pasin bilong pait na bagarapim man, o pasin pamuk na ol narapela kain pasin sem, o tok doti, na kain pasin olsem; long wanem ol dispela kain samting inap paulim tingting bilong yu na yu no save, wanem ol samting i stret na wanem ol samting i no stret. Ol inap bagarapim tingting na bel bilong yu. Bihainim pasin bilong man i bin mekim wanpela beten long Buk Song, olsem: “Helpim mi long givim baksait long ol samting i no gutpela.”​—Buk Song 119:37.

Sapos yu was gut na skelim gut ol piksa wokabaut, dispela bai lukautim yu yet na bai ol samting nogut i no inap long bagarapim yu. Na tu, yu inap “stap klin” na bel bilong yu i no gat tok, olsem yangpela Jojia i stori long en. Na i no gat wanpela piksa wokabaut inap givim dispela kain gutpela amamas long yu!

[Ol Futnot]

[Rait long pes 13]

Planti piksa em bipo ol man i ting i nogut tru, nau ol i ting i orait long lukim

[Piksa long pes 12]

Ating papamama i save piksa wokabaut i orait o nogat