Kirap Lainim Ol Taim Ol i Liklik Yet

I STRET yangpela pikinini i ken save gut long skin bilong ol i wok olsem wanem na ol i ken mekim wanem bilong lukautim ol yet na bai ol man i no ken mekim pasin sem long ol. Tasol wanem taim pikinini i mas kisim dispela save? Planti man ol i ting pikinini i ken kisim dispela save taim em i bikpela, tasol nogat.

I gat mak na yumi ken save pikinini i laik kamap bikpela. Ating yangpela meri bai kisim sik bilong mun taim em i gat 10-pela krismas o paslain long dispela, o bihain taim em i gat 16 krismas samting. Ating taim manki i gat 11 o 12-pela krismas samting, sem bilong em bai kamapim wara o melek. Olsem wanem? Ol pikinini bilong yu bai redi paslain long ol dispela senis i kamap long skin bilong ol, ating taim ol i gat 9-pela krismas samting? Olsem wanem? Taim ol i yangpela yet ol i save em bikpela samting long ol i no ken mekim pasin pamuk?

Tokim Ol Long Ol Senis Bai Kamap Long Skin

I stret pikinini meri i save long ol senis bai wok long kamap long skin bilong em. Ating mama bai stori wantaim pikinini meri long sik bilong mun na lainim pikinini olsem God i bin wokim ol meri, olsem na samting bai i kamap long em i save kamap long olgeta meri. Mama i mas “tok klia” long pikinini meri olsem nau skin i wok long redi long taim bihain, olsem long taim em bai marit na kamap wanpela mama. Mama i ken tokim pikinini meri tu long skin i wokim gutpela ples malumalum insait long bilum bilong olgeta meri bambai nupela pikinini i ken stap gut long en. Na dispela ples i olsem wanpela skin i kamap insait long bel na planti rop i gat blut i pulap long en. Taim meri i no kisim bel, nau bai bel i wok long rausim dispela skin wantaim blut. Dispela i kamap taim mun i painim meri.

Na tu, pikinini man bilong yu mas save pastaim long dispela wara o melek em bai pulap long sem bilong em na wan wan taim skin i save rausim, olsem long taim em i slip o driman samting. (Lo 23:​10, 11) Em i mas save, dispela em rot bilong skin i rausim planti melek i stap long sem bilong em. Ol pikinini man na pikinini meri bilong yu i mas save, i no gat rong taim skin i kamapim sampela senis olsem. Skin i mekim olsem bilong redi long taim ol bai marit na kamap papa o mama.a

Yupela ol papamama i mas tingting gut long ol dispela samting, long wanem, dispela i samting bilong God. Na God i makim yupela long lainim pikinini long dispela samting.

Slip Wantaim na No Ken Kisim Sik Bilong Pamuk

Taim ol yangpela bilong yu i kisim 13 krismas samting, yu mas lainim ol olsem pasin bilong slip wantaim wanpela i no poroman marit bilong ol, em samting nogut, maski narapela i tokim ol, em i orait. Ol sik bilong pamuk olsem AIDS i kamap long olgeta hap graun. Ol dispela kain sik inap mekim na man na meri i no inap kamapim pikinini, o taim meri i karim pikinini, skin bilong pikinini i no gutpela, o ol dispela sik inap kamapim sik kensa o indai tu. Na sampela i no save ol i gat sik bilong pamuk, na ol i slip wantaim narapela na nau narapela tu i kisim dispela sik.

Ol pikinini bilong yu i mas save, i no gat wanpela samting ol i ken mekim na bai meri i no inap tru long kisim bel o ol i no inap kisim sik bilong pamuk. Maski planti yangpela i mekim wok long kain kain samting bilong pasim bel, ol i kisim bel.

Ol pikinini bilong yu i mas save, rot bilong abrusim ol sik bilong pamuk i olsem ol i mas tingim ol lo bilong God. Na God i larim man na meri marit i slip wantaim bilong kamapim pikinini. Olsem na stretpela rot bilong mekim maritpasin em insait long marit wantaim poroman yu laikim tumas na poroman em i no bin slip wantaim narapela.

Ol Lo Bilong God i Bilong Lukautim Yumi

Baibel i tok: “Man . . . i [mas] pas wantaim meri bilong en.” “Yupela i no ken mekim pasin pamuk.” “Tok bilong ol dispela pasin [pamuk] tu i no ken kamap liklik namel long yupela.” “Ol manmeri bilong mekim pasin pamuk . . . i no inap i kam insait long kingdom bilong Krais na God.”​—Stat 2:24; Matyu 5:27; Efesus 5:​3, 5.

Ol dispela lo i no bilong putim hevi long yumi, nogat. Sapos famili i bihainim ol dispela lo, bai famili i pas gut wantaim na stap amamas. Na pikinini i stap long bel bai i gat papa na mama, em samting olgeta pikinini i mas i gat. Papa na mama i gat narapela narapela pasin, na pasin bilong tupela wantaim inap helpim gut pikinini.

Olsem na yupela ol papamama i mas skulim pikinini long maus na long pasin bilong yupela yet. Ol lo bilong Baibel yu mas putim i go insait long bel na tingting bilong pikinini bilong yu, na sapos traim i kamap pikinini inap winim dispela traim. Baibel i tok: “Bihain wok bilong olgeta man bai i kamap ples klia long de God i makim bilong kotim ol manmeri. Dispela de bai i kamap olsem paia, na dispela paia bai i traim wok bilong olgeta man wan wan, bilong painimaut wok bilong ol i gutpela o nogat.” Sapos yu bin mekim gutpela wok long skulim pikinini long ol dispela samting na pikinini i stap gut, bai yu kisim gutpela blesing long en.​—1 Korin 3:13.

Tasol bikpela askim i stap yet: Olsem wanem yu ken strong yet long skulim pikinini long ol dispela samting taim em i winim 13 krismas na i go inap long taim em i bikpela pinis?

[Ol Futnot]

[Piksa long pes 8]

Tokim pikinini bilong yu long ol senis bai kamap long skin bilong em na bai em i ken save