Kwibek i Helpim Pasin Bilong i Stap Fri
WANPELA man bilong mekim tok long redio long hap bilong Montreal, long Kwibek, i kamapim tok long nius na i tok, ol lain bilong dispela provins bilong Kanada i save mekim nogut long ol Witnes Bilong Jehova, “long wanem, ol i stap narapela kain.” Em i stori long tok bilong wanpela minista bilong gavman, em Yvon Picotte, em i kros long ol Witnes na i sutim tok long ol. Dispela man bilong redio i tok, dispela minista (Picotte) i toknogutim ol Witnes na i tok, “ol i ‘man bilong hangamap long ol narapela man’—ol i save kisim mani samting long welfe tasol na ol yet i no save wok. Taim Picotte i tok olsem, em i no tok bilas long ol Witnes Bilong Jehova tasol—em i tok bilas tu long olgeta manmeri em welfe i mas helpim ol.”
Dispela man bilong redio i daunim tok em Picotte i sutim long ol Witnes na em i tok, sapos yumi skelim hamas Witnes em welfe i save helpim ol, dispela namba i no winim namba bilong lain bilong ol narapela lotu em welfe i save helpim ol. Na em i tok, “Sampela man i save tok, ol man bilong hangamap long ol narapela man em ol man bilong politik yet.”
Na man bilong redio i tok, ‘Samting i kirapim mi long tingim tok kranki bilong Picotte em wanpela samting i bin kamap long 1948 samting. Long dispela taim Maurice Duplessis, em premia bilong Kwibek na em i man bilong helpim Misin Katolik, em i bin kalabusim 400 Witnes Bilong Jehova—i no long wok bilong i go long haus bilong ol man, em dispela wok Picotte i nolaik tru long en—Duplessis i tok ol i bin mekim tok bilong daunim gavman. Em i tok, i gat lo i tok, wok bilong tilim ol liklik nius bilong lotu em wanpela wok bilong daunim gavman! Ol polis i lokim dua bilong ol haus em ol Witnes i save bung long en, na ol i mekim nogut tru long ol Witnes.’
Long 1946 Duplessis i tokaut olsem: “Yumi Gat Pait long Ol Witnes Bilong Jehova na No Ken Sori Liklik long Ol.” Tasol ol nius i no wanbel long dispela tok. Sampela nius i putim bikpela het-tok olsem: “Taim Bilong Tudak i Kamap Gen long Kwibek,” na kain tok olsem.
Nau, em 50 yia bihain long en, dispela man bilong redio long Montreal i tok: “Tru yumi gat wan wan man bilong politik ol i laik kamapim gen pasin bilong bipo, tasol ol man i no orait long ol dispela tok kranki bilong ol. Sapos Duplessis i bin harim dispela tok bilong Picotte, em bai amamas tru; tasol Mista Bourassa [em premia bilong Kwibek long nau] i tok, nau em i mas tokaut long Kibung Nesenel olsem dispela tok bilong em i kranki. Olsem na ol man i laik helpim pasin bilong i stap fri ol i ken strongim bel. Long nau ol i no save kalabusim moa ol man i kamapim bilip bilong ol long ol narapela man olsem bipo ol i bin mekim.”