‘Mi Laik Pilaim Musik Olsem Ya!’

JON i sindaun na paitim piano na musik i kamap. Han sut bilong em i kamapim musik em nek bilong en i antap, na han kais i kamapim musik em nek i daun. Taim krai bilong tupela i bung wantaim, musik i kamap gutpela tru. Gutpela save bilong em long musik i kirapim em long bungim gut ol liklik hap bilong musik na musik i naispela moa. Adrian na Brian na Bret i bihainim em long elektrik-gita, na Steve i bihainim ol long saksafon bilong em.

Kain musik olsem i save kirapim ol man i harim long amamas na givim bel long singsing. Dispela musik i kirapim ol long singsing gut tru. Olsem na yu no kirap nogut sapos wanpela man i tok: ‘Man! Mi laik pilaim musik olsem tu ya!’

Yu pilim olsem tu taim wanpela man i kamapim wanpela gutpela musik? Ating yu kirap na tok: ‘Mi save mi no inap pilaim musik olsem.’ Tasol yu save olsem wanem? Yu bin traim long lain long pilaim gita o piano samting bipo?

Husat Inap Lain?

Sampela man i gat gutpela save long musik na ol bai lain hariap, winim ol narapela man. Tasol sapos man inap lain long rit rait, em inap lain long kamapim musik long gita samting. Tasol yu mas i gat laik long pilaim na mekim gutpela musik. I no olsem yu givim bel long mekim wantu tasol na bihain yu lusim, nogat. Yu mas redi long wok strong long lain gut.

Tru, i no olgeta man i lain long rit rait ol i gat gutpela save long rit o rait gut. Olsem tasol i no olgeta man i lain long pilaim musik bai ol i gat wankain save long kamapim gut musik bilong wanpela singsing. Tasol maski, sapos yu gat laik long harim musik, na nau yu lain long pilaim musik, bai yu inap kisim bikpela amamas. Sapos yu lain long pilaim musik, dispela i no wankain olsem yu harim musik.

Long nau i gat tupela rot bilong lain long pilaim musik. Wanpela rot em long lain long kaunim rait bilong musik na lain long pilaim wan wan nek bilong en. Tasol planti man i no laik lain olsem. Narapela rot em long lain long pilim wanpela singsing inap long yu save long pilaim ol samting long dispela musik. Dispela inap kirapim yu long lain long kaunim kain rait bilong musik na lain long sampela save bilong kamapim musik.

Ating Mi Lapun Tumas Long Lain?

Roslyn i gat 46 krismas na em i tok, “Mi laik lain long pilaim musik, tasol mi lapun pinis!” Ating yu pilim olsem tu, a? Olsem wanem? Dispela tok i stret? Ating ol yangpela tasol inap lain gut long pilaim musik, a? Nogat tru. Musik i wankain long olgeta narapela samting yu lain long mekim, olsem na yu ken tok: “Mi no lapun tumas long lain.”

Tru, ol yangpela inap lain kwik long pilaim musik. Olsem: Wanpela man nem bilong em Fritrik Sopan em i gat 7-pela krismas taim em i paitim piano long ai bilong planti manmeri! Narapela em Yehudi Menuhin, em i gat 8-pela krismas taim em i pilaim vaiolin long ai bilong planti manmeri long biktaun San Fransisko! Tasol i no gat planti man i olsem dispela tupela man.

Jon, em dispela man i paitim piano long stori bilong yumi, em i lain long mekim olsem taim em i gat 8-pela krismas. Tasol em i tok: “Mi kirap lain long pilaim musik, na sampela mun bihain mi les long lain moa, tasol mama bilong mi i strong long mi mas lain yet. Nau mi amamas long em i bin mekim olsem.” Tru i no Jon tasol i les long lain inap planti aua. Em wanpela hevi i painim ol yangpela taim ol i lain long pilaim musik, na ol i pilim olsem ol i no kisim gut.

Tasol sampela lapun i givim bel tru na ol i wok strong long lain. Dispela samting i mekim na ol inap kisim kwik pasin bilong pilaim musik​—ol i traim traim long olgeta de. Sapos yu ting yu lapun tumas long lainim musik, tingim tok bilong wanpela profesa. Em i tok: “Sapos yu wok strong long kisim planti gutpela samting na yu mekim gut wok long save bilong yu, bai yu wok long kisim planti gutpela save, maski yu lapun.” Wanpela man em Arturo Toscanini, em i lain long olgeta wan wan rait na mak bilong ol singsing na musik, na em i putim long tingting bilong em yet, maski em i gat 85 krismas.

