Skelim Wok Bilong Ol Gavman

Namba 1 Hap: Yumi Lukluk Long Ol Gavman

LONG 1989 planti senis i kamap long ol gavman long Yurop na nau ol man i lukluk long ol gavman. Wanpela nius i tok, long 1989 bikpela senis i kamap long Is Yurop, na ol dispela gavman i bin stap inap 40 yia samting, ol i pinis long dispela taim.

Na wanpela man bilong gavman bilong Amerika, em Francis Fukuyama, em i tok, ol dispela senis i kamap i no makim olsem dispela kros i bin stap namel long ol lain man nau em i pinis, nogat; em i makim olsem ol man i bin traim kain kain rot, na nau ol i save pinis wanem rot i gutpela na i no ken traim moa.

Planti man i no bilip long dispela tok, tasol tok hia i kirapim tingting bilong yumi long tingim sampela ol samting olsem: Olsem wanem long ol gavman bilong ol man long bipo na i kam inap nau? Tru ol i save pinis wanem rot i gutpela, o nogat? Olsem wanem long ol gavman long bihain? Ol samting bai kamap bihain bai mekim wanem long yumi olgeta wan wan?

Tingting Bilong Ol Man long Wok Bilong Ol Gavman

Planti milion man i no amamas long wok ol man bilong politik i mekim. Na dispela hevi i no kamap long Yurop tasol, nogat; ol man bilong olgeta kantri i pilim. Yumi tingim ol kantri long hap bilong Saut Amerika.

Long pinis bilong 1988 wanpela nius bilong Jemani i stori long wok politik long Saut Amerika em i bagarap, na ol samting bilong bisnis long Ajentina i laik bagarap, na gavman bilong Brasil i hatwok long bosim ol samting, na gavman bilong Peru i no inap stretim ol hevi, na Yuragwe tu i hatwok, na bikpela hevi i painim gavman bilong Ekwado, na gavman demokratik bilong Kolambia na Venesuela i no strong tumas, na gavman bilong Meksiko i bin stap inap 50 yia, tasol nau ol man i lukim i laik bagarap; long 1980 i kam inap 1990 planti hevi moa yet i painim ol dispela gavman.

Long sampela kantri ol man i no amamas liklik long ol man bilong politik. Wanpela lain i askim ol man long Ostria, olsem wanem long ol man bilong politik, na planti (inap 44 pesen) i tok, ol i no amamas long ol dispela lain politik. Na long Jemani tu ol i tok ol i no save bilip tumas long ol man bilong politik.

Profesa Reinhold Bergler em wanpela dairekta long yunivesiti long Bon, na em i tok, ol yangpela manmeri i laik givim baksait long gavman na wok politik na ol man bilong politik, na em i tok, planti yangpela i ting ol man bilong politik ol i man bilong bikmaus, na planti yangpela i tok, ol dispela man ol i man bilong giaman.

Wanpela man long Amerika i gat wok long skelim tingting bilong ol man long dispela samting na long 1970 samting em i raitim ripot bilong en na i tok, sampela man i ting ol wok politik i no save mekim ol samting bilong helpim ol man, na ol i man bilong giaman tu, olsem na ol man i no laik vot long ol. Long 1966 sampela man long Amerika i tok, ol man bilong politik i no save tingim ol man, tasol long 1980 na inap 1990 planti man i save tok olsem wanpela nius bilong Jemani (Stuttgarter Nachrichten) i tok: ‘Planti man bilong politik i save tingim ol samting bilong ol yet i namba wan samting, na ol samting bilong ol man i vot long ol em i namba tu.’

Ol dispela man bilong politik yet i save long dispela. Wanpela bikpela man bilong ol i tok: ‘Planti man bilong politik i man bilong tupela maus.’ Na em i tok: ‘Ol i mas mekim olsem na bai ol i ken holim dispela wok politik bilong ol.’ Dispela man em Richard Nixon, bipo em presiden bilong Amerika. Em i save gut long dispela pasin; taim em i stap presiden, bikpela tok i kamap long sampela pasin nogut em sampela minista bilong gavman i bin mekim.

Ol man bilong politik i no kamapim gutpela wok tumas, olsem na ol stretpela man i ting ol man bilong graun i no inap kamapim gutpela gavman. Orait, sapos i no gat gavman i stap, em gutpela o nogat?

[Blok long pes 4]

“Sapos ol lida bilong gavman i no inap stiaim ol manmeri long gutpela rot, orait kantri bai i bagarap.”—Sindaun 11:14