“Ol i Strong Tru Long Bihainim Stretpela Pasin”

INAP foti yia gavman i birua long wok bilong ol Witnes long Sekoslovakia, tasol nau ol i mekim ol kibung sekit long dispela hap. Wanpela i bin kamap long Ostrava, long Me 1990, na wanpela man bilong kisim tok bilong nius (Nová Svoboda), em Jiří Muladi, em i stori olsem:

“Lain Manmeri i Gat Gutpela Pasin Tru”

“Tripela de paslain long kibung i kirap, inap 90 manmeri ol i bung long wanpela bikpela haus kibung (ol i kolim Tatran Hall) na ol klinim gut tru na i olsem em i namba wan taim long 40 yia ol man i bin klinim gut. Mi yet mi inap tok olsem: Bihain long kibung dispela ples bilong mekim kibung i stap klin yet, i no gat ol hap pipia nabaut o pipia bilong smok samting i slip long graun. Ating yu save tu, ol Witnes Bilong Jehova i no save smok.

“Long namba wan de bilong kibung i bin i gat 1,600 manmeri i kam bung. . . . Bilong kirapim kibung ol i mekim wanpela singsing na olgeta i mekim wantaim. Planti man bilong wokim ol singsing bai i kirap nogut, long wanem ol dispela singsing i gutpela tru. . . . I no gat ol singsing na pilai nabaut bilong litimapim nem bilong man o ples samting. Na ol i no mekim ol toksave na kolim nem bilong ol man i stap olsem bikpela bilong ol. (Olsem na mi no save husat em i stap olsem bikpela bilong ol. Na ol i no tingim dispela samting liklik.) Na ol i no singaut na kolim wanpela tok bilong litimapim lain bilong ol. Nogat tru. Na ol i mekim pasin daun, na gutpela pasin sori, na ol i tingim tru narapela narapela.”

Save Tru long Ol Witnes

“Nem bilong God em Jehova. Long Baibel long tok ples Sekoslovakia, ol i tanim na kolim nem bilong God olsem Hospodin [Bikpela]. Ol Witnes Bilong Jehova i strong long ol i mas kolim nem stret bilong God, na long pasin na wok bilong ol, ol Witnes i strong long tokaut long God em i stap laip na long ol gutpela pasin bilong em. . . .

“Bilip bilong ol Witnes em i tambuim tru ol samting nogut bilong pait na bilong bagarapim ol man, olsem na ol Witnes i no laik insait long ami samting, na ol i no wok long ol main, orait ol i go long kalabus inap fopela yia samting.

“Olsem na long dispela pasin ol i mekim, yumi ken save ol i strong tru long bihainim ol stretpela pasin. Mipela laikim ol kain gutpela manmeri olsem bilong mekim wok politik samting​—tasol bai yumi no inap long kisim ol dispela lain long mekim olsem. Ol Witnes Bilong Jehova ol i tingting olsem wok bilong ol man long bosim graun i bringim ol man i kam long rot bilong bagarap. Tru ol Witnes i daun long wok ol gavman i mekim, tasol ol i bilip tru olsem Kingdom bilong God tasol em inap long stretim ol hevi bilong ol manmeri. Dispela i no driman nating; nogat. Ol i pilim tru ol samting i painim olgeta manmeri. Orait, nau yu gat wanem tingting long ol, em samting bilong yu.

“Harim. Maski mi wanbel wantaim tingting bilong ol, tasol mi no wanpela Witnes Bilong Jehova.”

[Piksa long pes 27]

Ol i bung long wanpela haus kibung, em Lucerna Hall, long Prak, Sekoslovakia