Makim Stret Wanem Musik Yu Laik Pilaim

Bret i save pilaim gita na em i tok: “No ken lain long wanpela musik yu no laikim. Bai yu no givim bel long lain sapos yu no gat laik tru long pilaim dispela kain musik.” Em gutpela tingting. Olsem na yu mas makim wanem kain musik tru yu laik lain long en.

Wankain olsem Bret, planti yangpela long nau ol i laik lain long pilaim gita. Yu inap paitim gita na singsing wantaim; o yu inap bungim krai bilong en wantaim krai bilong ol narapela samting bilong kamapim musik na musik i ken kamap gutpela; o yu wanpela inap pilaim wanpela musik. I no hatwok long karim gita i go long wanem wanem hap yu laik i go long en. Na bai yu lain kwik long putim pinga long mak stret bilong en bilong kamapim narapela narapela krai bilong musik. Na tu, sampela gita i no gat bikpela pe tumas.

Ol samting olsem piano na elektronik-ogen, planti man i laik lain long pilaim ol dispela samting tu. Wanpela tisa inap lainim yu, o yu ken lukim wanpela buk samting na lain. Tru i hatwok long karim ol piano raun, tasol yu inap painim long ples ol pren i bung long en. Taim yu pilaim dispela musik na yu harim ol man i singsing wantaim, bai yu kisim bikpela amamas tru, maski yu wok long lain yet. Taim yu pilaim elektronik-ogen, em inap kamapim narapela narapela kain krai. Na i gat akodien tu; i no hatwok long lain long pilaim dispela musik.

Tasol i gat planti ol arapela samting bilong pilaim musik tu. Yumi ken makim 4-pela kain musik olsem: Musik bipo ol i bin wokim long diwai na i bilong winim, na musik ol i wokim long bras na em tu i bilong winim, na musik kain olsem kundu samting na i bilong paitim, na musik kain olsem gita na i gat ol string bilong pulim. Musik ol i wokim long diwai i olsem flut na pikolo na obo na klarinet na basun, na saksifon tu ol i bin wokim liklik hap bilong en long diwai. Na musik ol i wokim long bras i olsem trampet na biugel na hon na trombon na tuba. Na musik ol i save paitim olsem kundu em ol i kolim dram, na narapela kain ol i paitim em sailafon na simbal na tambarin. Na musik i gat string, em ol i kolim harp na mandolin na gita na vaiolin na viola na selo na dabol-beis.

Planti man i save laikim tru musik i save kamap long ol musik i gat string, olsem krai bilong vaiolin samting. Sapos yu laik lain long pilaim vaiolin o kain musik olsem, yu mas lain long harim na skelim gut wan wan krai bilong en, long wanem, em i no wankain olsem gita o piano samting. Yu mas lain long putim pinga long ples stret, na yu mas skelim krai bilong en, i stret o nogat.

Sapos yu laik pilaim sampela musik olsem flut o trampet, yu mas lain long winim strong. Na musik ol i wokim long bras, em maus bilong man yet i save mekim em i krai narapela narapela kain. Na musik olsem flut i gat ol baten long en.

Planti man i ting musik simbal na dram em ol samting bilong paitim nating tasol bilong mekim musik i kamap gutpela. Tasol dispela tingting i no stret. Em i mas save long pasin bilong paitim stret na harim gut krai bilong ol narapela musik tu em ol i pilaim wantaim. Olsem bai man inap pilaim gut wantaim ol narapela man i pilaim ol narapela narapela musik.

Yu Laik Winim Wanem Mak?

Orait, olsem wanem long yu? Yu tingting long lain long pilaim wanpela musik? Sapos olsem, yu no ken putim mak i antap tumas, olsem yu mas kamap saveman bilong pilaim musik, na yu lusim bikpela hap taim long en. Sapos yu mekim olsem, yu inap lusim nating taim bilong mekim sampela gutpela wok.

Em nau, yu inap lain long pilaim musik​—ating i no olsem wanpela saveman bilong mekim musik, tasol liklik save yu kisim bai amamasim yu na ol narapela i harim yu i pilaim musik.

[Rait long pes 21]

‘Sapos yu mekim gut wok long save bilong yu, bai yu wok long kisim planti gutpela save, maski yu lapun’