Mi Bin i Stap Kalabus Long Han Bilong Raskol

“Beten long God bilong yu na bai olgeta samting i ken kamap gutpela!” Wanpela man em i mekim dispela tok, na inap sampela aua i go pinis em i holimpas mi​—em i holim mi strong long nek bilong mi, na em i holim wanpela han-bom na i laik pretim mi na i tok, bom bai pairap na bagarapim mi. Long ausait ol polis i save gut long sut long gan ol i holim gan na makim hap bilong haus beng dispela raskol i pasim mi i stap long en. Mi stap kalabus long wanpela haus beng long biktaun Gwatemala.

Dispela man em i singaut bikpela olsem: “Hansap! I no gat wanpela i ken wokabaut! Mi laikim olgeta mani!” Em i singaut long ol polis: “No ken sut. Han-bom mi holim em i no wanpela liklik samting bilong pikinini i pilai long en. Sapos yupela i sut long gan, i no mi wanpela bai i dai. Yumi olgeta bai bagarap na kamap olsem ol liklik hap pipia!”

MI BETEN long God Jehova, na mi askim em long helpim mi, long wanem nau mi pilim olsem bel bilong mi i no inap i stap isi moa. Mi askim em long helpim mi bambai mi no ken pret, na bai em i ken helpim mi long dispela taim bilong birua. Mi tingim Jehova i olsem wanpela strongpela haus na ol man i ken ran i go long en na i stap gut.​—Sindaun 18:10.

Taim bel bilong mi i stap isi, mi lukim olgeta wokboi bilong haus beng, wantaim ol man i bin i kam long haus beng ol i go pinis. Sampela ol wasman bilong haus beng, na dispela raskol, na mi, mipela tasol i stap. Bihain dispela man i larim ol wasman i go.

Sampela aua i lus, na em i larim fopela man i no holim gan ol i kam insait long haus beng. Bihain mi kisim save olsem wanpela long ol em i wanpela dokta bilong ol man i gat sik longlong, na wanpela em i ripota. Tupela i tromoi sampela askim long dispela raskol, olsem bilong wanem em i mekim dispela samting. Em i tok, long wanem, sampela lain ol i bin mekim nogut long em na em i belhat na nau em i laik bekim pasin nogut bilong ol.

Ol i Laik Save Mi Husat

Nau mi stap isi tru olsem olgeta samting i orait tasol, olsem na dokta hia em i givim planti ol askim long mi. Em i askim mi long nem bilong papamama bilong mi na long ol brata bilong mi, na long ol sista bilong mi. Mi tokim em, mi wanpela Witnes Bilong Jehova na mi namba wan bilong 5-pela pikinini. Na papamama i bin skulim mipela long ol lo bilong Baibel.

Tudak i kamap pinis na sampela aua i lus, olsem na fopela man hia, wan wan ol i kirap long lusim haus beng. Mi askim man i kalabusim mi long larim mi i go tu. Em i tok, nogat. Na em i tok moa: “Yu no ken tingting planti. Olgeta samting bai i orait. Samting mi laikim ol bai givim long mi na bihain yu ken i go long haus.” Mi tokim em: “Ol bai i no inap givim wanpela samting long yu. Bai ol i kilim mitupela i dai. Plis, yumi mas lusim dispela ples.” Tasol em i tok: “Mi orait long i dai, tasol sapos i no gat rot bilong helpim mi, orait mitupela wantaim bai i dai.”

Mi tingim tok pastaim em i bin mekim, na mi traim long toktok gut wantaim em long en, olsem na mi tok: “Taim ol i mekim nogut long yu, mi bin i stap tu?” Em i tok: “Nogat.” Na mi askim em olsem: “Bilong wanem mi mas kisim strafe long wanpela samting nogut mi no bin mekim?” Em i tok: “Dispela em wanpela samting i mas kamap. Sapos yumi mas i dai, orait yumi dai.” Tasol mi tokim em: “Dispela em i no wanpela samting i mas kamap. Em tingting bilong yu tasol na yu ting yu mas i dai. Jehova em i God bilong sori; em inap lusim tingting long rong bilong yumi. Em i givim rot long yumi bilong helpim yumi, long wanem em i no senisim laik bilong em long bipo yet. Em bai mekim dispela graun i kamap paradais gen.”

Long dispela taim stret wanpela man i kam insait long haus beng na i toktok strong long man i kalabusim mi, em i tok: “Mitupela i mas stretim tok. Larim Siomara i go. Yu kisim mani i stap long ol tebol na long bokis mani, na mitupela i go wantaim na bai ol i no ken bagarapim yu.” Tasol dispela raskol i no laik long mekim olsem.

Mi No Helpim Bilong Em

Planti aua i lus pinis. Na wantu tasol mi harim wanpela man i toktok long wanpela bikmaus samting, em i tok: “Yupela kam ausait! Yupela no inap win. Putim han i go antap na kam ausait. Na tokim dispela raskol long kam ausait. Yu no kalabus. Yu helpim bilong em! Yu no ken haitim moa!” Dispela i pretim mi, na mi singaut strong i go long ol olsem: “Wanem samting i mekim na yu sutim tok long mi?” Na dispela man i bekim tok olsem: “Mipela i wok long skelim pasin bilong yu​—yu no pret, yu stap isi tru. Sapos kain samting olsem i painim wanpela man, em i no ken stap isi olsem yu mekim nau.”

