Olsem Wanem Sapos Papamama i No Holim Bilip Bilong Mi?

LONG nau papamama bilong planti yangpela Kristen i no save bilip long tok i tru. Wanpela yangpela meri i gat 12-pela krismas em i tok: “Insait long famili bilong mi, mi wanpela tasol i save mekim stadi long Baibel na mama i strong long mi mas lusim stadi.” Na papamama bilong sampela yangpela i slek long lukautim ol long ol samting bilong spirit. Dispela ol samting inap putim bikpela hevi long ol yangpela i laik tru long mekim laik bilong God.

Em i hatwok tru long kamap Kristen tru sapos papamama i no helpim na strongim yu long mekim olsem. Tasol yu inap winim dispela kain hevi! Stori bilong ol man long bipo na sampela bilong nau tu, inap strongim yu long winim ol dispela hevi.

Ol Yangpela i Bin Holimpas Bilip

Wanpela em Abel, pikinini bilong namba wan man na meri, Adam na Iv. Adam na Iv i no helpim ol pikinini bilong ol long ol samting bilong spirit. Ol i givim baksait long Jehova, olsem na ol pikinini bilong tupela i mas painim rot bilong kisim ol samting bilong spirit. Maski dispela samting i kamap, Abel i no larim dispela samting i pasim em long kisim save long pasin bilong lotu long Jehova. Maski em i gat liklik save long ol samting bilong lotu, Abel i bin wok strong long kisim save long Man i bin wokim olgeta samting. Jehova i bin toktok wantaim Kein na Abel, na dispela i kirapim Abel long pas wantaim God na em i kamap man bilong bilip. Baibel i tok: “Abel i bilip long God, na i mekim ofa long em. Na God i laikim ofa bilong Abel, tasol em i no laikim ofa bilong Kein. Abel i bilip, na long dispela as God i laikim ol presen Abel i givim em. Na dispela i soim yumi olsem God i kolim em stretpela man.”​—Hibru 11:4; Stat 4:​2-15.

Narapela yangpela man i stap olsem gutpela piksa maski papamama bilong em i no lotu long God, em Josaia. Papa bilong em, em King Emon bilong Juda, na ol i bin kilim em i dai taim Josaia i gat 8-pela krismas tasol. Taim King Emon i stap laip yet, em “i mekim pasin nogut long ai bilong Bikpela, olsem papa bilong en, Manase, i bin mekim. Em i save lotu long ol piksa bilong giaman god bipo papa bilong en i bin wokim, na em i save mekim ofa long ol. . . . Em i wok long mekim sin moa moa yet.” (2 Stori 33:​22, 23) Olsem na Josaia i kamap bikpela namel long ol man i no save tingim God.

Tasol Josaia “i mekim gutpela pasin long ai bilong Bikpela. Em i bihainim gutpela pasin olsem tumbuna bilong en, King Devit, i bin mekim bipo. . . . Em i stat long lotu long God bilong tumbuna bilong en, King Devit. Na long namba 12 yia bilong en i stap king, em i tokim ol wokman long raun long olgeta hap bilong Juda na Jerusalem na bagarapim ol ples bilong lotu long ol giaman god na ol piksa bilong god meri Asera na bilong ol arapela giaman god ol i bin wokim long diwai na ain samting.”​—2 Stori 34:​2-4.

Olsem wanem Josaia i strong long mekim ol dispela samting na em i no gat gutpela papa bilong helpim em? Ol man i stap strong long ol samting bilong spirit olsem hetpris Hilkia na kuskus bilong em Safan ol i bin strongim em. Gutpela pasin bilong ol long tingim God i helpim tru Josaia long “bihainim ol tok bilong lo bilong God.” (2 King 23:24; 2 Stori 34:​14-19) Lo bilong Moses i tok, olgeta king i mas raitim raitim ol hap bilong lo na skulim ol yet long san na nait. (Lo 17:18; Josua 1:8) Josaia i bihainim dispela tok na ating dispela i helpim em long kamap strong long ol samting bilong spirit.

Sampela Inap Helpim Yu Long Nau

Yu tu inap kamap strong long ol samting bilong spirit maski papamama i no helpim yu tumas long mekim olsem. Insait long ol kongrigesen bilong ol Witnes Bilong Jehova, i gat ol brata sista na papamama bilong spirit ol inap helpim yu long kamap strong. (Mak 10:30) Na ating i gat sampela strongpela yangpela tu i stap na yu inap poroman wantaim ol. O ating i gat sampela Witnes i bikpela pinis na ol inap lukautim yu long ol samting bilong spirit. Olsem: Yangpela man Jeri em i no gat papa, olsem na wanpela elda long kongrigesen i singautim em long go wantaim em long Baibel-stadi bilong em. Ol i mekim stadi pinis na bihain tupela i save go long haus kaikai bilong kisim liklik kaikai na mekim stori. Jeri i tok: “Dispela elda i kamap olsem papa bilong mi.” Nau Jeri i marit pinis na em i wanpela wokman long kongrigesen. Em i no lusim tingting long dispela gutpela pasin elda i bin mekim bilong helpim em.

