Baibel i Tok Wanem?

Ol Piksa Bilong Pasin Sem Inap Bagarapim Yumi?

LONG bipo ol man i soim ol piksa nogut bilong pasin sem long sampela haus piksa, tasol long nau ol i soim long olgeta ples ol manmeri i stap long en. Long planti kantri ol i wokim ol kain nius, na buk, na televisen, na piksa wokabaut, na video, i kamapim ol pasin nogut na i kain olsem ol i subim ol dispela kain piksa nogut long pes bilong ol man. Nau ol piksa nogut bilong pasin sem i kamap long olgeta hap graun, tasol olsem wanem em inap bagarapim ol man?

Wanpela buk diksenari i tok, ‘ol piksa na buk nogut ol i kamapim pasin nogut i gat sem, na dispela i bilong kirapim bel bilong man na em i laik mekim pasin sem o pamuk samting.’ Na long nau ol man i mekim ol dispela pasin. Tasol ol man i gat narapela narapela tingting long wanem samting i save mekim bel i kirap na wanem samting i no save mekim bel i kirap. Wanpela em ol samting ai bilong man i laik lukim. Olsem na wanem piksa samting i kirapim bel bilong wanpela man, ating dispela i no save pulim ai bilong narapela man. Tasol wanpela ripot i kamapim tok bilong 5,000 manmeri long Jemani ol i tok, sampela taim i olsem wankain piksa na buk nogut i save kirapim ol man na meri wantaim long mekim ol pasin sem olsem pamuk samting.

I Gat Rong Long Kirapim Bel?

Sapos man i no inap long inapim wanpela laik bilong bel, i no stret sapos em i kirapim bel bilong em na em i gat laik long mekim. I kain olsem sapos i gat wanpela kain kaikai em yu save laikim tru, tasol em i pinis na yu no inap kisim sampela moa. Olsem wanem? Bai yu wok long lukim ol buk i gat piksa bilong dispela kaikai? Ating nogat. O sapos dispela kain kaikai i no gutpela long skin bilong yu, na i tambu long yu kaikai, na sapos yu wok long tingim dispela kaikai, bai yu putim hevi long yu yet na yu kirap kaikai. Na i wankain tu long man i laik lusim smok​—i no gutpela sapos em i stap wantaim ol narapela ol i smok. Dispela i no ken helpim em long lusim dispela pasin.

Baibel i tok long maritpasin olsem: Man i mas marit pastaim bambai em ken mekim maritpasin. (1 Korin 7:​2-5; Hibru 13:4) Olsem na sapos man i no marit na em i mekim ol samting bilong bel i kirap, dispela i no stret, long wanem bai em i no inapim dispela laik bilong skin! Na dispela inap putim hevi long em yet​—na samting i nogut moa em olsem: Dispela bai opim rot long pilai long sem bilong em o mekim pasin pamuk samting. Na long dispela pasin em i kalapim ol lo bilong God.​—1 Tesalonaika 4:​3-7.

Olsem na ating i orait long ol marit tasol i ken lukim ol piksa i gat pasin sem, a? Nogat tru. Ol marit tu i mas bihainim lo bilong God na bihainim ol pasin i stret. Na tu, ol piksa i gat pasin sem ol i kamapim pasin bilong tingim laik bilong bodi bilong em tasol na long inapim ol dispela laik, tasol pasin sori tru em i save tingim tru laik bilong bodi bilong narapela. Na tu, ol piksa nogut i givim tingting long man o meri long inapim ol laik nogut bilong skin, na insait long marit bai em i daunim na bagarapim ol gutpela samting insait long marit na i no gat pasin sori long en.​—1 Korin 13:5.

Ol dispela kain piksa nogut i no ken strongim marit, tasol em bai wok long bagarapim. Long ol buk ol i kamapim kain kain samting bilong maritpasin, dispela em i no stret na i giaman tasol, long wanem, ol i givim tingting kranki long ol narapela long maritpasin. Na insait long marit, maritpasin em i no bikpela samting tumas, tasol pasin bilong laikim narapela na lap na amamas wantaim long ol samting na pasin bilong toktok gut wantaim, na narapela i tingim narapela, ol i bikpela samting tru. Olsem na ol piksa i save kamapim ol pasin i gat sem ol inap bagarapim marit.

Ol dispela piksa nogut i bagarapim tru ol man na ol i kamap wankain olsem ol animal, no gat save na tingting na ol i bihainim samting em skin i kirapim ol long mekim. Dispela i soim olsem ol i no inap bosim skin, em wanpela gutpela pasin em spirit holi i save kamapim. (Galesia 5:​22, 23) Pasin bilong lukim ol piksa nogut inap opim rot long mekim pasin pamuk samting. Olsem na ol Kristen i sakim tru ol piksa na buk i gat pasin sem long en.

Baibel i givim gutpela tok long yumi olsem: “Meri i olsem hul wara bilong yu na yu ken amamas long em. . . . nogut yu tingting oltaim long meri bilong narapela man na yu laik holim susu bilong en (em dispela tingting i kamap taim yu wok long kaunim ol buk nogut).”​—Sindaun 5:​15-20.

Man i ken mekim wanem bilong lusim pasin bilong lukim ol piksa na buk i kamapim pasin sem?

Rot Bilong Lusim

Tok bilong Baibel inap helpim man long lusim ol piksa nogut i gat sem, em i tok: “Yupela i mas kilim i dai olgeta pasin bilong dispela graun i stap long bel bilong yupela. . . . olsem, pasin pamuk na pasin doti, na pasin bilong bel i kirap long mekim ol pasin nogut.” (Kolosi 3:5) Dispela tok “kilim i dai” i makim olsem yu mas pinisim tru ol laik o tingting nogut; sapos yu daunim tasol em i no inap, long wanem dispela inap pulim yu gen long mekim ol pasin nogut.

Tru, ol Kristen i no save bagarapim nabaut skin bilong ol. Tasol yumi mas “kilim” dispela ol tingting nogut bilong maritpasin, bai yumi no ken pundaun na larim ai bilong yumi i lukim ol buk na piksa i gat pasin sem. (Lukim Matyu 5:​29, 30.) Baibel i tok yumi mas lusim ol laik nogut na “oltaim” mekim “stretpela pasin na ol klinpela pasin.”​—Filipai 4:8.

Na wanem narapela samting em inap helpim yu long klia long dispela pasin? Oltaim tingim ol tok bilong Baibel. Lukim lista hia:

“Helpim mi long givim baksait long ol samting i no gutpela.”​—Buk Song 119:37.

“Pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.”​—1 Jon 2:16.

“Tasol bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin. Orait na dispela pasin bilong bel i kirap, . . . bihain em i save kamapim sin . . . Na taim sin i kamap bikpela, em i save kamapim dai.”​—Jems 1:​14, 15.

Ol samting i pulim yumi long mekim ol samting i kamapim dai, yumi save dispela em i samting nogut. Orait, olsem tasol ol piksa na buk nogut i kamapim ol pasin i gat sem, em i samting nogut tru! Baibel i tok: “Sapos wanpela man i bihainim ol laik bilong olpela bel bilong em yet, orait . . . em bai i bagarap olgeta. Tasol sapos em i bihainim pasin bilong Holi Spirit, . . . em bai i stap gut oltaim oltaim.” Olsem na no ken larim ol piksa na buk nogut i pasim yu long kisim laip i stap oltaim!​—Galesia 6:8.