Taim mi harim dispela nau, mi kolim nem bilong Jehova, na mi beten long em. Bihain mi toktok long dispela man i holim bikmaus i stap, na mi tok olsem: “Bel bilong yu bai i gat tok long dispela samting yu mekim, inap long bihain tru, long wanem yu sutim nating tok long mi na i no gat as bilong en.” Bihain mi harim olsem wanpela kampani bilong wokim nius long Gwatemala na televisen tu i kamapim dispela tok olsem mi helpim bilong dispela man em i holim mi i stap kalabus.

Nau dispela raskol i kirap na katim tok bilong narapela, na em i tok: “Maski long sutim tok long em! Em, mi no save long em! Mi painim em tasol long hia, na em i wok long bihainim ol tok mi givim long em.”

Mi tingim spirit Jehova i givim long lain bilong em i no bilong mekim yumi i pret. Nogat. Em i spirit bilong givim strong long yumi na bilong helpim yumi long bosim gut i stap bilong yumi. (2 Timoti 1:7) Dispela tingting i strongim mi, na mi tingim olsem mi no stap wanpis moa. Nogat. Bel bilong mi i stap isi na mi tingting: ‘Sapos yumi stap laip, em i samting bilong Jehova. Na sapos yumi dai, em tu i samting bilong Jehova.’​—Rom 14:8.

Taim i winim biknait pinis na mi askim gen dispela man i kalabusim mi, em i senisim tingting bilong em pinis o olsem wanem? Taim em i tok nogat, mi tokim em long famili bilong mi. Mi tokim em mi laikim tru ol, na mi no laik lusim ol, maski mi save sapos em laik bilong Jehova, mi inap lukim ol gen long nupela taim, long taim bilong kirap bek. Nau dispela man i tokim mi long beten long God na askim Em long olgeta samting i ken kamap gutpela.

Ausait long haus beng i olsem ol polis i laik tokim mi long wanpela samting. Bihain mi save ol i laik bai mi mas i go klostu long dua na bai ol inap helpim mi long lusim haus beng hia. Mi harim ol i tokim dispela man: “Kisim mani na larim em i go. Mipela save Siomara em i no insait long dispela samting.”

Mi no bin save papamama bilong mi i bin stap ausait wantaim sampela brata Kristen. Ol i bin tokaut klia olsem mi no helpim dispela man long kam stilim mani long haus beng.

Man i kalabusim mi i kamapim nupela tingting bilong em, na em i tok: “Mi laikim wanpela ka i gat redio long en na wanpela draiva i no holim gan, na em i mas kisim mi i go long wanem hap mi laik i go long en, na taim mipela i hait gut nau, orait bai mi larim dispela meri i go. Tasol sapos yupela i laik sut long gan, han-bom bai i pairap na mitupela bai i dai.” Tasol mi toktok strong long dispela man: “Rausim dispela tingting long het bilong yu. Yu wok long tingting tasol long i dai. Tasol skin bilong yumi i bilong Jehova.”

Pinis long Kalabus

Long 4 klok long moningtaim, mi pilim sik i laik painim mi. Mi stap insait long dispela haus inap 16 aua pinis. Mi no bin slip liklik, na mi no bin kisim kaikai, na pairap bilong man long bikmaus i mekim na mitupela raskolman i guria olgeta.

Tulait i kamap na wanpela dokta meri i kam toktok wantaim mi. Em i tok, olgeta wan wan minit i lus mi bai pilim nogut moa. Olsem na man i kalabusim mi i tokim mi: “Plis yu stap strong yet.” Bihain em i tok wanpela i ken kam insait long haus beng long lukautim mi. Tasol ol man i stap ausait na ol inap mekim dispela, ol i pret na ol i no laik i kam insait.

Klostu long 8 klok long moningtaim, mi pilim kol long olgeta hap bodi bilong mi. Ai bilong mi i raun na mi pundaun i go daun long plua. Taim mi kirap gen, mi lukim olsem mi stap ausait long haus beng! Wanpela ofisa bilong polis i helpim mi long kirap sanap, na narapela tupela i helpim mi long ran i go long ka na ol i kisim mi i go long haus sik. Ai bilong mi i raun gen na mi pundaun taim mi laik lusim ka na i go, na mi no kirap gen inap long taim ol i givim mi sampela marasin samting. Nau ol i tokim mi: “Yu ken i stap gut nau. Olgeta samting i kamap orait. Yu malolo.” Mi tingim Jehova God. Mi tenkyu long em, long wanem em i helpim mi long dispela taim birua i painim mi.

Bihain, papamama bilong mi i tokim mi long olsem wanem mi bin lusim haus beng. Dispela raskol i kisim mi i go ausait na em i traim long kirapim mi, long wanem, mi bin ai raun na mi pundaun. Tasol inap liklik hap minit em i lusim mi i go na em i tanim bilong lukluk i go long haus beng. Em i mekim olsem na wantu ol polis i holim em, na mi no kalabus moa. Ol polis i no save wanem samting i mekim na dispela man i lusim mi na i lukluk i go long haus beng; em i save i no gat man i stap long dispela haus.

Mi stap long haus sik inap 4-pela de, na bihain mi go long haus. Mi pilim tru pasin sori ol brata sista ol i mekim long mi. Inap olsem 60 brata sista ol i kam bung i stap long haus bilong mi. Mi amamas tru, long wanem mi save i no mi na famili bilong mi tasol i stap! Nau mi tingting long samting mi mas mekim long i stap bilong mi​—mi mas mekim laik bilong God, na mi tingim dispela tok tru bilong Baibel, em i tok: “Mi bin beten long Bikpela bai em i helpim mi, na em i harim [beten] bilong mi. Em i tekewe olgeta pret long bel bilong mi, na nau mi stap bel isi.” (Buk Song 34:4)​—Em stori bilong Siomara Velásquez López.

[Piksa long pes 28]

Siomara Velásquez López