Olsem wanem? I gat sampela manmeri long kongrigesen i amamas long helpim yu? Sapos olsem, yu mas amamas long gutpela pasin bilong ol. Sapos wanpela i no prenim yu, orait yu yet yu ken kirap prenim ol. Ating yu inap toktok wantaim wanpela elda bilong kongrigesen, olsem yu laik bai wanpela i helpim yu long ol samting bilong spirit. Ating wanpela inap stadi wantaim yu o helpim yu long redim tok bilong yu long Skul Bilong Wok Autim Tok. O ating yu sot long stap wantaim wanpela famili. Tru ating bai yu sem long tokaut long dispela samting, tasol tingim, insait long kongrigesen ol elda i bilong was na helpim olgeta manmeri​—ol yangpela tu, long ol samting bilong spirit. (1 Pita 5:2) Ol inap helpim yu tru.

Sampela Samting Yu Inap Mekim

Olsem wanem? Yu inap mekim sampela samting long haus bilong stretim dispela hevi? Ating yu inap. Yangpela man Jo i tok, em i kisim ‘liklik’ helpim tasol long papamama long ol samting bilong spirit, long wanem, ol i no man bilong bilip. Tasol Jo i tok, ating em yet i as bilong dispela hevi, long wanem, taim em i kirap stadi long Baibel wantaim ol Witnes Bilong Jehova, em i no bihainim tru ol samting em i kisim save long en, olsem na em i wok yet long bikhet long papamama. Dispela i mekim na papamama i no tingting long stadi na kisim save long Baibel, na ol i no kirapim Jo long stadi.

Sapos papamama bilong yu i no wanbel wantaim bilip bilong yu, olsem wanem? Yu save kamapim long ples klia olsem yu gat strongpela laik long mekim wok bilong God? Baibel i tok, ol meri Kristen inap helpim man bilong ol long kamap bilipman sapos ol i bihainim ol gutpela pasin. Olsem wanem? Yu bihainim ol gutpela pasin olsem daun long papamama na dispela inap helpim papamama bilong yu long kamap bilipman? (1 Pita 3:1; Efesus 6:​1-3) Sapos yu mekim olsem, ating ol tu bai laik long helpim yu.

Olsem wanem sapos papamama bilong yu i Kristen tasol ol i no helpim yu na kirapim yu long tingim ol samting bilong spirit? Maski i gat wanem as bilong dispela, taim yu bihainim gutpela pasin long famili dispela inap helpim ol. (1 Timoti 4:12) Long taim bilong ol miting, yu mas bilas kwik na redi long go. Na givim bel long mekim sampela wok moa long haus samting, na dispela bai helpim papamama tu long redi long go long miting. Na ating dispela gutpela pasin bilong yu bai helpim ol long tingim ol miting i bikpela samting.

Papamama bilong yu i mekim famili-stadi wantaim yu long olgeta wik o olsem wanem? Sapos nogat, orait, long pasin isi yu ken kirapim ol long mekim, tasol no ken toktok planti long dispela. Long taim bilong stadi yu no ken pasim maus na sindaun nating; yu mas redim buk bilong stadi na bekim ol askim. Wok strong long mekim dispela famili-stadi i kamap samting bilong amamas. Tok tenkyu long ol long wanem, ol i mekim famili-stadi wantaim yu, na ating dispela inap kirapim papamama long mekim famili-stadi oltaim long olgeta wik.

Tasol olsem wanem sapos papamama i no mekim wanpela samting maski yu bin wok long kirapim ol? No ken les. (Galesia 6:9) I gutpela yu tokaut olsem yu laikim tru God na yu laikim tru tok i tru bilong Baibel. Yu yet mas kirap na helpim ol narapela long kisim save long God. Na oltaim ‘yu mas larim bilip bilong yu i strongim bel bilong yu, em dispela gutpela bilip God yet i bin givim long yu. Na oltaim yu mas beten long strong bilong Holi Spirit.’ (Jut 20) Wanpela yangpela, nem bilong em Lavern, i bihainim dispela tingting. Em i tok: “Mi no larim papa bilong mi i pasim mi long lainim tok i tru. Olsem na mi yet mi mekim stadi long Wastaua na mi no lukim televisen.a Na tu, long olgeta moningtaim mi yet mi kaunim hap bilong Baibel. Na mi save go autim tok tu wantaim ol narapela brata sista Kristen.”

Yu mas strongim bel olsem yangpela meri Lavern na no ken larim ol samting long famili i daunim yu. Tingting strong long ol samting bilong spirit. Sapos i gat rot, yu mas pas gut wantaim ol brata sista i strong long ol samting bilong spirit. Tasol sapos i no gat wanpela long famili i helpim yu o sapos i gat, yu yet mas strong long i stap pren wantaim God. Taim yu singaut long em long helpim yu, em bai strongim yu.​—Lukim Buk Song 119:116.

[Ol Futnot]

[Piksa long pes 19]

Ol strongpela Kristen long kongrigesen i ken helpim yu na strongim yu